Skip tu di aatikl

Skip tu di ada menyoo

Skip tu lis a tapik

Jehoava Witnisiz

Bileez Kriol

Gud Nyooz Fahn Gaad!

 LESN 11

How di Prinsipl Dehn Eena di Baibl Ku Help Wi?

How di Prinsipl Dehn Eena di Baibl Ku Help Wi?

1. Da wai wi need gaidans?

How Baibl prinsipl ku help wi fi bee sayf? —PSALM 36:9.

Fi wee Kriyayta waiza dan aala wi. Hihn da wahn lovin Faada weh kay bowt wi, ahn hihn mek wi fi pen pan ahn noh pahn wi oanself. (Jeremiah 10:23) Di sayhn way how wahn lee pikni need gaidans fahn ih mami ahn dadi, aala wi need gaidans fahn Gaad. (Isaiah 48:17, 18) Di prinsipl dehn eena di Baibl da wahn gif fahn Gaad fi gaid wi.​—Reed 2 Timoti 3:16.

Di laa ahn prinsipl dehn fahn Jehoava teech wi di bes way how fi liv now, ahn how wi ku geh blesin weh wahn laas fareva eena di fyoocha. Wi shuda bee hapi ahn graytful fi di gaidans weh Gaad gi wi, kaa da hihn mek wi. ​—Reed Roamanz 15:4; Revilayshan 4:11.

2. Wat da wahn Baibl prinsipl?

Wahn Baibl prinsipl da wahn baysik chroot weh noh chaynj. Da noh laik wahn laa, weh ku bee fi jos wan sichuwayshan. (Aks 15:29) Wi need fi reeli tink haad fi chrai andastan how wi ku yooz wahn Baibl prinsipl wen sohnting kom op. (Proverbs 2:10-12) Az wahn egzampl, di Baibl teech wi dat laif da wahn gif fahn Gaad. Da baysik prinsipl ku gaid wi wen wi deh da werk, deh hoam, er di chravl sohnweh. Dis wahn mek wi tek akshan soh wi noh hert wiself er ada peepl, ahn wi noh wahn put wiself er nobadi els eena daynja.​—Reed Aks 17:28.

3. Wat da di too moas impoatant prinsipl?

Jeezas mi taak bowt too prinsipl weh veri impoatant. Di fos wan di shoa wi dat di reezn wai  wi deh ya, da fi laan bowt Gaad, fi lov hihn, ahn fi serv hihn eena wahn faytful way. Wi shuda tink bowt dis fos prinsipl wen wi hafu mek eni disizhan. (Proverbs 3:6) Dehn wan weh tek dis prinsipl tu haat wahn bee hapi fi chroo, dehn wahn bee frenz wid Gaad, ahn dehn wahn liv fareva.​—Reed Machyu 22:36-38.

Di sekant prinsipl ku gaid wi fi ga lov ahn liv eena pees wid wan anada. (1 Korintyanz 13:4-7) Fi du dis meen dat wi wahn hafu kapi how Gaad chreet peepl.​—Reed Machyu 7:12; 22:39, 40.

4. How di prinsipl dehn eena di Baibl ku help wi?

Di prinsipl dehn eena di Baibl help di famili fi stay tugeda ahn lov wan anada. (Koloashanz 3:12-14) Di Baibl seh dat marij fi laas wahn laiftaim. Dis da wahn prinsipl weh ku gaid ahn protek di famili.​—Reed Maak 10:7-9.

Wen wi fala di teechinz eena di Baibl, wi wahn bee moa pazitiv eena laif ahn wi wahn ku tek kyaa a di tingz weh wi need. Az wahn egzampl, dehn wan weh haiya peepl fi werk, luk fi peepl weh fala Baibl prinsipl bowt how fi werk haad ahn bee aanis. (Proverbs 10:4, 26; Heebrooz 13:18) Di Baibl teech wi fi bee kantentid wid di baysik needz a laif, ahn dat ih moa impoatant fi bee fren wid Gaad dan fi put ada tingz fos.​—Reed Machyu 6:24, 25, 33; 1 Timoti 6:8-10.

Wen wi liv bai di prinsipl dehn eena di Baibl, ih ku protek wi helt. (Proverbs 14:30; 22:24, 25) Az wahn egzampl, if wi stik tu Gaad laa fi noh bee wahn jronkad, ih ku protek wi fahn siknis weh kud kil wi ahn ih ku protek wi fahn get eena aksident. (Roamanz 13:13) Jehoava noh seh yu kyaahn tek wahn jrink, bot yu noh fi oava du it. (Psalm 104:15; 1 Korintyanz 6:10) Di prinsipl dehn eena di Baibl help wi kaaz dehn teech wi fi noh onli wach weh wi du, bot fi bee kyaaful weh wi tink bowt. (Psalm 119:97-100) Howeva, chroo Kristyanz rispek Gaad laa ahn prinsipl bikaaz dehn waahn aana Jehoava, ahn noh jos bikaaz dehn waahn help dehnself.​—Reed Machyu 5:14-16.