Skip tu di aatikl

Skip tu lis a tapik

 CHAPTA FIFTEEN

How Yu Ku Noa di Chroo Rilijan?

How Yu Ku Noa di Chroo Rilijan?

1. Hoo da di onli persn weh ku tel wi how fi wership Gaad di rait way?

MOAS rilijan klaym seh dat dehn di teech di chroot bowt Gaad. Bot dat noh pasabl, bikaaz aala dehn di teech difrent tingz bowt Gaad ahn how wi fi wership hihn. How wi ku noa di rait way fi wership Gaad? Jehoava da di onli persn hoo ku tel wi how fi wership hihn.

2. How yu ku laan di rait way fi wership Gaad?

2 Jehoava gi wi di Baibl fi help wi laan di rait way fi wership hihn. Soh stodi di Baibl, ahn Jehoava wahn help yu fi andastan ahn yooz weh yu laan eena yu laif bikaaz hihn reeli kay bowt yu.​—Isaiah 48:17.

3. Weh wi need fi fain owt?

3 Sohn peepl seh dat Gaad aksep aal rilijan, bot dat da noh weh Jeezas teech wi. Ih seh: ‘Da noh evribadi weh stodi di kaal pahn mi ahn seh, ‘Laad, Laad,ʼ wahn geh fi bee paat a di kingdom a hevn. Da onli dehn wan weh du weh mai Faada waahn dehn du.ʼ Soh wi need fi fain owt weh Gaad waahn wi du, ahn den du it. Dis da sohnting seeryos kaaz Jeezas seh dat peepl weh noh obay Gaad da “wikid peepl.”​—Machyu 7:21-23.

4. Yu tink ih eezi fi du weh Gaad waahn? Weh Jeezas mi seh bowt dat?

4 Jeezas tel wi dat ih noh wahn bee eezi fi du weh  Gaad waahn. Ih seh: “Goh een chroo di naro gayt, bikaaz di gayt braad ahn di road waid weh di leed tu dischrokshan, ahn wahn lata peepl di goh een chroo deh; bot di gayt smaal ahn di road naro weh di leed tu laif, an onli wahn lee bit a peepl di fain it.” (Machyu 7:13, 14, NW) Di naro road, er di rait way fi wership Gaad, leed tu evalastin laif. Di waid road, er di rang way fi wership Gaad, leed tu det. Bot Jehoava noh waahn nobadi ded. Soh ih giv evribadi di chaans fi laan bowt hihn.​—2 Peeta 3:9.

DI RAIT WAY FI WERSHIP GAAD

5. How yu ku noa hoo di wership Gaad eena di rait way, er di chroo rilijan?

5 Jeezas mi seh dat wi ku noa di wan dehn weh di wership Gaad eena di rait way. Wi need fi egzamin weh dehn bileev ahn weh dehn du. Hihn mi seh dat di chroo rilijan da laik wahn chree. Ih seh: “Wahn chree weh helti wahn bayr gud froot.” (Machyu 7:16, 17) Dis noh meen dat peepl weh wership Gaad perfek, bot dehn aalwayz chrai du weh rait. Mek wi si sohn wayz weh ku help wi fi noa hoo di wership Gaad eena di rait way.

6, 7. Wai di chroo rilijan bays dehn teechinz pahn di Baibl? Weh wi ku laan fahn Jeezas egzampl?

6 Wi fi bays wi teechinz pahn di Baibl. Di Baibl seh: ‘Da Gaad mek peepl rait dong ih Skripcha. Weh deh eena ih Skripcha, gud fi mek wi teech di chroot, ahn fi mek wi noa dehn ting weh rang eena wi laif. Ih gud fi skoal wi wen wi need it, ahn fi teech wi how fi liv rait, soh dat enibadi weh waahn serv Gaad ku  bee redi fi du evri gud werk jos laik weh dehn shuda du.ʼ (2 Timoti 3:16, 17) Di apasl Paal mi tel Kristyanz: ‘Unu mi bileev dat di mesij weh wi mi preech da fahn Gaad ahn da neva notn weh wee mi mek op.ʼ (1 Tesaloanyanz 2:13) Soh wi mos bays wi teechinz pahn di Baibl bikaaz ih kohn fahn Gaad, noh pahn wi oan tinkin, chradishan, er eniting els.

7 Evriting weh Jeezas mi teech bays pahn Gaad Werd. (Reed Jan 17:17.) Ih yoostu aalwayz koat di Skripcha dehn. (Machyu 4:4, 7, 10) Di chroo rilijan bays evriting dehn teech pahn di Baibl.

8. Weh Jeezas teech wi bowt wership Gaad?

8 Wi fi wership onli Jehoava. Psalm 83:18 seh: “Fi yoo naym da Jehoava; onli yoo da di Moas Hai oava aal di ert.” Jeezas mi waahn peepl noa hoo da di chroo Gaad, an ih mi teech peepl weh Gaad naym. (Reed Heebrooz 2:12.) Ih mi seh: ‘Gaad da di onli wan yu fi wership, ahn da onli hihn yu fi serv.ʼ (Machyu 4:10) Soh aala Gaad servant fala Jeezas egzampl. Wi wership onli Jehoava, wi yooz ih naym, ahn wi teech ada peepl Gaad naym ahn weh ih wahn du fi wi.

9, 10. How wi shoa chroo lov fi wan anada?

9 Wi need fi shoa chroo lov fi wan anada. Jeezas mi teech ih disaipl dehn fi lov wan anada, ahn wee du di saym ting. (Reed Jan 13:35.) Ih noh mata weh wi kohn fram, weh kolcha wee, er if wi rich er poa. Wi lov fi wan anada bring wi tugeda laik bradaz ahn sistaz. (Koloashanz 3:14) Soh wi noh goh da waar ahn kil peepl. Di Baibl seh: ‘Dis da how yu ku  noa hoo da Gaad pikni, ahn hoo bilangz tu di Devl: aal dehn wan weh noh du weh rait, er weh noh lov dehn bradaz ahn sistaz noh bilangz tu Gaad.ʼ Den ih seh: “Wi fi lov wan anada. Wi noh fi bee laik Kayn, weh mi bilangz tu di eevl wan ahn merda ih breda.”​—1 Jan 3:10-12; 4:20, 21.

10 Wi yooz wi taim, enerji, ahn tingz weh wi ga fi help an inkorij wan anada. (Heebrooz 10:24, 25) Wi “chreet evribadi gud.”​—Galayshanz 6:10.

11. Wai wi aksep dat Jeezas da di onli way tu salvayshan?

11 Wi need fi obay Jeezas an aksep dat da onli chroo hihn wi wahn ku geh sayv. Di Baibl seh: “Unu kyaahn fain salvayshan eena nobadi els eksep Jeezas! Gaad neva giv no ada naym disya said a hevn weh peepl ku kaal pan fi geh sayv!” (Aks 4:12) Eena Chapta 5 a dis buk, wi mi laan dat Jehoava sen Jeezas fi giv ih laif fi hoosoeva obay hihn. (Machyu 20:28) Jehoava chooz Jeezas fi rool az King oava di ert. Dat da wai di Baibl tel wi dat wi haftu obay Jeezas if wi waahn liv fareva.​—Reed Jan 3:36.

12. Wai wi noh tek paat eena palitiks?

12 Wi noh fi tek paat eena palitiks. Jeezas neva tek paat eena palitiks. Wen Jeezas mi deh fronta di Roaman roola Pailat, ih seh: “Ai noh rool dong ya pahn dis ert.” (Reed Jan 18:36.) Laik Jeezas, wi laayal tu Gaad Kingdom, kaaz wi waahn ih bee di onli govament weh rool oava wi. Soh dats wai wi noh tek paat eena palitiks, noh mata weh wi liv. Bot, di Baibl tel wi fi obay ‘di wan dehn weh di rool eena di govament dehn.ʼ (Roamanz 13:1) Wi obay di laa dehn a di  konchri weh wi liv. Bot if wahn laa goh gens Gaad laa, wi wahn fala di apasl dehn ahn seh: “Wee hafu obay Gaad, noh man.”​—Aks 5:29; Maak 12:17.

13. Wat da di mesij weh wi preech, ahn wai?

13 Wi bileev dat onli Gaad Kingdom, er govament, ku fiks aala di prablem dehn eena di werl. Jeezas mi seh dat di ‘gud nyooz bowt di Kingdomʼ wahn geh preech aal oava di werl. (Reed Machyu 24:14.) No hyooman govament ku du weh Gaad Kingdom wahn du fi wi. (Psalm 146:3) Jeezas mi teech wi fi pray fi da Kingdom. Ih seh: “Kohn kohn set op yu kingdom, ahn mek evribadi obay yu pahn ert jos laik how evribadi obay yu da hevn.” (Machyu 6:10) Di Baibl tel wi dat Gaad Kingdom wahn geh rid a aal hyooman govament an “ih wahn bee di onli wan weh wahn laas fareva.”​—Daniel 2:44.

14. Wich rilijan yoo tink di wership Gaad di rait way?

14 Soh faar wi laan weh di chroo rilijan fi du. Dehn fi bays dehn teechinz pahn di Baibl, tel peepl bowt Gaad naym, ahn shoa chroo lov fi wan anada. Pahn tap a dat, dehn fi obay Jeezas, noh tek paat eena palitiks, ahn preech dat Gaad Kingdom wahn bee di onli govament weh ku fiks aala wi prablem dehn ahn bring pees pahn di ert. Tu yoo, hoo di du aala dis? Da onli Jehoava Witnisiz.​—Isaiah 43:10-12.

WEH YU WAHN DU?

15. Weh wi haftu du if wi waahn Gaad aksep wi wership?

15 Wi need fi du moa dan jos bileev dat Gaad egzis, kaaz eevn di deemon dehn bileev dat Gaad egzis. (Jaymz 2:19) If wi waahn Gaad aksep wi wership,  wi haftu du weh hihn seh, noh jos bileev dat hihn egzis.

16. Wai wi haftu rijek faals rilijan?

16 If wi waahn Gaad aksep wi wership, wi haftu rijek faals rilijan. Di prafit Aizaiya seh: “Get owt fan ahn, kip yuself kleen.” (Isaiah 52:11; 2 Korintyanz 6:17) Dat da wai wi noh fi ga notn fi du wid faals rilijan.

17, 18. Wat da ‘Babilan di Grayt,ʼ ahn wai wi haftu get owt fahn deh now?

17 Wat da faals rilijan? Da eni rilijan weh teech wi fi wership Gaad eena di rang way. Di Baibl kaal aal faals rilijan ‘Babilan di Grayt.ʼ (Revilayshan 17:5) Wai? Bikaaz afta di Flod, wahn lata faals teechinz mi staat eena di siti a Babilan. Den, dehn faals teechinz spred aal oava di hoal ert. Fi egzampl, di peepl weh mi-di liv da Babilan yoostu put dehn gaad eena groop a chree ahn wership dehn. Tudeh, lata rilijan teech dat Gaad da chree persn eena wan, bot di Baibl teech dat onli wan chroo Gaad deh; ih naym Jehoava, ahn Jeezas da ih Son. (Jan 17:3) Di peepl da Babilan mi eevn bileev dat di soal kyaahn ded ahn dat bad peepl sofa eena hel. Bot dat da noh weh di Baibl teech.​—Pleez goh da Noat 14, 17, ahn 18 da di en a dis buk.

18 Gaad prafesai dat aal faals rilijan wahn soon geh dischrai. (Revilayshan 18:8) Yu tink yu andastan wai ih impoatant fi mek yu get owta faals rilijan? Jehoava waahn yu get owt bifoa ih tu layt.​—Revilayshan 18:4.

Wen yu staat serv Jehoava, yu jain wahn big famili weh di serv hihn aal oava di werl

19. Wen yu mek op yu main fi serv Jehoava, how hihn wahn tek kayr a yu?

19 Wen yu mek op yu main fi lef faals rilijan ahn  serv Jehoava, som a yu frenz er famili mait noh andastan wai yu waahn du dis. Dehn mait chrai stap yu fahn serv Gaad, bot memba Jehoava noh wahn lef yu. Yu wahn bee paat a wahn famili weh deh aal oava di werl, milyanz a peepl hoo reeli lov wan anada. Ahn yu wahn ga di hoap fi liv fareva eena Gaad nyoo werl. (Maak 10:28-30) Maybi som a yu frenz ahn famili weh di chrai stap yu fahn serv Jehoava rait now mait mek op dehn main fi stodi di Baibl laytaraan.

20. Wai ih impoatant fi wership Gaad di rait way?

20 Gaad wahn soon geh rid a wikidnis ahn fi hihn Kingdom wahn rool oava di ert. (2 Peeta 3:9, 13) Dat wahn bee wahn wandaful taim! Evribadi wahn di wership Jehoava di way how hihn waahn. Soh ih impoatant fi mek yu du sohnting now bowt yu wership ahn serv Gaad di rait way.