Skip tu di aatikl

Skip tu di ada menyoo

Skip tu lis a tapik

Jehoava Witnisiz

Bileez Kriol

Gud Nyooz Fahn Gaad!

 LESN 4

Hoo Da Jeezas Krais?

Hoo Da Jeezas Krais?

1. How Jeezas laif mi staat?

Wai ih mi eezi fi taak tu Jeezas ahn deh rong ahn?—MACHYU 11:29; MAAK 10:13-16.

Bifoa Jeezas mi baan pahn di ert, ih mi liv da hevn az wahn spirit persn. (Jan 8:23) Hihn da di fos wan weh Gaad mek, den ih help mek evriting els. Bikaaz hihn da di onli wan weh Jehoava mek bai ihself, di Baibl kaal ahn ‘Gaad wan ahn onli Son.’ (Jan 1:14) Jeezas da-mi di mayn mesinja fi Gaad, soh di Baibl kaal ahn “di Werd.”​—Reed Proverbs 8:22, 23, 30; Koloashanz 1:15, 16.

2. Wai Jeezas mi kohn pahn di ert?

Gaad tek di laif weh Jeezas mi ga da hevn ahn put it eena di oom a wahn Jooish verjin naym Mayri. Soh hihn neva ga wahn hyooman pa. (Look 1:30-35) Jeezas mi kohn da ert (1) fi teech di chroot bowt Gaad, (2) fi shoa wi how fi du di wil a Gaad eevn wen wi di goh chroo haad taim, ahn (3) “fi giv op fi hihn laif” az wahn ransom.​—Reed Machyu 20:28.

3. Wai wi need wahn ransom?

Wahn ransom da di prais weh yu pay fi sayv sohnbadi fahn det. (Exodus 21:29, 30) Wen Gaad mek wi, ih neva mek wi fi geh oal ahn ded. How wi noa dat? Gaad mi tel di fos man, Adam, dat if ih mi sin, ih mi wahn ded. Soh if hihn neva sin, ih neva mi wahn ded. (Genesis 2:16, 17; 5:5) Akaadn tu di Baibl, det “kom eena” di werl sayka Adam. Soh den, da sayka hihn aala wi sin ahn ded. Wi need wahn ransom fi set wi free fahn di det weh wi inherit fahn Adam.​—Reed Roamanz 5:12; 6:23.

 Hoo ku pay di ransom fi set wi free fahn det? Wen wi ded, wi onli pay di prais fi wi oan sin dehn. No ada sina kyaahn pay fi sohnbadi els sin.​—Reed Roamanz 3:23.

4. Wai Jeezas mi ded fi wi?

Jeezas da noh laik wee, hihn mi perfek; hihn neva sin. Soh wen hihn ded, da-mi fi pay fi evribadi els sin. Gaad shoa dat hihn reeli reeli lov wi wen ih sen ih Son fi ded fi wi. Jeezas mi shoa ih lov wi tu, bikaaz hihn obay ih Pa ahn giv op ih laif fi aala wi sin dehn.​—Reed Roamanz 5:18, 19; 1 Jan 4:9, 10.

5. Weh Jeezas di du rait now?

Wen Jeezas mi deh pahn di ert, hihn mi kyoar sik peepl ahn bring bak tu laif som weh mi ded. Hihn eevn mi reskyu som weh mi deh eena daynja. Aala dis da-mi fi shoa wi weh hihn wahn du eena di fyoocha fi evribadi weh obeedyant tu hihn. (Machyu 15:30, 31; Jan 5:28) Afta Jeezas mi ded, Gaad mi bring ahn bak tu laif az wahn spirit persn. (1 Peeta 3:18) Den Jeezas wayt bai di rait han said a Jehoava til Hihn gi ahn di powa fi rool az King oava di hoal ert. (Heebrooz 10:12, 13) Now Jeezas di rool az King eena hevn, ahn fi hihn falowaz di preech datdeh gud nyooz aal oava di werl.​—Reed Machyu 24:14; Revilayshan 11:15.

Soon, Jeezas wahn yooz di powa weh ih gat az King fi geh rid a sofarin ahn aal dehn wan weh kaaz it. Evribadi weh obay Jeezas bikaaz dehn ga fayt eena ahn, wahn injai laif eena paradais pahn di ert.​—Reed Machyu 5:5.