Skip tu di aatikl

Skip tu lis a tapik

 CHAPTA FAIV

Di Ransom Da di Graytis Gif Fahn Gaad

Di Ransom Da di Graytis Gif Fahn Gaad

1, 2. (a) Weh mek wahn gif meen wahn lat tu yu? (b) Wai di ransom da di graytis gif fahn Gaad?

WAT da di bes gif yu eva get? Wahn gif noh haftu bee ekspensiv fi mek ih meen wahn lat tu yu. Wen wahn gif mek yu feel hapi er da sohnting weh yu reeli need, yu apreeshiayt it.

2 Owta aala di gif dehn weh Gaad gi wi, onli wan a dehn wi reeli need. Da di graytis gif Gaad gi tu hyoomanz. Eena dis chapta, wi wahn laan dat Jehoava mi sen ih Son, Jeezas Krais, soh dat wi ku geh evalastin laif. (Reed Machyu 20:27, 28.) Wen Jehoava mi sen Jeezas dong pahn di ert az wahn ransom, Hihn mi proov dat ih lov wi wahn lat.

WAT DA DI RANSOM?

3. Da wai wi ded?

3 Di ransom da how Jehoava free wi fahn sin ahn det. (Ifeezhanz 1:7) Fi mek wi andastan wai wi need di ransom, wi haftu noa weh mi hapm eena di gyaadn a Eedn. Fi wee fos payrent dehn, Adam ahn Eev, mi sin. Sayka dat dehn ded. Ahn bikaaz dehn paas aan sin tu wi, wi ded tu.​—Pleez goh da Noat 9 da di en a dis buk.

4. Hoo da-mi Adam, ahn weh aal hihn mi injai bifoa ih mi sin?

4 Wen Jehoava mi mek di fos man, Adam, Ih mi  giv ahn sohnting speshal—wahn perfek hyooman laif. Adam mi ga wahn perfek main ahn wahn perfek badi. Ih neva mi wahn geh sik, er geh oal ahn ded. Bikaaz Jehoava mi mek Adam, Hihn da-mi laik wahn pa tu ahn. (Look 3:38) Jehoava mi aalwayz taak tu Adam. Gaad mi eksplayn tu ahn weh ih mi waahn fan ahn. Hihn mi giv ahn werk weh ih mi injai.​—Genesis 1:28-30; 2:16, 17.

5. Weh di Baibl meen wen ih seh dat Gaad mi mek Adam eena ‘fi Hihn imijʼ?

5 Gaad mi mek Adam eena ‘fi Hihn imij.ʼ (Genesis 1:27) Jehoava mi giv ahn kwalitiz laik weh Hihn gat, laik lov, wizdom, jostis, ahn powa. Ih mi giv Adam free wil. Ih neva mek ahn laik wahn roabot. Adam kuda mi chooz fi du gud er bad. If ih mi onli chooz fi obay Gaad, ih kuda mi liv fareva eena Paradais.

6. Wen Adam mi disobay Gaad, da weh aal ih laas? Weh hihn paas aan tu wee bikaaz a weh ih mi du?

6 Wen Adam neva lisn tu Gaad, ih mi geh di det sentens. Adam laas wahn lat. Ih laas ih speshal frenship wid Jehoava, ih perfek laif, ahn di Paradais. (Genesis 3:17-19) Adam ahn Eev mi chooz fi du weh rang, soh dehn neva ga di hoap fi liv fareva agen. Bikaaz a weh Adam mi du, ‘sin kom eena di werl, ahn sin bring det; ahn sin spred tu evribadi, an aala dehn sin. Sayka dat, evribadi wahn ded.ʼ (Roamanz 5:12) Wen Adam mi sin, ih sel wi intu slayvri. Now, wee da “slayv tu sin” ahn det. (Roamanz 7:14) Yu tink wi ga eni hoap? Yes, Jehoava gi wi di ransom.

7, 8. Wat da wahn ransom?

7 Wat da wahn ransom? Wahn ransom da di  prais weh yu pay fi free sombadi er fi bai bak sohnting. An akaadn tu di Baibl, wahn ransom da di egzak prais weh kova, er pay fi di kaas a sohnting.

8 No imperfek hyooman ku pay fi di amonk a damij weh Adam mi kaaz wen ih sin ahn paas aan det tu wi. Bot Jehoava mek di way pasabl fi free wi fahn sin ahn det. Mek wi laan how di ransom werk ahn how wi ku benifit fan it.

JEHOAVA PROVAID DI RANSOM

9. Weh kaina ransom wi mi need?

9 Non a wi kuda eva pay di ransom fi di perfek laif weh Adam laas. Wai wi kyaahn du dat? Bikaaz non a wi perfek. (Psalm 49:7, 8) Onli wahn nada perfek hyooman kuda mi pay di ransom. Di Baibl seh dat “hihn [Jeezas] don sakrifais ih laif fi set aal peepl free fahn sin.” (1 Timoti 2:6) Di perfek laif weh Jeezas sakrifais mi ga di saym valyu laik di laif weh Adam laas.

10. How Jehoava mi provaid di ransom?

10 How Jehoava mi provaid di ransom? Jehoava mi sen ih moas preshos Son pahn di ert. Da Son da Jeezas, ahn hihn da di fos persn Gaad mek. (1 Jan 4:9, 10) Jeezas mi wilin fi lef ih Faada an ih hoam da hevn. (Filipiyanz 2:7) Jehoava mi du wahn mirakl ahn tek di laif a Jeezas da hevn, ahn put it eena di woom a wahn verjin naym Mayri dong ya pahn ert. Soh Jeezas mi baan az wahn perfek hyooman, widowt sin.​—Look 1:35.

Jehoava mi giv ih preshos Son az wahn ransom fi wi

11. How wan man ku pay di ransom fi aala wi?

 11 Wen di fos man, Adam, mi disobay Jehoava, ih laas perfek laif fi aala wi. Yu tink wahn nada man ku geh rid a det fi aala Adam pikni? Yes. (Reed Roamanz 5:19.) Jeezas mi giv ih perfek laif az wahn ransom fi wee. (1 Korintyanz 15:45) Fi hihn perfek laif ku geh rid a det fi aala wi.​—1 Korintyanz 15:21, 22.

12. Wai Jeezas mi haftu sofa soh moch?

12 Di Baibl taak bowt how Jeezas mi sofa bifoa ih ded. Dehn mi flag ahn, nayl ahn tu wahn chree, ahn mek ih sofa wahn sloa ahn paynful det. (Machyu 27:27-30, 50) Wai Jeezas mi haftu gaan chroo aala dis? Bikaaz Saytan mi klaym seh dat nobadi wahn stay laayal tu Gaad if dehn haftu sofa. Jeezas mi proov dat wahn perfek hyooman ku stay laayal tu Gaad eevn wen ih di fays det. Jehoava mi prowd a Jeezas!​—Proverbs 27:11; pleez goh da Noat 15 da di en a dis buk.

13. Da how Jeezas mi pay di ransom?

13 Da how Jeezas mi pay di ransom? Eena di yaa 33 C.E., pahn Naisan 14 a di Jooish kalinda, Jehoava mi alow Jeezas enimi dehn fi kil ahn. (Heebrooz 10:10) Chree dayz afta dat, Jehoava mi rezorek Jeezas, noh az wahn hyooman, bot az wahn spirit persn. Layta, Jeezas gaan bak da hevn ahn gaan fronta ih Faada fi pay aaf fi wee sinz. An ih Faada mi aksep ih perfek hyooman laif az di ransom. (Heebrooz 9:24) Eena da way, Jeezas set wi free fahn sin ahn det.​—Reed Roamanz 3:23, 24.

 HOW YU KU BENIFIT FAHN DI RANSOM

14, 15. Weh wi mos du fi geh fagivnis fi wi sin dehn?

14 Wi di benifit aredi fahn di ransom. Mek wi si how wi di benifit now ahn how wi wahn benifit eena di fyoocha.

15 Wi geh fagivnis fi wi sin dehn. Ih noh eezi fi du weh rait aal di taim. Wi mek mistayk, ahn sohntaim wi seh ahn du tingz weh rang. (Koloashanz 1:13, 14) How wi ku geh fagivnis? Wi need fi reeli feel sari fahn wi haat fi wateva rang wi du, ahn bee hombl wen wi aks Jehoava fi fagiv wi. Den wi ku bee shoar dat wi wahn geh fagivnis fi wi sin dehn.​—1 Jan 1:8, 9.

16. Weh wi mos du fi ga wahn gud kanshans?

16 Wi ku ga wahn gud kanshans. Wen wi kanshans tel wi dat wi du sohnting rang, wi feel gilti ahn wi mait eevn feel laik wi noh wot notn ataal ahn waahn giv op. Bot wi noh need fi feel dis way. If wi bayg Jehoava fi fagiv wi, fi shoar ih wahn lisn tu wi ahn fagiv wi. (Heebrooz 9:13, 14) Jehoava waahn wi taak tu ahn bowt aala fi wee prablem ahn weeknis dehn. (Heebrooz 4:14-16) Bikaaz a dis, wi ku ga wahn gud kanshans fronta Gaad.

17. Wat da som a di blesinz wi ku geh bikaaz Jeezas ded fi wi?

17 Wi ga di hoap fi liv fareva. ‘Di pay weh sin gi wi da det, bot di gif weh Gaad di gi wi da laif weh laas fareva ahn eva, an ih free.ʼ (Roamanz 6:23) Bikaaz Jeezas ded fi wi, wi ku liv fareva an injai perfek helt. (Revilayshan 21:3, 4) Bot weh wi need fi du fi geh dehndeh blesinz?

 APREESHIAYT DI RANSOM

18. How wi noa dat Jehoava lov wi?

18 Wen sombadi gi yu wahn gif, ih reeli toch yu haat, noh chroo? Di ransom da di moas preshos gif weh wi kuda eva get, ahn wi need fi shoa Jehoava dat wi apreeshiayt it. Jan 3:16 tel wi dat ‘Gaad lov di peepl dehn eena dis werl soh moch dat ih giv op ih wan an onli Son fi dehn.ʼ Jehoava lov wi soh moch dat ih sen ih preshos Son fi ded fi wi. Ahn wi noa dat Jeezas lov wi tu kaaz hihn mi wilin fi ded fi wi. (Jan 15:13) Di ransom da di graytis gif fi chroo. Ih proov dat Jehoava ahn Jeezas reeli lov yoo.​—Galayshanz 2:20.

Di moa wi laan bowt Jehoava, di moa wi wahn lov hihn ahn wi wahn geh fi bee ih fren

19, 20. (a) How yu ku bee Jehoava fren? (b) How yu ku shoa dat yu apreeshiayt di ransom?

19 Now dat yu don laan bowt Gaad grayt lov, how yoo ku bee fi hihn fren? Ih noh eezi fi lov sombadi weh yu noh noa. Jan 17:3 seh dat wi need fi geh fi noa Jehoava. Di moa yu du dis, di moa yu wahn lov ahn, ahn yu wahn waahn du tingz fi pleez hihn. Den yu wahn bee ih fren. Soh noh stap laan bowt Jehoava chroo yu stodi a di Baibl.​—1 Jan 5:3.

20 Shoa dat yu apreeshiayt di ransom. Di Baibl seh dat di wan dehn “weh put [er, eksasaiz] dehn fayt eena Gaad Son wahn liv fareva.” (Jan 3:36) Weh dat meen? Ih meen dat wi need fi du weh Jeezas teech wi fi du. (Jan 13:15) Wi kyaahn jos seh dat wi bileev eena hihn. Fi shoa dat wi ga fayt eena di ransom, wi haftu proov it chroo wi akshan. Di skripcha da Jaymz 2:26 seh: “Fayt widowt akshan ded.”

21, 22. (a) Wai wi need fi kohn da di Memoaryal evri yaa? (b) Weh wi wahn taak bowt eena Chapta 6 ahn 7?

 21 Kohn da di Memoaryal a Krais det. Pahn di eevnin a Naisan 14, eena di yaa 33 C.E., Jeezas mi koman ih apasl dehn fi memba ih det. Soh now, evri yaa wi memba fi hihn det wen wi goh da di Memoaryal er Krais Eevnin Meel. (1 Korintyanz 11:20; Machyu 26:26-28) Jeezas waahn wi memba dat ih mi giv ih perfek laif az wahn ransom fi wi. Ih mi seh: ‘Du dis soh dat unu ku memba mi.ʼ (Reed Look 22:19.) Wen yu kohn da di Memoaryal, yu di shoa dat yu memba di ransom ahn di grayt lov weh Jehoava ahn Jeezas ga fi wi.​—Pleez goh da Noat 16 da di en a dis buk.

22 Di ransom da di graytis gif wi kuda eva get. (2 Korintyanz 9:14, 15) Da preshos gif wahn eevn benifit milyanz a peepl weh don ded. Chapta 6 ahn 7 wahn taak bowt how dat pasabl.