Skip tu di aatikl

Skip tu di ada menyoo

Skip tu lis a tapik

Jehoava Witnisiz

Bileez Kriol

Ansaz tu 10 Kweschanz Weh Yong Peepl Aks

 KWESCHAN 4

How Ah Ku Fiks Mi Mistayk Dehn?

How Ah Ku Fiks Mi Mistayk Dehn?

WAI DI ANSA SOH IMPOATANT?

Wen yu oan op tu yu mistayk dehn yu di bee moa rispansabl ahn peepl wahn ku chros yu.

WEH YOO WUDA DU?

Imajin dis: Wen Tim mi-di play wid ih frenz, ih chroa wahn baal ahn brok di nayba winsheel.

If yoo da-mi Tim, weh yoo wuda du?

STAP AHN TINK!

YU GA CHREE OPSHAN:

  1. Ron.

  2. Blaym sombadi els.

  3. Tel di nayba weh mi hapm, ahn aafa fi pay fi di winsheel.

Yu wuda reeli waahn pik Opshan A. Bot dehn aalwayz ga gud reezn fi mek yu oan op tu yu mistayk dehn—weda da wahn window yu brok er eniting els.

 CHREE REEZN FI OAN OP TU YU MISTAYK DEHN

  1. Da di rait ting fi du.

    Di Baibl seh: “Wi waahn du di rait ting aal di taim.” —Heebrooz 13:18.

  2. Peepl moa wilin fi fagiv sombadi weh oan op tu dehn mistayk.

    Di Baibl seh: “Di wan weh di kova oava ih sin dehn noh wahn ga sokses, bot dehn wahn shoa mersi tu hoosoeva kanfes dehn sin ahn stap du it.”—Proverbs 28:13.

  3. Moas impoatant, yu wahn di pleez Gaad.

    Di Baibl seh: “Jehoava hayt wahn chriki persn, bot Hihn da kloas fren wid di raichos persn.”—Proverbs 3:32.

Kareena mi geh wahn tikit fi di brok speed limit an ih mi-di chrai haid it fahn ih pa. Bot ih mi kyaahn haid it fareva. Kareena seh: “Bowt wahn yaa layta, mi pa noatis dat wahn tikit mi deh eena mai naym. Ah mi get eena lata chrobl!”

Wat da di lesn? Kareena seh: “Ih onli mek tingz wers wen yu haid yu mistayk dehn. Yu wahn stil pay fi dehn laytaraan!”

HOW FI LAAN FAHN YU MISTAYK DEHN

Di Baibl seh: “Aala wi slip dong eena difrent kaina way evri now ahn agen.” (Jaymz 3:2) Aala dis teech wi dat wen yu oan op tu yu mistayk dehn—ahn noh chrai haid dehn—ih shoa dat yu da sombadi weh hombl ahn machoar.

Di neks step da fi laan fahn yu mistayk dehn. Wahn gyal naym Veera seh: “Ah chrai si eech mistayk az sohnting weh Ah ku laan fram; dehn ku help mi bee wahn beta persn, ahn deel wid di sichuwayshan eena wahn difrent way neks taim.” Mek wi si how yoo ku du dat.

Yu baro yu pa baik ahn yu brok it. Weh yu wahn du afta dat?

  • Noh seh notn ahn hoap yu pa noh see’t.

  • Tel yu pa egzakli weh mi hapm.

  • Tel yu pa weh mi hapm bot blaym sombadi els.

Yu fayl wahn tes bikaa yu neva stodi fi it. Weh yu wahn du afta dat?

  • Blaym di tes ahn seh ih mi tu haad.

  • Oan op dat da yoo fayl di tes.

  • Klaym seh di teecha noh laik yu ahn ga sohnting gens yu.

Wen yu stay di foakos pahn di mistayk dehn weh yu mi mek eena di paas, da laik yu di stayr eena di miro di luk da bak wail yu di jraiv

 Now luk bak pahn di too egzampl weh yu jos reed, ahn chrai imajin dat yoo da (1) yu pa ahn (2) yu teecha. Weh yu pa ahn yu teecha wahn tink bowt yu if yu wilin fi oan op tu yu mistayk dehn? Weh dehn wuda tink bowt yu if yu chrai haid yu mistayk dehn?

Now tink bowt wahn mistayk weh yu mek eena di paas yaa ahn ansa dehnya kweschan.

Wat da-mi di mistayk? How yu mi deel wid it?

  • Ah haid it.

  • Ah blaym sombadi els.

  • Ah mi wilin fi oan op tu it.

If yu neva oan op tu yu mistayk, how yu mi feel aftawodz?

  • Gud—Ah mi get weh wid it!

  • Gilti—Ah shuda mi tel di chroot.

How yu kuda mi deel wid di sichuwayshan moa beta?

Weh yu laan fahn yu mistayk?

WEH YOO TINK?

Wai sohn peepl noh waahn oan op tu dehn mistayk?

Weh peepl wahn tink bowt yu if yu aalwayz chrai haid yu mistayk dehn, bot weh dehn wahn tink bowt yu if yu oan op tu yu mistayk dehn?—Look 16:10.