1. Wat da wan way how Jehoava ku ansa ih servant dehn wen dehn pray tu ahn?

 YOO mi noa dat Jehoava ku yooz yoo fi ansa sohnbadi pryaa? Yoo ku help weda yu da wahn elda, wahn ministeeryal servant, wahn painyaa, er wahn poblisha eena di kangrigayshan. Yoo ku help weda yu yong er oal, er if yu da wahn brada er sista. Wen sohnbadi weh lov Jehoava kaal owt tu hihn fi help, lata taim hihn wuda yooz di eldaz er ada faytful servants fi “gi [dehn] lata komfert.” (Kol. 4:11) Wi reeli hapi wen wi serv Jehoava ahn wi bradaz eena da way. Wi ku help ahn komfert wi bradaz wen wahn dizeez di spred, wen wahn dizaasta hapm, er wen wi fays persikyooshan.

2. Wai ih mait bee haad fi help adaz wen wahn dizeez di spred?

² Wen wahn dizeez di spred, ih ku bee haad fi help owt wan anada. Fi egzampl, wi mait waahn goh vizit wi frenz, bot ih noh sayf fi mek wi goh vizit dehn. Wi mait waahn invait wi frenz weh onli ga lee bit a moni fi kohn eet da wi hows, bot dis noh pasabl needa. Wi mait waahn help adaz, bot dis ku bee haad if wi oan famili membaz di sofa. Stil, wi ga di dizaiya fi help wi bradaz, ahn Jehoava hapi wid wi wen wi du weh wi kud fi help dehn. (Prov. 3:27; 19:17) Soh weh wi ku du fi help dehn?

3. Weh wi ku laan fahn di egzampl a di eldaz weh mi eena Desi kangrigayshan? (Jeremiah 23:4)

³ Weh di eldaz ku du. If yoo da wahn elda, geh fi noa di sheep eena di kangrigayshan gud. (Reed Jeremiah 23:4.) b Sista Desi, weh wi mi taak bowt eena di laas aatikl,  seh: “Di eldaz eena mi servis groop yoostu aalwayz jain mee an adaz eena di minischri ahn wen wi mi spen taim tugeda.” c Afta di COVID-19 pandemik mi brok owt ahn som a Desi famili membaz mi ded fahn di vairos, ih mi eeziya fi mek di eldaz help ahn bikaaz dehn mi don geh fi noa ahn.

4. Wai ih mi eezi fi mek di eldaz help Desi, ahn weh di eldaz ku laan fahn dis?

⁴ Dis da weh Desi seh: “Bikaaz Ah mi don noa di eldaz aredi an Ah mi si dehn az mi fren, ih mi eezi fi mek Ah tel dehn how Ah feel ahn weh mi-di wori mi.” Weh di eldaz ku laan fahn dis? Bee laik wahn shepad ahn tek kayr a yu bradaz ahn sistaz bifoa dehn fays wahn haad sichuwayshan. Bee dehn fren. If wahn dizeez di spred ahn yu kyaahn goh vizit yu bradaz persnali, chrai fain ada wayz fi kantak dehn. Desi mi seh: “Sohntaim moa dan wan elda wuda kaal mi er teks mi di saym day, ahn di skripchaz weh dehn mi shayr wid mi da-mi skripchaz weh Ah noa gud, bot dehn mi stil toch mi haat.”

5. Weh ku help di eldaz noa weh dehn bradaz ahn sistaz need, ahn how di eldaz kud help dehn?

⁵ Wan way how yu ku noa weh yu bradaz ahn sistaz need da if yu aks dehn kweschanz, bot bee kyaaful fi noh aks dehn notn weh wahn mek dehn feel shaym. (Prov. 20:5) Fi egzampl, yu tink dehn ga inof food, medisn, an ada tingz weh dehn need? Yu tink dehn mait looz dehn jab er eevn dehn hows bikaaz dehn noh ga moni fi pay far it? Yu tink dehn need help fi aplai fi govament asistans? Desi mi did geh di help weh ih mi need fan ih bradaz ahn sistaz. Bot weh mi help shee di moas fi get chroo ih chraiyalz da di lov weh di eldaz shoa ahn an di inkorijment weh dehn mi giv ahn fahn di Baibl. Shee mi seh: “Di eldaz mi pray wid mi. Eevn doa Ah kyaahn memba weh dehn mi seh, Ah memba how Ah mi feel. Da laik Jehoava mi-di tel mi, ‘Yoo noh deh bai yuself, Ai deh wid yu.ʼ”—Isa. 41:10, 13.

6. Weh adaz eena di kangrigayshan ku du fi help owt wan anada? (Koment pahn di picha.)

⁶ Weh adaz ku du. Wee ekspek di eldaz fi tek kayr a di bradaz ahn sistaz eena di kangrigayshan, bot Jehoava waahn aala wi fi  inkorij wan anada eena di kangrigayshan. (Gal. 6:10) Eevn if da sohnting smaal wi du fi help owt sohnbadi weh sik, ih wahn inkorij da persn wahn lat. Fi egzampl, eevn wahn lee pikni ku inkorij wahn brada wen ih mek wahn lee kyaad er jraa wahn lee picha far ahn. Wahn yong persn ku goh da shap er du ada lee tingz fi wahn sista. Adaz eena di kangrigayshan ku kuk sohn food fi sohnbadi weh sik ahn jrap it aaf da dehn hows. Af koars, wen wahn dizeez di spred aal oava, evribadi eena di kangrigayshan wahn need inkorijment. Soh, weda wi meet chroo veedyo kaal er wi meet fays-tu-fays, maybi wi ku stay bak wahn lee bit langa afta di meetin soh dat wi ku chat wid wi bradaz ahn sistaz. Ahn memba dat di eldaz need inkorijment tu. Di eldaz geh moa bizi wen wahn dizeez di spred. Sohn bradaz sen wahn lee noat fi tank dehn fi dehn haad werk. Ih feel gud wen wi du fi wee paat fi “kip aan di inkorij wan anada ahn di bil op wan anada”!—1 Tes. 5:11.

7. Wat da sohn chalenjiz weh wi haftu deel wid afta wahn dizaasta?

⁷ Wahn dizaasta ku chaynj wahn persn laif sodn-wan. Wahn persn ku looz evriting weh ih oan, ih hows, an eevn peepl weh ih lov. Tingz laik dehnya ku hapm tu wi bradaz ahn sistaz tu. Weh wee ku du fi help dehn?

8. Weh wahn elda ahn wahn famili hed ku du bifoa wahn dizaasta hapm?

⁸ Weh eldaz ku du. Unu eldaz, help unu bradaz fi pripyaa bifoa wahn dizaasta hapm. Mek shoar dat evribadi eena di kangrigayshan noa weh dehn need fi du fi stay sayf ahn fi kantak di eldaz. Margaret, weh wi mi menshan eena di laas aatikl, mi seh: “Eena wahn loakal needz paat, di eldaz mi waan wi dat di wail faiya seezn neva oava yet eena di ayrya. Dehn mi tel wi dat if di govament aada wi fi lef wi hows er if di sichuwayshan geh daynjaros, wi mi need fi lef rait away.” Di bradaz mi gi wi dis infamayshan da jos di rait taim, bikaaz wahn daynjaros wail faiya mi brok owt faiv weeks layta. Joorin famili wership, di famili hed ku diskos weh eech famili memba need fi du. If yoo ahn yu chiljren pripyaa heda taim fi wahn dizaasta, den ih wahn eeziya fi stay kaam wen ih hapm.

9. Weh eldaz need fi du fi bee aaganaiz bifoa an afta wahn dizaasta hapm?

⁹ If yoo da wahn groop oavaseeya, mek shoar dat yu ga di karek foan nomba an ajres fi aal di bradaz ahn sistaz eena yu servis groop. Ahn mek shoar dat yu du dis bifoa wahn dizaasta hapm. Fahn taim tu taim, chek if di foan nomba ahn di ajres chaynj. Den if wahn dizaasta doo hapm, yu wahn aybl fi kantak eech persn eena yu servis groop ahn chek if dehn need help. Gi dis infamayshan tu di koardinayta a di badi a eldaz rait away, ahn hihn wahn kantak di serkit oavaseeya. Wen dehnya bradaz werk tugeda, dehn wahn ku help eena di bes way pasabl. Margaret serkit oavaseeya neva sleep fi 36 owaz afta di faiya, bikaaz hihn mi bizi di aaganaiz di werk weh di eldaz mi-di du. Dehn mi-di chrai kantak ahn luk afta di 450 bradaz weh mi haftu lef dehn hows bikaaz a di faiya. (2 Kor. 11:27) Soh dehn mi aybl fi help evribadi weh mi need wahn plays fi stay.

10. Wai di rispansabiliti fi shepad di kangrigayshan impoatant tu di eldaz? (Jan 21:15)

¹⁰ Di eldaz ga di rispansabiliti fi gi di bradaz inkorijment fahn di Baibl ahn fi help dehn wan weh feel schres owt ahn weh di wori. (1 Peet. 5:2) Wen wahn dizaasta  hapm, di fers ting weh di eldaz du da mek shoar dat eech brada ahn sista sayf ahn ga food, kloaz, ahn wahn plays fi stay. Bot eevn monts afta wahn dizaasta hapm, dehn wan weh servaiv wahn stil need inkorijment fahn di Baibl an imoashanal sopoat. (Reed Jan 21:15.) Harold, weh serv pahn wahn Branch Komiti ahn weh meet wid wahn lata bradaz ahn sistaz weh gaahn chroo wahn dizaasta, seh: “Ih tek taim fi get oava sohnting laik dat. Dehn laif mait staat tu feel naamal agen, bot dehn mait memba tingz weh mi hapm joorin di dizaasta, laik sohnbadi weh dehn lov weh mi ded, sohnting preshos weh dehn mi looz, er di daynja weh dehn mi fays wen dehn eskayp. Dehndeh memriz mait staat tu mek dehn feel payn ahn sadnis aal oava agen. Dis da wahn naamal feelin, an ih noh meenz dat dehn noh ga fayt.”

11. How eldaz ku help wahn famili fi koap afta wahn dizaasta?

¹¹ Di kongsl weh seh “krai wid peepl weh krai” da sohnting weh di eldaz tek seeryos. (Roam. 12:15) Eldaz need fi rimain dehn wan weh gaahn chroo wahn dizaasta dat Jehoava ahn di bradaz stil lov dehn. Eldaz wahn help familiz fi kip du tingz laik pray, stodi, goh da meetin, ahn preech. Eldaz ku aalso inkorij payrents fi help dehn chiljren fi foakos pahn tingz weh wahn dizaasta kyaahn dischrai. Unu payrents, help unu chiljren fi memba dat Jehoava wahn aalwayz bee dehn Fren ahn dat ih wahn aalwayz help dehn. Ahn mek shoar yu rimain dehn dat dehn da paat a wahn werlwaid famili a bradaz ahn sistaz hoo aalwayz redi fi help dehn.—1 Peet. 2:17.

12. Weh adaz ku du fi help wen wahn dizaasta hapm?

¹² Weh adaz ku du. If wahn dizaasta hapm kloas tu wehpaat yoo liv, aks di eldaz how yoo ku help. Maybi yu ku mek dehn wan weh mi haftu lef dehn hows stay wid yu fi wahn lee wail. Er maybi yu ku invait sohn valantyaaz fi stay wid yu wail dehn di help owt wid di dizaasta rileef werk. Maybi yu ku goh diliva food er ada tingz weh di poblisha dehn mait need. Ahn how yoo ku stil help if wahn dizaasta hapm eena wahn ayrya weh faar fahn wehpaat yoo liv? Yu ku pray fi dehn. (2 Kor. 1:8-11) Yu ku sopoat di rileef werk wen yu doanayt moni tu di werlwaid werk. (2 Kor. 8:2-5) If yu aybl fi chravl tu di  ayrya wehpaat di dizaasta hapm, aks di eldaz weh yoo ku du fi help owt. If dehn invait yu fi goh help, yu wahn praabli geh sohn chraynin soh dat yu ku help eena di bes way pasabl.

13. Weh prablemz wi bradaz fays eena difrent plays weh wi werk deh anda ban?

¹³ Eena difrent plays wehpaat wi werk deh anda ban, persikyooshan onli mek laif haada fi wi bradaz. Bradaz eena dehndeh paat a di werl stil fays moni prablemz, geh sik, ahn sohntaim peepl weh dehn lov ded. Bikaaz wi werk deh anda ban, di eldaz kyaahn goh vizit di bradaz er feel free fi goh taak tu dehn ahn gi dehn di inkorijment weh dehn need. Dat da egzakli weh mi hapm tu Andrei, weh wi mi menshan eena di laas aatikl. Wahn sista eena fi hihn servis groop mi-di deel wid moni prablemz. Den shee mi get eena wahn kaar aksident, an ih mi need moa dan wan serjri. Ahn noh jos dat, bot shee kudn werk needa. Eevn doa di werk mi deh anda ban ahn dehn mi-di goh chroo wahn pandemik, di bradaz mi du weh dehn kud fi help ahn. Ahn Jehoava mi noa egzakli weh shee mi-di goh chroo ahn weh ih mi need.

14. How eldaz ku set wahn gud egzampl wen dehn pen pahn Jehoava?

¹⁴ Weh eldaz ku du. Andrei mi pray ahn du aal weh hihn kuda mi du. How Jehoava mi ansa Andrei pryaa? Hihn mi moov som a di bradaz ahn sistaz eena di kangrigayshan weh mi ga moa freedom fi help di sista. Som a dehn mi giv ahn wahn raid fi ih dakta apointment an adaz mi giv ahn moni fi help ahn owt. Jehoava mi moov di bradaz ahn sistaz fi du weh dehn kud fi help shee, an ih mi bles dehn soh dat dehn kuda werk tugeda ahn gi shee evriting weh ih mi need. (Heeb. 13:16) Unu eldaz, wen di werk deh anda ban, aks adaz fi help unu. (Jer. 36:5, 6) Bot moa impoatant dan eniting els, pen pahn Jehoava. Hihn ku help yu fi tek kayr a wi bradaz ahn sistaz.

15. How wi ku stay yoonaitid eevn anda persikyooshan?

¹⁵ Weh adaz ku du. Wen wi werk deh anda ban, wi onli ku meet op wid wi bradaz eena smaal groops. Soh ih impoatant dat wi ga pees monks eech ada. Wi need fi fait gens Saytan, noh gens wan anada. Fergiv yu bradaz fi di mistayk weh dehn mek,  ahn chrai fi solv eni prablemz weh yu gat wid dehn rait away. (Prov. 19:11; Ifee. 4:26) Bee wilin ahn redi fi help wan anada. (Tai. 3:14) Wen adaz mi help di sista weh mi need help, dis mi benifit evribadi eena da servis groop. Dis jraa dehn kloasa tugeda, laik wahn reel famili.—Ps. 133:1.

16. Bays pahn Koloashanz 4:3, 18, how wee ku help wi bradaz ahn sistaz weh di goh chroo persikyooshan?

¹⁶ Towznz a wi bradaz ahn sistaz di serv Jehoava eena difrent paats a di werl eevn doa di werk deh anda ban. Som a dehn deh da prizn bikaaz dehn faytful tu Jehoava. Wi pray fi dehn ahn dehn famili. Wi aalso pray fi dehn wan weh shoa korij wen dehn sopoat wi bradaz ahn sistaz weh deh eena prizn. Dehn du dis wen dehn inkorij dehn bradaz fi kip di chros eena Jehoava, provaid di tingz weh dehn need, ahn difen dehn eena koat. Dehn du dis eevn doa dehn ku geh arestid tu. d (Reed Koloashanz 4:3, 18.) Neva ferget dat fi yoo pryaaz ku help aala dehnya bradaz ahn sistaz!—2 Tes. 3:1, 2; 1 Tim. 2:1, 2.

17. How yoo ku pripyaa fi persikyooshan now?

¹⁷ Yoo ahn yu famili ku pripyaa now fi persikyooshan. (Aks 14:22) Noh chrai tink bowt aala di bad tingz weh ku hapm. Insteda dat, werk haad fi schrentn yu frenship wid Jehoava ahn help yu chiljren fi du di saym ting. If sohntaim yu feel frayd ahn yu di wori, poar owt yu haat ahn tel Jehoava how yu feel. (Ps. 62:7, 8) Tek taim az wahn famili fi diskos aal di difrent reezn wai yu ku chros Jehoava. e Jos laik how yu help yu chiljren fi pripyaa fi wahn dizaasta bifoa ih hapm, yu ku help yu chiljren wen yu pripyaa dehn fi fays persikyooshan bifoa dat hapm. Ih wahn help dehn fi ga korij ahn fi bee kaam, bikaaz yu teech dehn fi chros eena Jehoava.

18. Weh wi ku luk faawod tu eena di fyoocha?

¹⁸ Di pees weh Gaad gi wi mek wi feel sayf. Dis kaina pees weh Jehoava gi wi help wi fi stay kaam eevn wen dizeez, dizaasta, ahn persikyooshan afek wi tudeh. Hihn yooz haad-werkin eldaz fi tek kayr a wi. Ahn hihn gi aala wi di privilij fi help wan anada. (Fil. 4:6, 7) Wi ku yooz di pees weh wi di injai now fi pripyaa fi di biga chraiyalz weh wahn soon kohn joorin di “grayt chribyulayshan.” (Mach. 24:21) Joorin da taim, wi wahn need fi kip wi pees ahn help adaz fi du di saym ting. Bot afta di grayt chribyulayshan, wi noh wahn fays seeryos prablemz weh wahn mek wi feel worid ahn frayd. Wi wahn fainali injai weh Jehoava mi aalwayz waahn wi injai—reel pees weh wahn laas fareva.—Isa. 26:3, 4.