No. Bot weh Dayvid mi rait mi karek.

Tink bowt weh hihn mi rait eena da vers an eena sohn ada vers weh simila: “Ah wahn sing prayz tu yu naym fareva az Ah pay mi vow day afta day.” “Ah prayz yoo, Jehoava mi Gaad, wid aala mi haat, an Ah wahn aana yu naym fareva.” “Ah wahn prayz yu naym fareva an eva.”—Ps. 61:8; 86:12; 145:1, 2.

Wen Dayvid mi rait dehndeh werdz, hihn neva mi-di tink dat hihn wahn liv fareva. Hihn mi noa dat Jehoava seh dat wee ded bikaaz a sin, ahn Dayvid mi noa dat hihn da-mi wahn sina. (Gen. 3:3, 17-19; Ps. 51:4, 5) Hihn mi noa dat soon ih mi wahn ded, bikaaz eevn faytful peepl laik Aybraham, Aizak, ahn Jaykop mi ded. (Ps. 37:25; 39:4) Bot Dayvid werdz da Psalm 61:8 shoa dat fi hihn dizaiya da fi prayz Gaad fareva. In ada werdz, fi az lang az ih liv.—2 Sam. 7:12.

Sohntaim Dayvid mi rait bowt tingz weh hihn mi-di goh chroo, ahn wi ku si dat wen wi reed di hedin dehn weh deh tap a Psalms 18, 51, ahn 52. Eena Psalm 23, Dayvid diskraib Jehoava az wahn shepad weh gaid ahn tek gud kayr a ih sheep. Dayvid da-mi wahn shepad jos laik dat. Ahn hihn mi waahn serv Gaad fi ‘az lang az ih liv.ʼ—Ps. 23:6.

Ahn memba dat da Jehoava mek Dayvid rait aala dehnya tingz weh deh eena di Baibl. Som a di tingz weh hihn mi rait bowt da sohn prafesi weh mi wahn kohn chroo laytaraan. Fi egzampl, eena Psalm 110, Dayvid mi rait bowt wahn taim wen fi hihn Laad wuda “sidong pahn [Gaad] rait han said” da hevn ahn geh lata powa. Wid aala da powa, ih mi wahn kanka Gaad enimi dehn ahn “paas jojment pahn di nayshan dehn” pahn ert. Da prafesi da bowt Dayvid disendant, di Mesaiya, di wan hoo wahn rool fahn hevn ahn hoo wuda bee “wahn prees fareva.” (Ps. 110:1-6) Jeezas mi proov dat da prafesi eena Psalm 110 da-mi bowt hihn ahn dat ih mi wahn kohn chroo eena di fyoocha.—Mach. 22:41-45.

Jehoava mi mek Dayvid rait bowt di taim weh hihn mi-di liv eena ahn bowt di fyoocha wen hihn wahn geh rezorek an ih wahn ku prayz Jehoava fareva. Soh how wi shuda andastan Psalm 37:10, 11, 29? Dehndeh vers taak bowt how tingz mi stan eena Izrel joorin Dayvid taim, an ih di taak bowt how tingz wahn stan eena di fyoocha wen aala Gaad pramis dehn kohn chroo.​—Si paragraaf 8 a di aatikl “Yu Wahn Deh Wid Mi Eena Paradais” weh deh eena dis saym magazeen.

Soh Psalm 61:8 an ada simila vers shoa how Dayvid mi waahn prayz Jehoava til ih ded. Ahn dehn aalso shoa weh Dayvid wahn ku du eena di fyoocha wen Jehoava bring ahn bak tu laif.