Skip tu di aatikl

Skip tu di ada menyoo

Skip tu lis a tapik

Jehoava Witnisiz

Bileez Kriol

Yu Famili Ku Bee Hapi

 SEKSHAN 9

Wership Jehoava az Wahn Famili

Wership Jehoava az Wahn Famili

‘Unu fi wership Gaad, kaa ih mek hevn ahn di jrai lan.’—Revilayshan 14:7

Laik weh yu don laan eena dis broashoar, di Baibl gat een lata prinsipl weh ku help yoo ahn yu famili. Jehoava waahn unu bee hapi. Hihn pramis dat if unu put fi hihn wership fos, “hihn wahn gi unu aala dehnya ting weh unu need.” (Machyu 6:33) Hihn reeli waahn unu bee fi hihn fren. Soh yooz evri apachooniti unu geh fi divelop wahn rilayshanship wid Gaad. Dis da di graytis privilij weh sohnbadi ku gat.—Machyu 22:37, 38.

 1 SCHRENTN YU RILAYSHANSHIP WID JEHOAVA

WEH DI BAIBL SEH: “Ai wahn bee unu Faada, ahn unu wahn bee mi son ahn mi daata dehn. Dat da weh di Laad Almaiti seh.” (2 Korintyanz 6:18) Gaad waahn yu bee fi hihn fren. Pryaa ku help yu fi du dat. Akchwali, Jehoava tel yu fi “neva stap pray” tu ahn. (1 Tesaloanyanz 5:17) Hihn waahn hyaa bowt weh kansaan yu ahn how yu reeli feel deep dong eena yu haat. (Filipiyanz 4:6) Wen yu pray wid yu famili, dehn wahn si how reel Gaad tu yoo.

Bisaidz taak tu Gaad, yu need fi lisn tu ahn. Yu ku du dis wen yu stodi di Baibl an ada poblikayshanz weh bays pahn di Baibl. (Jaymz 1:25) Tek yu taim ahn reeli tink bowt weh yu laan. (Psalm 77:11, 12) Yu ku shoa Gaad dat yu di lisn tu ahn wen yu goh da di Kristyan meetin dehn tu.—Heebrooz 10:24, 25.

Sohnting els weh ku help yu fi schrentn yu rilayshanship wid Jehoava da fi taak tu adaz bowt hihn. Di moa yu du dis, di kloasa yu wahn feel tu hihn.—Machyu 28:19, 20.

WEH YU KU DU:

  • Mek taim evri day fi reed di Baibl ahn fi pray

  • Az wahn famili put spirichwal tingz fos, den unu ku du tingz fi ga fon ahn fi rilaks aftawodz

2 INJAI FAMILI WERSHIP

WEH DI BAIBL SEH: “Kohn kloas tu Gaad, ahn hihn wahn kohn kloas tu yoo.” (Jaymz 4:8) Yu need fi ga wahn skejul fi famili wership ahn stik tu it. (Genesis 18:19) Bot yu need fi du moa dan dat. Yu need fi mek Gaad bee paat a yu laif evri day. Fi schrentn yu famili rilayshanship wid Gaad, yu need fi taak bowt hihn “wen yu sidong eena yu hows ahn wen yu waak pahn di road ahn wen yu lidong ahn wen yu get op.”(Deuteronomy 6:6, 7) Chrai yu bes fi bee laik Jashwa, hoo mi seh: “Az fi mee ahn mai famili, wee wahn serv Jehoava.”—Joshua 24:15.

WEH YU KU DU:

  • Ga wahn regyula proagram fi chrayn yu famili, ahn mek shoar yu kansida weh eech wan a dehn need