Wen wi wahn stap preech di gud nyooz bowt Gaad Kingdom?

Jeezas seh: “Mai disaipl dehn wahn preech di gud nyooz bowt di Kingdom aal oava di ert soh dat aala di nayshan dehn ku noa bowt it, ahn den di en wahn kom.” (Mach. 24:14) Di Greek werd weh chranslayt az “en” eena dis vers, vers 6, ahn vers 13 di taak bowt wen Saytan werl wahn geh dischrai da Armagedon. (Rev. 16:​14, 16) Dat meenz wi wahn kantinyu preech di gud nyooz til rait bifoa Armagedon. Dis da wahn chaynj tu di way how wi andastan dehnya vers.

Wi yoostu andastan dat wi wahn stap preech wen Babilan di Grayt geh dischrai ahn di grayt chribyulayshan staat. (Rev. 17:​3, 5, 15, 16) Wi yoostu bileev dat afta di grayt chribyulayshan staat, Jehoava neva mi wahn gi peepl di chaans fi rispan tu di gud nyooz nohmoh. (Aiz. 61:2) Wi yoostu tink dat wen di en kohn, ih wuda bee laik wen Jeroosalem geh dischrai eena 607 B.C.E. Di Jooz weh servaiv bak den da di wanz weh mi maak heda taim bikaaz dehn wership Jehoava ahn hayt wikidnis. (Ezek. 5:11; 9:4) Soh wi mi tink dat enibadi weh mi wahn servaiv di grayt chribyulayshan mi wahn haftu proov dat dehn faytful tu Jehoava bifoa di grayt chribyulayshan staat. Bot da eksplanayshan noh werk, bikaaz ih noh gree wid weh Jeezas seh da Machyu 24:14. Weh hihn seh shoa wi dat peepl wahn ga taim fi aksep di gud nyooz antil rait bifoa Armagedon kohn.

Laik how wi geh wahn beta andastandin a Machyu 24:​14, wi need fi ajos di way wi andastan Revilayshan 16:​21, weh tel wi bowt sohn big haylstoan. Wen wi stodi dehnya vers tugeda, wi si dat eech vers help wi fi andastan di ada. How? Weh help wi fi andastan dat da wen wi luk pahn weh di Baibl seh bowt how difrent peepl wahn rispan tu di gud nyooz bowt di Kingdom. Di apasl Paal seh dat di gud nyooz da laik “wahn sweet smel” tu “peepl weh wahn geh sayv,” bot da bad nyooz, er “di smel a det,” tu Gaad enimi dehn. (2 Kor. 2:​15, 16) Dehn hayt di mesij weh wi preech bikaaz wi shoa dehn dat Saytan di rool di werl weh dehn lov ahn dat dis sistem wikid ahn wahn soon geh dischrai.—Jan 7:7; 1 Jan 2:17; 5:19.

Noatis dat di haylstoan dehn weh Revilayshan 16:21 taak bowt wahn “du lata damij.” Dat mait meen dat joorin di grayt chribyulayshan, di mesij weh wi preech wahn hit haad, bikaaz wi wahn di preech di chroot bowt Jehoava moa ahn moa az di en di geh kloasa. (Ezek. 39:7) Bot maybi, afta Babilan di Grayt geh dischrai, sohn peepl mait laik di mesij weh wi preech, jos laik how dehn wuda laik wahn sweet smel. Maybi som a dehn wahn memba er som a dehn wahn fain owt dat fi yaaz Jehoava Witnisiz di preech bowt di en a faals rilijan.

Dat simila tu weh mi hapm da Eejip afta di Ten Playg. Afta Jehoava mi “joj di gaad dehn da Eejip,” wahn “big groop a aal kaina peepl” mi lef Eejip lang wid di Izrelait dehn. (Eks. 12:​12, 37, 38) Maybi dehn mi jain Jehoava peepl bikaaz dehn mi si dat evriting weh Moaziz seh mi wahn hapm fi eech a di Ten Playg mi did hapm fi chroo.

Enibadi weh ton tu Jehoava afta Babilan di Grayt geh dischrai wahn geh di privilij fi sopoat Krais bradaz weh stil dehn pahn di ert. (Mach. 25:​34-36, 40) If dehn du dat, Krais wahn joj dehn az sheep. Af koars, da chaans fi salvayshan wahn kohn tu wahn en jos bifoa Armagedon wen di anointid bradaz ahn sistaz weh stil deh pahn ert wahn geh dehn riwaad ahn goh da hevn.

Dis andastandin help wi fi reeli si how grayt di lov ahn mersi weh Jehoava shoa. Yes, hihn “noh waahn nobadi geh dischrai, bot ih waahn evribadi geh di chaans fi ripent.”—2 Peet. 3:9.