1. How wi benifit wen wi meditayt pahn di pramis a evalastin laif weh Jehoava gi wi?

 JEHOAVA pramis dat dehn wan weh obay ahn wahn geh “evalastin laif.” (Roam. 6:23) Wen wi meditayt pahn dis wandaful pramis, wi lov fi Jehoava geh schranga. Tink bowt dis: Wi hevnli Faada lov wi soh moch dat notn wahn separayt wi fan ahn.

2. How di pramis a evalastin laif ku help wi?

² Di pramis a evalastin laif weh Gaad gi wi ku help wi fi noh giv op wen wi di goh chroo chraiyalz. Eevn if wi enimi dehn chretn fi kil wi, wi noh wahn stap serv Jehoava. Wai? Wan reezn da bikaaz wee noa dat if wi ded az wahn faytful servant a Jehoava, hihn wahn bring wi bak tu laif ahn wi wahn ga di hoap fi neva ded agen. (Jan 5:28, 29; 1 Kor. 15:55-58; Heeb. 2:15) Wai wi ku bee shoar dat wee kud liv fareva? Mek wi kansida sohn reezn wai wi chros dis.

3. How wi noa fi shoar dat Jehoava ku mek wi liv fareva? (Psalm 102:12, 24, 27)

³ Wee noa dat Jehoava ku mek wi liv fareva bikaaz hihn “da di wan weh laif kohn fram” ahn hihn liv fareva. (Ps. 36:9) Mek wi luk pahn sohn Baibl vers weh proov dat Jehoava mi aalwayz egzis an ih wahn aalwayz egzis. Psalm 90:2 seh dat Jehoava egzis “fahn fareva eena di paas tu fareva eena di fyoocha.” Ahn Psalm 102 seh sohnting simila.  (Reed Psalm 102:12, 24, 27.) b Ahn dis da weh di prafit Habakok mi seh bowt wi hevnli Faada: “Oa Jehoava, yoo noh ga no biginin. Oa mai Gaad, mi Hoali Wan, yoo wahn neva ded.”—Hab. 1:12.

4. Wai wi shudn wori if wi fain it haad fi andastan dat Jehoava aalwayz egzis?

⁴ Yoo fain it haad fi andastan dat Jehoava da Gaad “fi fareva an eva”? (Isa. 40:28) Lata peepl fain dat haad fi andastan tu. In fak, dis da weh Ilaihyu mi seh bowt Gaad: “Nobadi ku konk humoch yaaz hihn don liv.” (Job 36:26) Bot jos bikaaz wi noh andastan sohnting, dat noh meenz dat da wahn lai. Fi egzampl, wi mait noh andastan evriting bowt how elekchrisiti werk. Bot yu tink dat meenz dat ih noh egzis? Non ataal! Saym way soh, wi mait neva reeli andastan how Jehoava mi aalwayz egzis ahn wahn aalwayz egzis. Bot dat noh meen dat Gaad noh liv fareva. (Roam. 11:33-36) Hihn mi egzis lang bifoa eniting eena di yoonivers mi egzis, laik di son ahn di staarz. Wee ku chros dat Jehoava da di Wan “weh mek di ert wid ih powa” ahn hihn mi egzis bifoa ih “spred owt hevn laik wahn klaat.” (Jer. 51:15; Aks 17:24) Wat da wahn nada reezn weh shoa dat ih pasabl fi liv fareva?

5. Weh hoap di fers hyooman kopl mi gat?

⁵ Owta evriting weh Jehoava mek pahn ert, onli hyoomanz neva mi fi ded az taim paas. Onli hyoomanz ga di speshal hoap fi liv fareva. Bot, Gaad mi waan Adam: “Yu noh fi eet fahn di chree weh mek yu noa weh gud ahn weh bad, bikaaz di day yu eet fan it, fi shoar yu wahn ded.” (Gen. 2:17) If Adam ahn Eev mi onli obay Jehoava, dehn neva mi wahn ded. Ih mek sens fi bileev dat laytaraan Jehoava wuda alow dehn fi eet fahn “di chree a laif.” Dis mi wahn mek dehn bee shoar dat Jehoava mi wahn mek dehn “liv fareva.” c​—Gen. 3:22.

6-7. (a) Weh ada proof wi ga dat Jehoava neva mek wi fi ded? (b) Weh yoo di luk faawod fi du wen yu geh evalastin laif? (Koment pahn di picha.)

⁶ Ih veri inchrestin dat sohn saiyentis fain evidens weh proov dat wi brayn ku stoar wahn lat moa infamayshan dan weh wi ku laan joorin wi hoal laif rait  now. Eena 2010, di Scientific American Mind magazeen seh dat akaadn tu sohn kalkyulayshanz, wi brayn ku stoar op tu bowt 2.5 milyan gigabaits a infamayshan. Dat da di saym amonk a infamayshan az chree milyan owaz er oava 300 yaaz a TV proagram. An ih ku bee dat wi brayn ku stoar op wahn lat moa infamayshan dan dat. Dis shoa wi dat Jehoava mek wi brayn fi stoar op lat moa infamayshan dan weh wi kuda laan eena jos 70 er 80 yaaz.—Ps. 90:10.

⁷ Jehoava aalso gi hyoomanz di schrang dizaiya fi liv fareva. Di Baibl seh dat Hihn “put eena dehn haat di dizaiya fi liv fareva.” (Eccl. 3:11) Dat da wan a di reezn wai wi si det az wahn enimi. (1 Kor. 15:26) If wi wuda geh sik bad, wi wuda jos giv op ahn wayt fi ded? No, noh chroo? Yoozhwali, wi wuda goh da dakta ahn tek di medisn weh ih gi wi fi fait di siknis. In fak, wi wuda du evriting weh wi kud soh dat wi noh ded. Ahn wen sohnbadi weh wi lov ded, weda ih yong er oal, wi stil feel sad fi wahn lang taim. (Jan 11:32, 33) Sins wi lovin Kriyayta mek wi fi kip aan di liv, hihn wuda neva gi wi da dizaiya an abiliti if dat da neva ih perpos. Wi ga lat moa reezn wai wi ku bileev dat wi ku liv fareva. Mek wi diskos weh Jehoava don du ahn weh ih di du now weh proov dat fi hihn perpos fi hyoomanz noh chaynj.

8. Weh Isaiah 55:11 teech wi bowt Jehoava perpos fi wi?

⁸ Eevn doa Adam ahn Eev mi sin ahn bikaaz a dat aala dehn chiljren inherit det, Jehoava perpos fi wee neva  chaynj. (Reed Isaiah 55:11.) d Jehoava stil waahn mek dehn wan weh stay faytful tu hihn liv fareva. How wi noa dat? Wi ku seeʼt eena di tingz weh ih seh ahn du fi mek ih perpos dehn kohn chroo.

9. Weh Gaad pramis? (Daniel 12:2, 13)

⁹ Jehoava pramis dat hihn wahn rezorek di ded ahn gi dehn di apachooniti fi liv fareva. (Aks 24:15; Taitos 1:1, 2) Joab, hoo da-mi wahn faytful servant a Gaad, mi noa dat Jehoava mi reeli waahn bring bak dehn wan weh don ded. (Job 14:14, 15) Di prafit Danyel mi noa dat hyoomanz mi wahn geh rezorek ahn ga di apachooniti fi liv fareva. (Ps. 37:29; reed Daniel 12:2, 13.) e Di Jooz weh mi liv eena Jeezas taim mi noa dat Jehoava ga di powa fi giv ih servant dehn “evalastin laif.” (Look 10:25; 18:18) Jeezas mi taak bowt dis pramis wahn lat, ahn fi hihn Pa mi eevn bring hihn bak tu laif.—Mach. 19:29; 22:31, 32; Look 18:30; Jan 11:25.

10. Weh di rezorekshan dehn eena di paas teech wi? (Koment pahn di picha.)

¹⁰ Jehoava da di Wan weh mek wi ga laif ahn hihn ga di powa fi bring peepl bak tu laif. Hihn mi gi di prafit Ilaija di powa fi rezorek di son a di wido fahn Zarefat. (1 Ki. 17:21-23) Laytaraan, wid Gaad help, di prafit Ilaisha mi rezorek di son a wahn Shoonamait laydi. (2 Ki. 4:18-20, 34-37) Dehndeh rezorekshan an ada rezorekshan weh mi hapm proov dat Jehoava ga di powa fi bring peepl bak tu laif. Wen Jeezas mi deh pahn ert, hihn mi proov dat ih Pa mi giv ahn da saym powa. (Jan 11:23-25, 43, 44) Now Jeezas deh da hevn ahn Gaad giv ahn “aal atariti da hevn ahn pahn di ert.” Soh hihn ku mek di pramis kohn chroo weh seh dat “aala di wan dehn weh deh eena di toom dehn” wahn kohn bak tu laif wid di hoap fi liv fareva.—Mach. 28:18; Jan 5:25-29.

11. How di ransom sakrifais mek it pasabl fi mek wi ku liv fareva?

¹¹ Wai Jehoava mi alow ih Son weh ih mi lov soh moch fi sofa wahn terabl det? Jeezas mi ansa da kweschan wen ih mi seh: “Gaad lov di werl soh moch dat ih giv ih onli Son, soh dat evribadi weh shoa fayt eena ahn noh wahn geh dischrai bot wahn liv fareva.” (Jan 3:16) Bikaaz Gaad mi giv ih Son az wahn ransom fi wi sin dehn, wi ku geh evalastin laif. (Mach. 20:28) Di apasl Paal mi eksplayn dis impoatant paat a Gaad perpos fi hyoomanz wen ih seh: “Sins det kohn chroo wan man, saym way soh, rezorekshan a di ded kohn chroo wan man. Jos laik how evribadi di ded sayka Adam, saym way soh, evribadi wahn liv sayka Krais.”—1 Kor. 15:21, 22.

12. How Gaad wahn mek ih perpos kohn chroo?

¹² Jeezas mi teech ih servants fi pray fi mek Gaad Kingdom kohn ahn fi mek Ih wil tek plays pahn ert. (Mach. 6:9, 10) Paat a Gaad perpos da fi mek hyoomanz liv fareva pahn ert, bot fi du dat, Jehoava put ih Son in chaaj az King a Ih Kingdom. Jehoava di gyada 144,000 peepl fahn ert fi werk lang wid Jeezas soh  dat Fi Hihn perpos kohn chroo.—Rev. 5:9, 10.

13. Weh Jehoava di du now, ahn weh yoo sopoas tu du?

¹³ Jehoava di gyada tugeda “wahn big krowd a peepl” an ih di chrayn dehn fi liv anda di roolaship a ih Kingdom. (Rev. 7:9, 10; Jaymz. 2:8) Eevn doa dis werl divaid op bikaaz a haychrid ahn waar, dehn wan weh da paat a dis big krowd di werk haad fi geh rid a aal kaina haychrid. In ada werdz, da laik dehn di yooz dehn soad fi plow di ert. (Mic. 4:3) Insteda tek paat eena waar weh kaaz lata det, dehn help peepl fain “di reel laif” ahn teech dehn bowt Jehoava ahn fi hihn perpos. (1 Tim. 6:19) Bikaaz dehn sopoat Gaad Kingdom, dehn famili mait ton gens dehn ahn dehn mait eevn sofa bikaaz a moni prablemz. Bot Jehoava wahn mek shoar dat dehn geh weh dehn need. (Mach. 6:25, 30-33; Look 18:29, 30) Aala dis shoa wi dat Gaad Kingdom reel ahn dat ih wahn kantinyu mek Jehoava perpos kohn chroo.

14-15. How di pramis weh Jehoava gi wi fi geh rid a det fareva wahn kohn chroo?

¹⁴ Jeezas da di King a Gaad Kingdom, ahn hihn wahn mek shoar dat aala Gaad pramis dehn kohn chroo. (2 Kor. 1:20)  Sins 1914, Jeezas di ga vikchri oava ih enimi dehn. (Ps. 110:1, 2) Soon, hihn ahn di 144,000 wahn geh rid a aal wikid peepl.—Rev. 6:2.

¹⁵ Joorin Krais Towzn-Yaa Rool, hihn wahn bring bak di ded tu laif ahn help evribadi weh obay Jehoava fi bee perfek. Afta di laas tes, dehn wan weh Jehoava joj az raichos “wahn inherit di ert, ahn dehn wahn liv fareva pan it.” (Ps. 37:10, 11, 29) Wi wahn bee hapi dat “det wahn bee di laas enimi weh wahn geh dischrai.”—1 Kor. 15:26.

16. Weh shuda bee di moas impoatant reezn wai wi serv Jehoava?

¹⁶ Laik weh wi don diskos, fi wee hoap fi liv fareva bays pahn weh wi laan fahn di Baibl. Da hoap ku help wi stay laayal joorin dehnya laas dayz. Bot, if wi waahn mek Jehoava hapi, wi need fi stay laayal tu hihn ahn Jeezas noh jos bikaaz wi waahn sayv wi laif, bot bikaaz wi reeli ahn chrooli lov dehn. (2 Kor. 5:14, 15) Da saym lov da weh moov wi fi kapi dehn ahn fi preech tu adaz bowt di hoap weh wi ga fi di fyoocha. (Roam. 10:13-15) Di moa wi stap bee selfish ahn werk haad fi bee moa jenaros, Jehoava wahn waahn bee wi Fren fareva!—Heeb. 13:16.

17. Bays pahn Machyu 7:13, 14, weh rispansabiliti eech wan a wi gat?

¹⁷ Yu tink wee ku bee monks dehn wan weh wahn geh evalastin laif? Jehoava gi aala wi da apachooniti, soh ih op tu wee if wi waahn stay pahn di road weh leed wi tu evalastin laif. (Reed Machyu 7:13, 14.) Weh laif wahn bee laik wen wi liv fareva? Eena di neks aatikl, wi wahn diskos di ansa tu da kweschan.