Skip tu di aatikl

Skip tu di ada menyoo

Skip tu lis a tapik

Jehoava Witnisiz

Bileez Kriol

Gud Nyooz Fahn Gaad!

 LESN 15

Wai Yu Shuda Kantinyu Yu Baibl Stodi?

Wai Yu Shuda Kantinyu Yu Baibl Stodi?

1. How yu wahn benifit if yu kantinyu yu Baibl stodi?

Fi shoar, dis stodi a baysik Baibl teechinz mek yu lov fi Jehoava geh schranga. Bot dis da noh di en; yu need fi kip aan di werk pahn yu lov fi hihn fi mek ih stay schrang. (1 Peeta 2:2) Yu shudn stap yu stodi, bikaaz yu hoap fi liv fareva pen pahn weda er nat yu kantinyu fi geh kloas tu Gaad. Reed 1 Timoti 2:4; Jood 21.

Az yu geh moa ahn moa nalij bowt Gaad, yu fayt wahn geh schranga tu. Ih wahn help yu fi du tingz weh Gaad waahn, ahn mek hihn hapi. (Heebrooz 11:​1, 6) Fayt wahn mek yu tek akshan ahn ripent, ahn chaynj yu laif fi di beta. Reed Aks 3:19.

2. How yu ku help ada peepl wid weh yu laan?

Yoo ku ga wahn speshal rilayshanship wid Jehoava

Ih onli nachral fi mek yu waahn shayr weh yu di laan wid ada peepl, kaaz wi laik tel gud nyooz. Az yu kantinyu yu Baibl stodi, yu wahn laan how fi yooz di Baibl fi eksplayn yu fayt eena Jehoava ahn di gud nyooz. Reed Roamanz 10:13-15.

Moas peepl staat shayr di gud nyooz wid dehn fren er dehn famili. Bot memba, yu fi du dis eena wahn kain way. Insteda seh dat dehn rilijan noh karek, yu ku tel dehn bowt di pramis dehn weh Gaad mek. Lang wid dat, memba dat yu akshanz speek lowda dan yu werdz. Reed 2 Timoti 2:​24, 25.

3. Weh kaina rilayshanship wid Gaad yu ku injai?

Wen yu kip aan di stodi di Baibl, yu wahn groa eena wahn spirichwal way. Afta wahn wail, yu wahn ga wahn speshal ­rilayshanship wid Jehoava. Now yu ku reeli bilangz tu hihn az paat a fi hihn famili. Reed 2 Korintyanz 6:18.

 4. How yu ku kantinyu moov faawod?

Yu ku kip aan di moov faawod eena wahn spirichwal way if yu kantinyu yu Baibl stodi. (Heebrooz 5:​13, 14) Aks wan a Jehoava Witnisiz fi stodi di Baibl wid yu owta di buk What Does the Bible Really Teach? Di moa yu laan fahn di Baibl, di beta yu laif wahn bee. Reed Roamanz 12:2; 1 Timoti 4:​15,16.

Jehoava da di hapi Gaad, ahn di gud nyooz kohn fahn hihn. Yu ku geh kloasa tu hihn wen yu wership tugeda wid fi hihn peepl. (Heebrooz 10:​24, 25) Wen yu kip aan di chrai haad fi du weh Jehoava waahn yu du, yu di shoa dat yu waahn di chroo chroo laif, weh da evalastin laif. Fi geh kloas tu Gaad da reeli di bes ting yu ku eva du. Reed 1 Timoti 1:​11; 6:​19.