1. Weh kaina pees Filipiyanz 4:6, 7 taak bowt, ahn how wee ku benifit fan it?

 DEHN ga wahn kaina pees eena dis werl weh peepl noh noa bowt. Da di kaina pees weh kohn fahn Gaad, an ih mek wi feel kaam bikaaz wi ga wahn kloas frenship wid wi Pa, Jehoava. Wen wi ga di pees weh Gaad gi wi, wi feel sayf. (Reed Filipiyanz 4:6, 7.) Wi feel hapi fi spen taim wid adaz weh noa Jehoava. Ahn wi hapi fi ga wahn kloas frenship wid “di Gaad weh gi pees.” (1 Tes. 5:23) Wen wi chros an obay Jehoava ahn ga wahn kloas frenship wid ahn, hihn gi wi wahn pees weh mek wi feel kaam wen wi schres owt ahn wen wi di goh chroo wahn tof sichuwayshan.

2. Wai wi ku seh dat ih pasabl fi ga di pees weh Gaad giv?

² Yu tink ih pasabl fi geh di pees weh Gaad gi wi wen wi di fays wahn seeryos prablem laik wahn dizaasta, waar, persikyooshan, er wahn dizeez weh di spred? Dehnya prablem ku mek wi feel frayd. Bot Jeezas mi tel ih falowaz: “Noh wori ner bee frayd.” (Jan 14:27) Wi hapi dat wahn lata bradaz ahn sistaz fala weh Jeezas mi seh. Ahn bikaaz a dat, dehn geh di pees weh Jehoava gi dehn wen dehn mi-di fays sohn seeryos prablem.

3. How wahn dizeez weh di spred aal oava ku tek weh wi pees?

³ Wen wahn dizeez spred aal chroo wahn ayrya er eevn aal oava di werl, laik di COVID-19 pandemik, ih ku reeli chaynj wi laif. Soh mek wi taak bowt how COVID-19 afek wahn lata wi. Wahn stodi shoa dat joorin di pandemik  wahn lata peepl ga chrobl di sleep. Bikaaz a dis dizeez wahn lata peepl staat tu geh schres owt ahn feel dipres, ahn dehn staat tu jrink wahn lat er yooz jrogz, an eevn di vailens eena di famili gaan op. An ih geh soh bad dat peepl eevn chrai kil dehnself. How yoo ku stay kaam ahn injai di pees weh Gaad giv eevn wen wahn dizeez di spred eena di ayrya wehpaat yu liv?

4. Wai ih impoatant fi noa Jeezas prafesi bowt di laas dayz, ahn how dat ku help wi fi ga pees?

⁴ Jeezas mi seh dat joorin di laas dayz dehn wahn ga aal kaina dizeez di spred “aal oava di plays.” (Look 21:11) How dis prafesi ku help wi kip kaam? Bikaaz Jeezas mi waan wi dat dehnya tingz mi wahn hapm. Dehnya dizeez weh di spred aal oava da noh notn nyoo fi wi. Soh wi need fi fala di advais weh Jeezas gi wen hihn mi seh: “Si dat unu noh geh fraitn.”—Mach. 24:6.

5. (a) Akaadn tu weh Filipiyanz 4:8, 9 seh, weh wi shuda pray fa wail wi di fays wahn dizeez weh di spred aal oava? (b) How yu ku benifit wen yu lisn tu wahn Baibl rikaadn?

⁵ Wen wahn dizeez di spred faas, ih ku mek wi staat tu wori ahn geh fraitn. Dat da weh mi hapm tu wahn sista weh naym Desi. b Afta fi shee onkl, kozn, ahn dakta ded fahn COVID-19, shee mi frayd dat shee wuda mi kech di vairos ahn giv it tu ih ma, weh mi oal. Aalso bikaaz a di pandemik, shee mi frayd dat ih wuda looz ih jab. Shee mi-di wori how ih mi wahn pay ih bilz ahn feed ih famili. Shee mi soh schres owt dat ih mi kyaahn sleep da nait. How Desi mi geh bak ih pees? Wen shee pray tu Jehoava, shee mi spesifik bowt weh ih mi-di pray fa, an ih mi aks Jehoava fi giv ahn wahn kaam haat ahn fi help ahn ga wahn pazitiv atichood. (Reed Filipiyanz 4:8, 9.) Wen shee lisn tu di Baibl rikaadn, da laik if Jehoava mi-di taak tu ahn. Dis da weh Desi seh: “Wen Ah hyaa di reeda vais, ih mek Ah feel kaam an ih rimain mi dat Jehoava kay bowt mi.”—Ps. 94:19.

6. How meetin ahn persnal stodi ku help yu?

⁶ Wen wahn dizeez spred aal oava, ih ku mek it haad fi du di tingz weh wi yoozhwali du, bot noh mek dat stap yu fahn reed di Baibl ahn goh da meetin. Di reel-laif egzamplz weh wi fain eena wi poblikayshan ahn veedyo dehn rimain wi dat wi bradaz ahn sistaz stay faytful tu Jehoava eevn doa dehn di goh chroo simila chalenjiz. (1 Peet. 5:9) Wi meetin dehn ku help wi fi tink bowt inkorijin tingz fahn di Baibl, ahn dehn aalso gi wi di chaans fi inkorij wan anada.  (Roam. 1:11, 12) Wen yu tink bowt how Jehoava di sopoat ih faytful servants wen dehn sik, feel frayd, er loanli, yu wahn ku bee shoar dat hihn wahn dehdeh fi help yu noh mata wat.

7. Weh wi ku laan fahn di apasl Jan?

⁷ Du yu bes fi kip in toch wid yu bradaz ahn sistaz. Wen wahn dizeez di spred, wi mait haftu kip wi distans eevn wen wi deh monks wi bradaz ahn sistaz. Wen dat hapm, wi mait feel laik how di apasl Jan mi feel. Hihn mi reeli waahn si ih fren Gaiyos fays-tu-fays. (3 Jan 13, 14) Stilyet, Jan mi andastan dat ih mi wahn kyaahn si Gaiyos, soh Jan mi du weh ih kud ahn rait Gaiyos wahn leta. If yu kyaahn vizit yu bradaz ahn sistaz in persn, chrai fi kantak dehn chroo veedyo kaal, foan kaal, er teks mesij. Wen wi kip in toch wid wi bradaz, wi wahn feel kaam ahn wi noh wahn feel loanli. If yu feel laik yu di wori tu moch, kaal di eldaz ahn tel dehn how yu feel, an aksep di lovin inkorijment weh dehn gi yu.—Isa. 32:1, 2.

8. How wahn dizaasta ku tek weh yu pees?

⁸ Yu eva gaahn chroo wahn flod, ertkwayk, er faiya? Dat mosi mi mek yu feel schres owt fi wahn lang taim. Maybi sohnbadi weh yu lov ded, er yu hows ahn di tingz weh yu oan geh dischrai. Ahn bikaaz a dat, yu mosi mi feel sad, geh beks, er eevn looz hoap. Eevn doa yu mi-di feel da way, dat noh meenz dat yu lov moni er noh ga fayt. Peepl mait ekspek yu fi goh aan bad wen yu goh chroo wahn tof sichuwayshan. (Job 1:11) Bot eevn if yu goh chroo tof sichuwayshanz, yu ku ga pees. How dat pasabl?

9. Weh Jeezas mi seh fi pripyaa wi fi wen wi goh chroo wahn dizaasta?

⁹ Memba weh Jeezas mi prafesai. Sohn peepl tink dat wahn dizaasta wuda neva afek dehn. Bot wee noa dat dehnya tingz wahn geh wers, ahn sohntaim dehn wahn afek wi. Jeezas mi tel ih falowaz dat “big ertkwayk” an ada dizaasta mi wahn hapm bifoa di en kohn. (Look 21:11) Jeezas mi aalso seh dat wahn lata “wikidnis wahn deh,” ahn wi si dis tudeh wid aal weh di goh aan, laik kraim, vailens, ahn teroris atak. (Mach. 24:12) Jeezas neva seh dat dehndeh ting onli mi wahn hapm tu peepl weh noh serv Jehoava. In fak, wahn lata Jehoava faytful servant don gaahn chroo wahn dizaasta. (Isa. 57:1; 2 Kor. 11:25) Jehoava noh wahn du wahn mirakl fi protek wi fahn evri dizaasta weh hapm, bot hihn wahn gi wi weh wi need fi stay kaam ahn ga pees.

10. How Proverbs 22:3 help wi fi si dat wi di shoa fayt wen wi pripyaa fi wahn dizaasta?

¹⁰ Wen wi pripyaa heda taim fi wahn imerjensi, ih help wi stay kaam. Bot yu tink wen wi pripyaa heda taim ih shoa dat wi noh ga fayt eena Jehoava? No, non ataal! Wen wi pripyaa fi wahn dizaasta, ih akchwali shoa dat wi ga fayt dat Jehoava wahn tek kayr a wi. How hihn du dat? Di Baibl gi wi advais fi pripyaa fi wahn dizaasta. (Reed Proverbs 22:3.) c Jehoava aaganaizayshan tel wi oava ahn oava chroo difrent aatikl, kangrigayshan meetin, an anonksments fi pripyaa fi eni imerjensi weh mait kom op. d Yoo chros  eena Jehoava? If yu chros ahn, den yu wahn fala di advais weh hihn di gi yu now, bifoa wahn dizaasta hapm.

11. Weh yu ku laan fahn Margaret egzampl?

¹¹ Mek wi luk pahn di egzampl a wahn sista weh naym Margaret. Di govament mi aada shee fi lef ih hows bikaaz wahn wail faiya brok owt eena di ayrya weh shee liv. Bikaaz wahn lata peepl mi-di chrai lef da saym taim, dehn mi ga wahn lata kaar pahn di road ahn dehn mi stok eena chrafik. Eena di ayaa dehn mi ga wahn tik blak smoak, ahn sayka dat Margaret mi kyaahn get owta ih kaar. Bot bikaaz Margaret mi pripyaa heda taim, shee mi servaiv. Ih mi ga wahn map eena ih pers weh ih kuda mi yooz fi fain wahn nada road fi get owta da ayrya. Shee mi eevn jraiv dong da road heda taim soh dat ih kuda mi fala it if wahn imerjensi mi hapm. Bikaaz Margaret mi pripyaa gud, shee mi sayv ihself.

12. Wai wi shuda fala di inschrokshanz weh dehn gi wi fi stay sayf?

¹² Fi protek wiself an adaz, di govament mait aks wi fi obay wahn kerfyoo, lef di ayrya wehpaat wi deh, er fala ada inschrokshanz weh dehn gi wi. Sohn peepl mait tink haad fi obay dehndeh inschrokshanz bikaaz dehn noh waahn lef di tingz weh dehn oan. Bot az Kristyanz, weh wee shuda du? Di Baibl seh: “Du weh di Laad waahn yu du ahn put yuself anda di koman a evribadi weh ga atariti, noh kay if da tu wahn king bikaaz hihn haiya dan yoo, er tu di govna dehn weh di king mi chooz.” (1 Peet. 2:13, 14) Gaad aaganaizayshan gi wi inschrokshanz fi kip wi sayf. Dehn kip di rimain wi fi giv di eldaz wi kantak infamayshan soh dat dehn ku noa wehpaat wi deh joorin wahn imerjensi. Yoo don du dat? Wi mait aalso geh inschrokshanz fi eeda stay er lef fahn wehpaat wi deh, ahn fi geh di tingz weh wi need. Er wi mait eevn geh dairekshan pahn how er wen fi help adaz. If wi noh obay di inschrokshanz weh dehn gi wi, den wi ku put wi laif ahn di laif a di eldaz eena daynja. Memba dat di eldaz dehdeh fi tek kayr a wi. (Heeb. 13:17) Margaret mi seh, “Ai reeli bileev dat bikaaz Ah mi fala di dairekshan fahn di eldaz ahn di aaganaizayshan, da dat mi sayv mi laif.”

13. How di bradaz weh mi haftu lef dehn hows mi ga pees ahn jai?

 ¹³ Wahn lata bradaz ahn sistaz mi haftu lef dehn hows bikaaz a dizaasta er waar. Soh dehn mi haftu du dehn bes fi adap tu dehn nyoo sichuwayshan ahn du moa eena dehn servis tu Jehoava. Dehn kantinyu “preech di gud nyooz a di werd a Gaad,” jos laik di erli Kristyanz weh mi skyata bowt bikaaz a persikyooshan. (Aks 8:4) Wen dehn preech, dat help dehn fi stay foakos pahn di Kingdom insteda foakos pahn weh dehn di goh chroo. Sayka dat, dehn aalwayz hapi ahn ga pees.

14. How persikyooshan ku tek weh wi pees?

¹⁴ Persikyooshan ku tek weh wahn lata tingz weh naamali wuda mek wi feel kaam. Wi feel hapi wen wi meet tugeda, preech di gud nyooz, ahn du tingz weh wi naamali du widowt haftu frayd dat dehn wahn ares wi. If wi kyaahn du dehndeh tingz, wi mait staat tu wori ahn feel frayd fi weh ku hapm. Ih noh rang fi mek wi feel da way, bot wi need fi bee kyaaful. Jeezas mi seh dat persikyooshan ku mek ih falowaz stombl. (Jan 16:1, 2) Soh how wi ku kip wi pees eevn wen wi di fays persikyooshan?

15. How Jan 15:20 ahn 16:33 ku help wi fi noh bee frayd fi persikyooshan?

¹⁵ Di Baibl seh: “Evribadi weh waahn wership Gaad wid aala dehn haat az wahn disaipl a Krais Jeezas wahn fays persikyooshan.” (2 Tim. 3:12) Wahn brada weh naym Andrei mi fain it haad fi aksep dat di preechin werk mi geh ban eena fi hihn konchri. Ih mi tink tu ihself: ‘Dehn ga wahn lata Witnisiz weh liv ya. How dehn wahn ares aala wi?ʼ Bot hihn mi-di wori aal di taim, ahn sayka dat ih neva feel kaam. Dehn mi ga ada bradaz weh mi chros eena Jehoava, ahn dehn neva tink dat dehn neva mi wahn ares dehn. Eevn doa dehn mi noa dat polees kuda mi ares dehn, dehn neva di wori az moch az Andrei. Soh hihn mi mek op ih main fi kapi dehn atichood ahn put aala ih chros eena Jehoava. Dis mi mek ih ga pees, ahn now hihn hapi eevn doa ih stil di fays chalenjiz.  Wee ku du di saym. Jeezas mi seh dat wi mi wahn fays persikyooshan, bot ih mek wi noa dat wi ku stay faytful tu.—Reed Jan 15:20; 16:33.

16. Weh inschrokshanz wi need fi obay wen wi di goh chroo persikyooshan?

¹⁶ Wen di preechin werk deh anda ban, er dehn stap wi fahn du sertn tingz, wi mait get inschrokshanz fahn di branch aafis ahn di eldaz. Dehndeh inschrokshanz da fi protek wi, fi mek shoar dat wi kip di geh spirichwal food, ahn fi help wi kantinyu preech az moch az wi kud. Du aal weh yu kud fi obay di dairekshan weh wi geh chroo Jehoava aaganaizayshan, eevn if yu noh reeli andastan wai dehn giv it. (Jay. 3:17) Soh ih impoatant fi noh giv peepl infamayshan bowt wi bradaz ahn sistaz er bowt weh wi kangrigayshan di du if dehn noh bizniz fi noa.—Eccl. 3:7.

17. Jos laik di apasl dehn eena di fers senchri, weh wi mek op wi main fi du?

¹⁷ Wan a di mayn reezn wai Saytan di waar gens Jehoava peepl da bikaaz dehn “taak di chroot bowt Jeezas.” (Rev. 12:17) Noh mek Saytan an ih werl fraitn yu. Wen wi preech ahn teech eevn wen wi di goh chroo persikyooshan, dat help wi fi ga pees ahn bee hapi. Wen di Jooz eena di fers senchri mi aada di apasl dehn fi stap preech, dehndeh faytful man mi chooz fi obay Jehoava. Dehn mi kantinyu preech, ahn dat mi mek dehn hapi. (Aks 5:27-29, 41, 42) Wen wi preechin werk deh anda ban, wi need fi bee kyaaful wen wi di preech. (Mach. 10:16) Wi geh pees if wi du aal weh wi kud fi pleez Jehoava ahn fi shayr di Baibl mesij wid adaz.

18. Fahn hoo wi ku geh chroo chroo pees?

¹⁸ Wee shoar dat eevn wen wi goh chroo haad taimz, wi ku ga pees. Eena dehndeh taimz, wi need fi memba dat di pees weh wi need da di pees weh kohn fahn Gaad, ahn dat da di pees weh onli Jehoava ku gi wi. Pen pahn Jehoava wen yu fays wahn dizaasta, persikyooshan, er wahn dizeez weh spred. Stay kloas tu Jehoava aaganaizayshan. Luk faawod tu di byootiful fyoocha weh deh heda yu. Wail yu du dat, “di Gaad a pees wahn deh wid [yu].” (Fil. 4:9) Eena di neks aatikl, wi wahn taak bowt how wi ku help wi bradaz ahn sistaz weh di goh chroo wahn tof sichuwayshan fi ga di pees weh kohn fahn Gaad.