Skip tu di aatikl

Skip tu lis a tapik

 CHAPTA WAN

Hoo Da Gaad?

Hoo Da Gaad?

1, 2. Wat da sohn kweschan weh peepl aks?

PIKNI aks wahn lata kweschan. Yu ku chrai yu bes fi ansa dehn, bot moas a di taim dehn stil waahn noa wai. An afta dat, dehn stil wahn aks wai agen.

2 Aala wi ga kweschanz, noh mata if wi yong er oal. Wi mait ga sohn kweschan bowt weh wi wahn eet, weh wi wahn wayr, er weh wi wahn bai. Er wi mait ga sohn impoatant kweschan bowt laif ahn di fyoocha. Bot wen wi noh fain wahn ansa weh mek sens, wi mait giv op.

3. Wai lata peepl tink dehn kyaahn fain di ansa tu dehn kweschan?

3 Yu tink di Baibl ku ansa wi kweschan dehn? Sohn peepl tink soh, bot dehn feel dat di Baibl tu haad fi andastan. Dehn mait tink dat da onli wahn teecha, prees, er wahn paasta ku ansa fi dehn kweschanz. An ada peepl feel shaym fi seh dat dehn noh noa di ansa dehn. Weh yoo tink? Yu tink di Baibl ga di ansa?

4, 5. Wat da sohn kweschan weh yoo gat? Wai yu noh fi stap luk fi di ansa dehn?

4 Yu mosi waahn fain di ansa tu kweschanz laik: Wai wee deh ya? Weh wahn hapm tu wi wen wi ded? Weh kaina persn Gaad? Di Grayt Teecha, Jeezas, mi seh: ‘Kip aan di aks ahn unu wahn geh; kip aan di luk ahn unu wahn fain; kip aan di nak pahn di doa, an ih wahn oapm fi unu.ʼ (Machyu 7:7) Noh giv op til yu fain di ansa dehn weh yu ku chros.

 5 If yu “kip aan di luk,” yu wahn fain di ansa dehn rait eena di Baibl. (Proverbs 2:1-5) Di ansa dehn weh deh een deh noh haad fi andastan. Weh yu laan fahn di Baibl wahn gi yu wahn hapiya laif now ahn wahn wandaful hoap fi di fyoocha. Mek wi luk pahn wahn kweschan weh kanfyooz wahn lata peepl.

YU TINK GAAD KAY BOWT WI ER YU TINK IH KRUWIL?

6. Wai sohn peepl tink dat Gaad noh kay bowt fi dehn sofarin?

6 Lata peepl tink dat Gaad noh kay bowt wi. Dehn feel dat if Gaad mi reeli kay bowt wi, di werl wudn bee laik dis. Wi si waar, haychrid, ahn sofarin aal oava di werl. Peepl geh sik, dehn sofa, ahn dehn ded. Sohn peepl eevn wanda, ‘If Gaad kay bowt wi, wai hihn noh stap aala dis sofarin?ʼ

7. (a) Weh rilijos leedaz teech peepl weh mek dehn bileev dat Gaad kruwil? (b) How wee noa fi shoar dat Gaad noh mek bad tingz hapm?

7 Sohn rilijos leeda mek peepl bileev dat Gaad kruwil. Wen sohnting bad hapm, dehn seh dat da di wil a Gaad, er da hihn mi waahn ih hapm. Wen dehn seh dis, dehn reeli di blaym Gaad fi aala di bad ting weh di hapm. Bot di Baibl teech wi dat bad tingz noh kohn fahn Gaad. Jaymz 1:13 tel wi dat Gaad noh tes enibadi. Ih seh: “Wen yu ga di main fi sin, yu mosn seh dat da Gaad du dat tu yu, kaa nobadi kyaahn temp Gaad wid sin, ahn hihn noh temp [er, tes] nobadi needa.” Soh dat meen dat eevn doa Gaad noh stap bad tingz fahn hapm, hihn noh kaaz dehn fi hapm needa. (Reed Job 34:10-12.) Mek wi yooz wahn egzampl.

8, 9. Yooz di egzampl eena di paragraaf fi ansa wai wi noh fi blaym Gaad fi wi prablem dehn.

 8 Imajin wahn yong man stil di liv hoam wid ih payrents. Ih pa lov ahn wahn lat, an ih teech ahn how fi mek gud disizhanz. Den wan day, di yong man noh waahn lisn tu ih pa nohmoh an ih lef hoam. Ih du wahn lata bad tingz ahn get eena chrobl. Yoo wuda blaym di pa jos bikaaz ih neva stap ih son fahn du weh ih waahn? No, yu wudn du dat! (Look 15:11-13) Soh jos laik da pa, wen hyoomanz mi chooz fi noh lisn tu Gaad ahn du weh bad, Gaad neva stap dehn. Soh wen bad tingz hapm, wi noh fi blaym Gaad; dat wudn bee fyaa.

9 Gaad ga wahn gud reezn wai hihn noh stap bad tingz fahn hapm. Eena chapta 11, yu wahn laan weh di Baibl seh bowt dis. Bot yu ku bee shoar dat Gaad lov wi ahn dat hihn noh kaaz bad tingz fi hapm; wi noh fi blaym hihn fi wi prablem dehn. In fak, hihn da di onli Wan weh ku fiks dehn.​—Isaiah 33:2.

10. Wai wi ku bee shoar dat Gaad wahn fiks aala di prablem weh bad peepl kaaz?

10 Bikaaz Jehoava da wahn hoali Gaad, hihn wahn fiks aala di prablem weh bad peepl kaaz. (Isaiah 6:3) Evriting weh hihn du kleen ahn gud. Soh wi ku chros ahn. Hyoomanz da noh laik dat ataal. Sohntaim, wi du tingz weh rang. An eevn di moas aanis roola noh ga di powa fi fiks wi prablem dehn. Nobadi ga di kaina powa weh Gaad gat. Da onli hihn ku geh rid a badnis fi gud, an ih wahn du it.​—Reed Psalm 37:9-11.

 HOW GAAD FEEL WEN PEEPL SOFA?

11. How Gaad feel wen hihn si yoo di sofa?

11 How Gaad feel wen hihn si aal weh di hapm eena di werl tudeh ahn weh aal yoo di goh chroo? Di Baibl teech wi dat Gaad “lov jostis.” (Psalm 37:28) Soh hihn reeli kay bowt weh rait ahn weh rang. Ih reeli hayt fi si peepl di sofa. Di Baibl seh dat Jehoava “mi feel payn eena ih haat” wen ih mi si how di werl mi soh ful op a badnis eena di paas. (Genesis 6:5, 6) Gaad noh chaynj​—ih stil feel di saym way. (Malachi 3:6) Di Baibl seh dat Gaad reeli kay bowt yoo.​—Reed 1 Peeta 5:7.

Di Baibl teech wi dat Jehoava da di lovin Kriyayta a di yoonivers

12, 13. (a) Wai wi ku shoa lov ahn kyaa fi adaz, ahn how wee feel wen wi si soh moch sofarin eena di werl? (b) Wai wi ku bee shoar dat Gaad wahn geh rid a aal sofarin an injostis?

12 Di Baibl seh dat Gaad mi mek wi eena fi hihn imij. (Genesis 1:26) Dis meen dat di saym wayz weh Gaad ga, wee ga tu. Soh if yoo feel bad wen yu si gud peepl di sofa, Gaad feel eevn wos! How wi noa dis?

13 Di Baibl teech wi dat “Gaad da lov.” (1 Jan 4:8) Evriting weh Gaad du da bikaaz a lov. Soh, wi ku shoa lov bikaaz Gaad shoa wee lov. Tink bowt dis: If yoo wuda ga aal di powa eena di werl, yu wuda geh rid a aala di sofarin an injostis? Af koars yu wuda du it, bikaaz yu lov peepl. How bowt Gaad? Hihn ga di powa, ahn bikaaz ih lov wi, hihn wahn geh rid a aal sofarin an injostis. Fi shoar aala di pramis dehn pahn payj 4 ahn 5 a dis buk wahn kohn chroo! Bot fi help yu chros eena dehnya pramis, yu need fi noa moa bowt Gaad.

 GAAD WAAHN YU NOA HIHN

If yu waahn bee sohnbadi fren, yu wuda tel da persn yu naym, rait? Gaad tel wi weh da fi hihn naym eena di Baibl.

14. (a) Wat da Gaad naym? (b) How wi noa dat Gaad waahn wi yooz fi hihn naym?

14 If yu waahn bee sohnbadi fren, di fos ting yu yoozhwali tel da persn da yu naym, rait? Yu tink Gaad ga wahn naym? Wahn lata rilijan seh dat fi hihn naym da Gaad er Laad, bot dehndeh da noh naym. Dehn da jos taitl, laik “king” er “praim minista.” Gaad tel wi dat fi hihn naym da Jehoava. Psalm 83:18 seh: “Ahn fi mek peepl noa dat fi yoo naym da Jehoava; onli yoo da di Moas Hai oava aal di ert.” Di man dehn weh Gaad mi yooz fi rait di Baibl mi yooz fi hihn naym towznz a taim. Jehoava waahn yu noa fi hihn naym ahn yooz it. Ih tel yu ih naym soh dat yu ku geh fi bee ih fren.

15. Weh Jehoava naym meen?

15 Di naym Jehoava ga wahn deep meenin. Ih meen dat Gaad ku mek eni a fi hihn pramis dehn kohn chroo, ahn hihn ku du eniting ih seh ih wahn du. Notn ku stap hihn. Onli Jehoava ku ga dis naym. *

16, 17. Wai Jehoava da (a) “di Almaiti”? (b) “di King weh di rool fareva ahn eva”? (c) “di Kriyayta”?

 16 Laik weh yu mi reed lee erliya, Psalm 83:18 seh dat Jehoava da di onli wan weh “da di Moas Hai.” Ahn Revilayshan 15:3 seh: “Laad Gaad Almaiti, aal weh yu du soh wandaful dat ih lef wi wid wi mowt oapm. Yoo da di King weh di rool fareva ahn eva.” Weh di taitl “di Almaiti” meen? Ih meen dat Jehoava da di moas powaful persn eena di yoonivers. Ahn di vers kaal ahn “di King weh di rool fareva ahn eva.”  Dis meen dat hihn mi aalwayz egzis eena di paas, an ih wahn aalwayz egzis eena di fyoocha. Ahn dat da weh Psalm 90:2 di seh, dat hihn da fahn “fareva eena di paas tu fareva eena di fyoocha.” Wen wi tink bowt dis, ih lef wi wid wi mowt waid oapm fi chroo!

17 Onli Jehoava da di Kriyayta. Revilayshan 4:11 seh: ‘Wi Laad ahn wi Gaad, onli yoo ga di rait fi geh gloari, an aana ahn powa, kaa yoo da di Wan weh mek evriting. Yu mek dehn ahn gi dehn laif.ʼ Soh, evriting weh yu ku tink bowt, da Jehoava mek dehn! Fahn di aynjel dehn da hevn tu di staar dehn eena di skai tu di froot pahn di chree dehn ahn tu di fish eena di see​—da hihn mek aala dehn!

 YU TINK YU KU BEE JEHOAVA FREN?

18. Wai sohn peepl tink dat dehn kyaahn bee Gaad fren? Weh di Baibl seh bowt dat?

18 Wen sohn peepl reed bowt how Gaad soh wandaful, dehn feel frayd ahn dehn tink, ‘Gaad soh powaful ahn hoali, an ih deh faar faar fahn wi, soh wai hihn wuda eevn kay bowt mee?ʼ Bot Gaad noh waahn wi feel da way. Hihn waahn deh kloas tu wi. Di Baibl seh dat “Gaad noh deh faar fahn non a wi.” (Aks 17:27) Gaad waahn yu kohn kloas tu hihn, an ih pramis dat “hihn wahn kohn kloas tu yoo.”​—Jaymz 4:8.

19. (a) How yu ku geh fi bee Gaad fren? (b) Weh yoo laik di moas bowt Jehoava?

19 How yu ku geh fi bee Gaad fren? Jeezas mi seh: ‘Fi liv fareva meen dat dehn fi noa yoo, di onli chroo Gaad, ahn Jeezas Krais, di wan weh yoo mi sen.ʼ (Jan 17:3, Di Jamiekan Nyuu Testiment) Soh kantinyu fi laan, ahn yu wahn geh fi noa Jehoava ahn Jeezas. Ahn den yu wahn geh evalastin laif. Fi egzampl, wi don laan aredi dat “Gaad da lov.” (1 Jan 4:16) Bot di Baibl tel wi moa bowt Jehoava. Ih seh hihn da wahn Gaad a mersi ahn kompashan, ih noh eezi fi geh beks, an ih aalwayz tel di chroot. (Exodus 34:6) Jehoava “gud ahn redi fi fagiv.” (Psalm 86:5) Hihn da wahn Gaad weh wi ku reeli chros an ih payshent. (1 Korintyanz 1:9; 2 Peeta 3:9) Di moa yu reed bowt Gaad eena di Baibl, di moa yu wahn laan bowt fi hihn wandaful wayz.

20, 21. How yu ku feel kloas tu Gaad if yu kyaahn si ahn?

20 How yu ku feel kloas tu Gaad if yu kyaahn si ahn? (Jan 4:24; 6:46; 1 Timoti 1:17) Wen yu reed  bowt Jehoava eena di Baibl, yu geh fi si dat hihn da wahn reel Persn. (Psalm 27:4; Roamanz 1:20) Di moa yu laan bowt Jehoava, di moa yu wahn lov hihn, ahn yu wahn feel kloasa tu ahn.

Wahn pa lov ih pikni dehn, bot fi wee hevnli Faada lov wi eevn moa

21 Yu wahn geh fi noa dat Jehoava da fi wee Faada. (Machyu 6:9) Da hihn gi wi laif, an ih waahn wi ga di bes laif eva. Dat da weh wahn lovin faada wuda waahn fi ih pikni dehn. (Psalm 36:9) Di Baibl seh dat yu ku bee Jehoava fren. (Jaymz 2:23) Now imajin dat! Jehoava, di Kriyayta a di yoonivers, waahn yoo bee fi hihn fren!

22. Weh yu fi du if ada peepl chrai stap yu fahn stodi di Baibl?

22 Sohn peepl mait chrai stap yu fahn stodi di Baibl. Dehn mait wori dat yu wahn chaynj yu rilijan. Bot noh mek nobadi stap yu fahn bee Jehoava fren. Hihn da di bes Fren yu kuda eva gat.

23, 24. (a) Wai yu noh fi stap aks kweschan? (b) Weh wi wahn taak bowt eena di neks chapta?

23 Az yu goh lang eena yu Baibl stodi, yu wahn kohn kraas tingz weh yu noh andastan. Noh shaym fi aks kweschan, er aks fi help, er fi seh dat yu noh noa di ansa. Jeezas mi seh dat wi fi bee hombl, laik lee pikni. (Machyu 18:2-4) Ahn pikni aks lata kweschan. Gaad waahn yu fain di ansa dehn. Dat da wai wen yu di stodi di Baibl, yu fi pay atenshan ahn mek shoar dat weh yu di laan da di chroot.​—Reed Aks 17:11.

24 Di bes way fi laan bowt Jehoava da fi stodi di Baibl. Eena di neks chapta, wi wahn laan wai di Baibl difrent fahn aala di ada buk dehn.

^ par. 15 If yu wuda laik fi noa moa bowt di meenin a Gaad naym ahn how fi seh it, pleez goh da Noat 1 da di en a dis buk.