Skip tu di aatikl

Skip tu lis a tapik

 CHAPTA ILEVN

Wai Lata Sofarin Deh?

Wai Lata Sofarin Deh?

1, 2. Wat da sohn kweschan weh wahn lata peepl aks dehnself?

WAHN harikayn dischrai wahn hoal vilij. Wahn man shoot op ahn kil lata peepl eena wahn cherch. Wahn ma weh mi ga faiv lee pikni, ded fahn kyansa.

2 Wen dizaasta ahn terabl tingz laik dehndeh hapm, lata peepl aks, “Wai?” Er dehn aks wai di werl soh ful op a haychrid ahn sofarin. Yoo noh wanda bowt dat sohntaim?

3, 4. (a) Wat da sohn kweschan weh Habakok mi aks Jehoava? (b) Weh Jehoava mi pramis ahn?

3 Eena di Baibl, wi laan dat sohn faytful man aks Gaad kweschan laik dehndeh tu. Fi egzampl, di prafit Habakok mi aks Jehoava: “Wai yu mek Ah si lata wikidnis? Ahn wai yu talarayt wahn lata sofarin? Wai dischrokshan ahn vailens deh fronta mi? Ahn wai lata kwaaril ahn fait deh aal oava di plays?”​—Habakkuk 1:3.

4 Da Habakkuk 2:2, 3, wi ku reed Gaad ansa tu Habakok ahn how Ih pramis fi fiks di sichuwayshan. Jehoava ga lata lov fi peepl. Di Baibl seh: ‘Ih kyaa bowt yoo.ʼ (1 Peeta 5:7) In fak, Gaad hayt fi si sofarin way moa dan wee. (Isaiah 55:8, 9) Soh den, mek wi ansa di kweschan, Wai lata sofarin deh?

 WAI LATA SOFARIN DEH?

5. Weh wahn lata rilijos leeda seh bowt sofarin? Weh di Baibl teech?

5 Wen sombadi sofa, sohn peepl seh dat da bikaaz a weh da persn mi du eena di paas. Eevn di paasta, prees, ahn di ada rilijos leeda dehn aalwayz seh dat peepl sofa bikaaz da di wil a Gaad. Som a dehn seh dat evriting weh hapm tu wahn persn, eevn di bad ting dehn, da fahn Gaad ahn dat wi wahn neva andastan wai. Er dehn seh dat wen peepl ded da bikaaz Gaad kehr dehn da hevn, eevn di lee baybi dehn. Bot dat da noh chroo. Jehoava noh kaaz bad tingz fi hapm. Di Baibl seh: “Ih noh pasabl fi mek di chroo Gaad du wikidnis, fi mek di Almaiti du weh rang!”​—Job 34:10.

6. Wai wahn lata peepl blaym Gaad fi aala di sofarin eena di werl?

6 Wahn lata peepl blaym Gaad fi aala di sofarin eena di werl bikaaz dehn tink dat da hihn di rool dis werl. Bot laik weh wi mi laan eena Chapta 3, Saytan di Devl da di reel roola a di werl.

7, 8. Wai wahn lata sofarin deh?

7 Di Baibl seh dat “di hoal werl deh anda di powa a di eevl wan.” (1 Jan 5:19) Saytan da di roola a dis werl, ahn hihn onli kruwil. Di Baibl seh ih ‘di fool op peepl.ʼ (Revilayshan 12:9) Wahn lata peepl di fala hihn. Ahn dat da jos wan reezn wai di werl ful op a peepl weh tel lai, weh hayt wan anada, ahn weh kruwil tu wan anada.

8 Wahn nada reezn wai lata sofarin deh, da bikaaz Adam ahn Eev paas aan sin tu dehn pikni. Ahn sayka sin, hyoomanz kaaz wan anada fi sofa.  Dehn aalwayz waahn bee moa impoatant dan eech ada. Dehn fait, goh da waar, ahn buli adaz. (Ecclesiastes 4:1; 8:9) Sohntaim peepl sofa bikaaz “taim ahn tingz weh dehn noh ekspek” hapm tu dehn. (Ecclesiastes 9:11) If dehn deh da di rang plays at di rang taim, aksident an ada bad tingz ku hapm tu dehn.

9. Wai wee ku chros dat Jehoava ga wahn gud reezn wai ih alow sofarin fi kantinyu op tu now?

9 Jehoava noh kaaz sofarin. Wi noh fi blaym hihn fi di waar, kraim, ahn di bad tingz weh hapm tu wi. Gaad noh kaaz dizaasta laik ertkwayk, harikayn, ahn flod. Bot yu mait wanda, ‘If Jehoava da di moas powaful persn eena di yoonivers, wai hihn noh stap aala dehn terabl tingz fahn hapm?ʼ Wi noa dat Gaad kay wahn lat bowt wi, soh ih mos ga wahn gud reezn wai hihn di alow sofarin fi kantinyu op tu now.​—1 Jan 4:8.

WAI GAAD ALOW SOFARIN

10. How Saytan mi chalenj Jehoava?

10 Di Devl mi get Adam ahn Eev fi sin eena di gyaadn a Eedn. Dis da wen Saytan mi chalenj Jehoava; hihn akyooz Gaad dat hihn da wahn bad Roola. Ih klaym seh dat Gaad neva waahn weh gud fi Adam ahn Eev. Saytan mi waahn dehn bileev dat hihn wuda bee wahn beta roola dan Jehoava ahn dat dehn noh need Gaad.​—Genesis 3:2-5; pleez goh da Noat 27 da di en a dis buk.

11. Weh kweschan wi need fi ansa?

 11 Adam ahn Eev mi disobay Jehoava ahn gaan gens ahn. Dehn mi tink dat dehn mi ga di rait fi disaid fi dehnself weh rait ahn weh rang. Weh Jehoava du fi proov dat dehn mi rang ahn dat hihn noa weh bes fi wee?

12, 13. (a) Wai Jehoava neva dischrai Adam ahn Eev rait away? (b) Wai Jehoava alow Saytan fi rool di werl, ahn hyoomanz fi rool dehnself?

12 Jehoava neva dischrai Adam ahn Eev rait away. Hihn mi don pramis dat fi dehn pikni wahn liv pahn di ert, soh ih alow dehn fi staat wahn famili. Den Jehoava mek di way pasabl fi Adam ahn Eev pikni chooz hoo dehn waahn az dehn roola. Jehoava waahn di ert ful op wid perfek peepl, ahn dat wahn hapm noh mata weh di Devl chrai du.​—Genesis 1:28; Isaiah 55:10, 11.

13 Saytan mi chalenj Jehoava fronta aala di aynjel dehn. (Job 38:7; Revilayshan 5:11) Soh Jehoava gi Saytan taim fi proov ih point. An ih gi hyoomanz taim fi si if fi dehn kaina govament wahn werk widowt fi Hihn help.

14. Weh wi laan afta towznz a yaaz?

14 Fi towznz a yaaz, hyoomanz chrai rool dehnself, bot dehn kyaahn du it. Dis proov dat Saytan onli laiyad. Hyoomanz need Gaad. Di prafit Jerimaiya mi karek wen ih seh: “Ah wel ahn noa Oa Jehoava, dat man way noh bilangz tu hihn. Ih noh eevn bilangz tu wahn man weh di waak fi seh how fi tek di neks step.”​—Jeremiah 10:23.

 WAI JEHOAVA WAYT SOH LANG?

15, 16. (a) Wai Jehoava alow sofarin fi kantinyu fi soh lang? (b) Wai Jehoava noh fiks aala di prablem dehn weh Saytan kaaz op tu now?

15 Wai Jehoava alow sofarin fi kantinyu fi soh lang? Wai hihn noh stap bad tingz fahn hapm? Bikaaz ih tek taim fi proov dat Saytan kyaahn rool. Hyoomanz chrai aal difrent kaina govament, ahn stil dehn fayl. Eevn wid aala di laytes teknalaji ahn saiyens, wi si way moa injostis, kraim, waar, ahn poa peepl nowadayz. Wi kyaahn rool wiself widowt Gaad.

16 Jehoava noh step een ahn fiks di prablemz weh Saytan kaaz. If hihn du dat, da laik ih di help Saytan rool, ahn Hihn wuda neva du dat. Pahn tap a dat, hyoomanz wuda bileev dat dehn ku rool dehnself widowt Gaad. Bot dat da wahn lai, ahn Jehoava wahn neva sopoat dat eeda kaaz hihn noh lai.​—Heebrooz 6:18.

17, 18. Weh Jehoava wahn du bowt aala di damij weh Saytan kaaz?

17 Yu tink Jehoava ku fiks aala di damij weh Saytan ahn hyoomanz kaaz? Yes ih kud. Jehoava noa egzakli wen aala Saytan chalenj wahn geh ansa. Den di ert wahn bee wahn Paradais, laik weh Hihn mi waahn fahn di biginin. Aala dehn wan eena “dehn grayv” wahn kom bak tu laif. (Jan 5:28, 29) Peepl noh wahn geh sik er ded. Jeezas wahn fiks aala di damij weh Saytan kaaz. Jehoava wahn yooz Jeezas “fi dischrai aal weh di devl du.” (1 Jan 3:8) Wi hapi dat Jehoava payshent wid wi soh wi ku geh fi noa hihn ahn chooz hihn az wi Roola. (Reed  2 Peeta 3:9, 10.) Eevn wen wi sofa, hihn help wi fi get chroo it.​—Jan 4:23; reed 1 Korintyanz 10:13.

18 Jehoava noh foas wi fi chooz hihn az wi Roola. Hihn giv aala wi free wil. Mek wi si how wi ku yooz wi free wil.

HOW YU WAHN YOOZ YU FREE WIL?

19. Weh Jehoava gi wi wen ih mi mek wi, ahn wai wi fi apreeshiayt it?

19 Jehoava neva mek wi laik how ih mek di animal dehn. Ih gi wi free wil. Wi ku chooz how wi waahn liv wi laif ahn disaid if wi waahn pleez Jehoava. (Proverbs 30:24) Ahn wee da noh laik wahn roabot weh kyaahn tink fi ihself. Wi ga di freedom fi chooz weh wee waahn bee, hoo wi waahn az wi frenz, ahn weh wi waahn du wid wi laif. Jehoava waahn mek wi injai wi laif.

20, 21. Wat da di bes disizhan yu ku mek?

20 Jehoava waahn wee lov hihn. (Machyu 22:37, 38) Wen wahn pikni tel ih pa “Ai lov yoo dadi,” dat mek di pa onli hapi. Espeshali if ih seh it fan ih haat. Wel, Jehoava da laik da pa. Hihn mek wi chooz if wi waahn serv hihn er nat. Saytan, Adam, ahn Eev neva waahn serv Jehoava. How yoo wahn yooz di free wil weh Gaad gi yu?

21 Yooz yu free wil fi serv Jehoava. Milyanz a peepl don chooz fi serv Jehoava ahn fi rijek Saytan. (Proverbs 27:11) Weh yu ku du now fi mek yu deh eena Gaad nyoo werl weh no sofarin wahn deh? Di neks chapta wahn ansa da kweschan.