1. Weh aal peepl haftu deel wid?

 YU MAIT noa dat sohnting rang ahn Jehoava noh laik it, bot yu mait stil waahn du it. Yoo eva feel da way? Noh mek dat diskorij yu; bikaaz weh yoo di schrogl wid, adaz di deel wid tu. In fak, di Baibl seh: “Eni temtayshan weh [yu] goh chroo da di saym laik weh evribadi els goh chroo.” (1 Kor. 10:13) Soh da noh jos yoo wan. Ahn wid Jehoava help, yu ku win di fait.

2. Weh kaina temtayshan sohn Kristyanz ahn Baibl styoodents mait schrogl wid? (Koment pahn di picha dehn.)

² Di Baibl seh: “Da weh deh eena wahn persn oan haat da weh temp ahn an put ahn anda tes.” (Jay. 1:14) Dis vers help wi fi andastan dat difrent peepl fays difrent temtayshan. Fi egzampl, sohn Kristyanz mait bee temtid fi komit sekshwal imoraliti wid sohnbadi fahn di opozit seks, an adaz wid sohnbadi fahn di saym seks. Sohnbadi weh stap wach poarnografi mait bee temtid fi staat wach it agen. Sohnbadi weh stap tek jrogz er stap jrink tu moch mait bee temtid fi staat op agen. Dehndeh da jos wahn fyoo a di temtayshan dehn weh wi bradaz ahn sistaz er wi Baibl styoodent dehn mait schrogl wid. Sohntaim aala wi praabli feel laik weh di apasl Paal mi seh: “Wen Ah waahn du weh rait, badnis deh eena mi.”—Roam. 7:21.

3. How yu mait feel if yu stay di fait gens di saym rang dizaiya?

³ Wi wahn aalwayz fays temtayshan fi du sohnting rang, ahn wi haftu fait haad fi noh giv een. Bot sohntaim, wi mait feel laik wi noh schrang inof. Ada taimz wi mait feel laik wi noh ga noa hoap, bikaaz if wi waahn du sohnting weh wi noa rang, den how wi ku ekspek Jehoava fi gi wi evalastin laif? Bot da kaina tinkin da noh chroo, ahn wi  noh haftu feel dehndeh kaina way! Fi help wi andastan wai wi ku seh dat, dis aatikl wahn ansa too kweschan: (1) Da hoo waahn wi feel laik dat? (2) How wi ku win di fait gens temtayshan?

HOW “DI WIKID WAN” WAAHN WI FEEL

4. (a) Wai Saytan waahn wi feel laik wi noh schrang inof fi fait gens temtayshan? (b) Wai wi ku bee shoar dat wi ku fait gens temtayshan?

⁴ Saytan waahn wi feel laik wi kyaahn fait temtayshan. Jeezas mi mek it klyaa dat Saytan wahn chrai temp wi wen ih mi teech ih falowaz fi pray eena dis way: “Pleez help wi soh dat wi noh giv een tu temtayshan, bot reskyu wi fahn di wikid wan.” (Mach. 6:13) Saytan seh dat peepl noh wahn obay Gaad wen dehn fays temtayshan. (Joab 2:​4, 5) Wai Saytan seh dat? Saytan ihself mi giv een wen ih fays temtayshan, an ih neva stay faytful tu Jehoava. Saytan mosi feel laik wee da jos laik hihn, laik if wee wahn hori jrap Jehoava wen wi fays temtayshan. Saytan mi eevn tink dat Gaad perfek Son mi wahn giv een tu temtayshan! (Mach. 4:​8, 9) Bot yu reeli tink wee noh schrang inof fi fait temtayshan? Af koars nat! Wee feel laik how di apasl Paal mi feel. Hihn mi seh: “Ah geh di schrent fi fays evriting bikaaz a di wan weh gi mi powa.”—Fil. 4:13.

5. How wi noa dat Jehoava shoar dat wi ku fait gens temtayshan?

⁵ Jehoava da noh laik Saytan. Jehoava noa dat wi ku fait gens temtayshan. How wi noa dat? Bikaaz Jehoava mi prafesai dat wahn big krowd a peepl wahn stay faytful tu hihn ahn servaiv di grayt chribyulayshan. Tink bowt weh dat meenz. Jehoava seh dat da krowd wahn bee kleen wen dehn goh eena Paradais, bikaaz dehn “wash dehn roab eena di blod a di Lam ahn dehn roab geh wait,” ahn wi noa dat Jehoava kyaahn tel lai. (Rev. 7:​9, 13, 14) Soh Jehoava noa dat eevn if wi mait waahn du sohnting weh rang, wi ku bee schrang inof fi fait di temtayshan fi du it.

6-7. Wai Saytan waahn wi feel laik wi noh ga no hoap?

⁶ Saytan waahn wi feel laik wi noh ga no hoap needa. Ih waahn wi bileev dat Jehoava wuda kandem wi jos bikaaz wi waahn du sohnting weh bad. Wai Saytan waahn wi tink da way? Bikaaz hihn noh ga  no hoap. Hihn wahn kyaahn liv fareva; ih wahn geh dischrai. (Jen. 3:15; Rev. 20:10) Saytan mosi jelos kaaz Jehoava wahn gi wee evalastin laif. Soh ih wahn du aal weh ih kud fi mek wi tink dat wee da laik hihn ahn wi noh ga hoap fi di fyoocha. Bot dat da loan lai! Di Baibl tel wi dat Jehoava waahn help wi soh dat wi ku liv fareva. Hihn “noh waahn nobadi geh dischrai, bot ih waahn evribadi geh di chaans fi ripent.”—2 Peet. 3:9.

⁷ If wi bileev dat wi noh schrang inof er dat wi noh ga no hoap, den wi wahn di tink di way Saytan waahn wi tink. Wen wi andastan dat da kaina tinkin da wahn chrap weh Saytan yooz gens wi, ih wahn eeziya fi stan op gens ahn.—1 Peet. 5:​8, 9.

HOW WI KU FEEL BIKAAZ WI NOH PERFEK

8. Wat els ku mek wi feel laik wi noh schrang inof ahn wi noh ga hoap? (Saam 51:5) (Koment pahn di futnoat.)

⁸ Wi haftu fait gens Saytan wen ih chrai mek wi bileev dat wi tu week ahn wi noh ga no hoap, bot wi haftu fait gens sohnting els tu weh ku mek wi tink da way. Wi haftu fait gens wi oan sinful kandishan weh wi inherit fahn Adam ahn Eev. a—Joab 14:4; Reed Saam 51:5.

9-10. (a) How Adam ahn Eev mi feel afta dehn sin? (Koment pahn di picha.) (b) How wee feel bikaaz wi baan sinful?

⁹ Tink bowt how Adam ahn Eev mi feel afta dehn sin. Afta dehn mi disobay Jehoava, dehn mi haid fan ahn an chrai kova dehn badi. Dat da bikaaz dehn sin mi mek dehn feel gilti, frayd, ahn shaym. Da laik if dehndeh feelinz da-mi wahn hows weh Adam ahn Eev mi lak op eena. Dehn kuda mi goh eniway eena di hows weh dehn waahn, bot dehn mi kyaahn kom owt. Dehn neva ga no way fi eskayp fahn dehn sinful kandishan.

¹⁰ Af koars, wee noh deh eena di saym sichuwayshan laik Adam ahn Eev, bikaaz wee ga di ransom. Sayka di ransom, wee ku geh fergivnis fi wi sinz ahn ga wahn kloas rilayshanship wid Jehoava, bot di ransom noh kova Adam ahn Eev. (1 Kor. 6:11) Stilyet, wi mi inherit fi dehn sinful kandishan. Soh wee wahn feel gilti, frayd, ahn shaym tu. In fak, di Baibl seh dat sin stil ga powa oava wee, “eevn oava peepl weh neva sin eena di saym way laik Adam.” (Roam. 5:14) Bot wi noh waahn feel laik jos bikaaz wi baan sinful, wi noh ga no hoap er wi noh schrang inof fi du weh rait. If wi eva feel dehn kaina way, weh ku help wi fi fait dehndeh feelinz?

11. Eevn if wi feel laik wi noh schrang inof fi fait temtayshan, weh wi aalwayz ku du? (Roamanz 6:12)

¹¹ Sohntaim wen wi fays temtayshan, da  laik wahn lee vais eena wi hed tel wi dat wi noh schrang inof fi fait di temtayshan. Noh lisn tu da vais. Wai? Bikaaz di Baibl seh dat wi noh haftu mek sin kantinyu fi “rool az king” oava wi. (Reed Roamanz 6:12.) Dat meenz eevn if wi waahn du sohnting weh rang, wi ku chooz fi noh du it. (Gal. 5:16) Jehoava shoar dat wi ku fait gens temtayshan. Adawaiz, ih neva mi wahn tel wi fi du dat. (Dyoo. 30:​11-14; Roam. 6:6; 1 Tes. 4:3) Soh eevn if wi noh feel laik it, wi ga di schrent fi fait gens temtayshan.

12. Eevn if wi feel laik wi noh ga no hoap, weh wi ku stil du, ahn wai?

¹² Sohntaim wi waahn du sohnting eevn doa wi noa dat ih rang, ahn laik wahn lee vais eena wi hed tel wi dat if wi waahn du weh rang, den wi kuda neva pleez Jehoava. Noh lisn tu da vais. Wai? Bikaaz di Baibl teech wi dat Jehoava andastan wi sinful kandishan. (Saa. 103:​13, 14) “Hihn noa evriting” bowt wi, inkloodin how wi sinful kandishan afek aala wi eena difrent wayz. (1 Jan 3:​19, 20) Bot if wi noh giv een tu di temtayshan, if wi noh akchwali du weh rang, den wi ku kantinyu fi bee kleen fronta Jehoava. How wi ku bee shoar a dat?

13-14. If yu feel fi du sohnting weh rang, yu tink dat meenz yu kyaahn pleez Jehoava? Pleez eksplayn yu ansa.

¹³ Di Baibl seh dat yu ga wahn big difrens bitween wen yu waahn du sohnting weh rang ahn wen yu akchwali du it. Yu mait kyaahn aalwayz stap yuself fahn waahn du sohnting weh bad, bot yu kud stap yuself fahn du it. Fi egzampl, som a di Kristyanz da Korint yoostu bee homosekshwal. Paal mi tel dehn: “Som a unu yoostu du dehndeh saym ting.” Yu tink dat meenz dat dehn neva eva mi waahn goh bak tu di tingz weh dehn yoostu du? Praabli nat, bikaaz lata taim ih noh eezi fi stap ga dehndeh kaina feelinz. Bot di Kristyanz weh mi shoa self-kanchroal ahn neva giv een tu dehndeh feelinz mi pleez Jehoava. Hihn mi “wash [dehn] kleen.”—1 Kor. 6:​9-11.

¹⁴ Ih ku bee di saym fi yoo. Noh mata weh temtayshan yu haftu fays, yu ku get oava it. Eevn if yu kyaahn geh rid a di temtayshan, yu ku kanchroal yuself soh dat yu noh “du weh [yu] sinful badi ahn main waahn [yu] du.” (Ifee. 2:3) Soh weh yu ku du fi win di fait gens temtayshan?

WEH KU HELP YU FI FAIT TEMTAYSHAN?

15. If wi waahn win di fait gens temtayshan, wai wi need fi bee aanis wid wiself?

¹⁵ Fi win di fait gens temtayshan, yu wahn need fi bee aanis wid yuself an admit wat da yu weeknis. Bee kyaaful dat yu noh fool yuself. (Jay. 1:22) Fi egzampl, sohnbadi weh ga wahn jrinkin prablem mait chrai kanvins ihself dat da noh wahn prablem bikaaz dehn noh di jrink az moch az sohnbadi els. Sohnbadi weh ga wahn prablem wid poarnografi mait chrai blaym sohnbadi els ahn seh sohnting laik, “Ah noh mi wahn wach pahn poarnografi if mi waif wuda shoa mi moa lov.” If yu eva staat tink laik dat, ih wahn bee eeziya fi giv een tu temtayshan. Soh noh mek ekskyooz fi yuself wen yu du sohnting weh rang, eevn eena yu main, bot tek rispansabiliti fi yu akshan.—Gal. 6:7.

16. How yu ku mek op yu main fi du weh rait?

¹⁶ Di neks ting weh yu wahn need fi du da mek op yu main fi du evriting weh  yu kud fi noh giv een tu temtayshan. (1 Kor. 9:​26, 27; 1 Tes. 4:4; 1 Peet. 1:​15, 16) Tink bowt weh temp yu di moas ahn wen ih mait bee moa temtin. Ih mait bee wahn sertn kaina temtayshan da yu weeknis, er ih mait bee dat wahn sertn taim a day ih haada fi stan op tu di temtayshan. Fi egzampl, yu fain it haada fi fait temtayshan layt da nait er wen yu taiyad? Pripyaa yuself heda taim fi weh yu wahn du eena dehndeh sichuwayshan.—Prav. 22:3.

17. Weh wi ku laan fahn Joazef egzampl? (Jenisiz 39:​7-9) (Koment pahn di picha dehn.)

¹⁷ Tink bowt weh Joazef mi du wen Potifa waif mi chrai sleep wid ahn. Hihn neva haftu stap ahn tink. Joazef mi don noa dat ih rang fi tek wahn nada man waif, soh ih tel ahn no rait deh pahn di spat. (Reed Jenisiz 39:​7-9.) Weh wi laan fahn dat? Joazef mek op ih main fi du weh rait bifoa Potifa waif mi waahn sleep wid ahn. Yoo ku du laik Joazef tu. Bifoa wahn temtayshan kom op, tink bowt weh fi du ahn mek op yu main fi du it. Den, wen di temtayshan kom op, ih wahn eeziya fi stik tu yu disizhan ahn fait di temtayshan.

‘KIP DI CHEK YUSELFʼ

18. How yu ku win di fait gens temtayshan? (2 Korintyanz 13:5)

¹⁸ If yu waahn win di fait gens temtayshan, yu haftu “kip di chek” yuself fi si how yu di du an if yu ku du beta. (Reed 2 Korintyanz 13:5.) Evri now an agen, luk bak pahn di tingz weh yu tink bowt ahn weh yu du ahn si if yu need fi mek eni chaynjiz. Fi egzampl, eevn wen yu noh giv een tu wahn temtayshan, yu ku aks yuself: ‘How lang Ah mi tek fi seh no?ʼ If yu noatis dat yu mi hezitayt, noh beet op. Insted, tink bowt how yu ku pripyaa yuself fi du beta neks taim. Yu ku aks yuself kweschanz laik: ‘Weh ku help mi fi stap tink bowt sohnting weh rang? How Ah ku stap kwika? Di tingz weh Ah wach, reed, er lisn tu mek it haada fi noh giv een tu temtayshan? Wen wahn imoaral seen kom op, Ah hori fi stap luk pan it? Ai andastan dat eevn if Ah haftu werk haad fi shoa self-kanchroal, Jehoava standadz da fi mi oan gud?ʼ—Saa. 101:3.

19. How bad disizhanz eena smaal tingz ku mek it haada fi noh giv een tu temtayshan?

¹⁹ Wen yu di chek yuself, mek shoar yu noh mek ekskyooz fi bad bihayvya. Di  Baibl seh: “Di haat chrikiya dan eniting els an ih korop.” (Jer. 17:9) Jeezas mi seh dat wi ku ga “wikid tinkin” eena wi haat. (Mach. 15:19) Fi egzampl, sohnbadi weh mi stap wach poarnografi fi wahn wail mait staat tink dat som pichaz noh az bad az adaz bikaaz dehn noh shoa naykid peepl. Er ih mait tink tu ihself, ‘Notn rang wid tink bowt imoaral tingz, az lang az Ah noh du dehn.ʼ Eena wahn way, sohnbadi weh tink laik dat di “tink bowt how [dehn] ku satisfai [dehn] oan sinful dizaiyaz.” (Roam. 13:14) How yu ku avoid dat? Memba dat bifoa enibadi giv een tu temtayshan, dehn mi praabli chooz fi du lata lee tingz weh neva seem aal dat bad bot weh neva waiz needa. Soh chrai yu bes fi chooz fi du weh waiz eevn eena tingz weh noh seem fi bee aal dat impoatant, ahn den ih wahn eeziya fi chooz fi noh giv een tu temtayshan. b Rijek eni kaina “wikid tinkin” weh ku mek yu waahn mek ekskyooz fi rang bihayvya.

20. Weh hoap wi ga fi di fyoocha, ahn weh help wi ga rait now?

²⁰ Soh wi laan dat Jehoava wahn gi wi di schrent fi noh giv een tu temtayshan. Ahn bikaaz a di ransom, wi ku geh fergivnis fi wi sinz ahn wi ga hoap fi liv fareva eena Paradais. Wi wahn bee soh hapi fi serv Jehoava widowt haftu fait temtayshan! Til wen da taim kohn, wi ku bee shoar dat wi schrang inof fi fait gens temtayshan ahn dat Jehoava andastan wi sichuwayshan an ih wilin fi help wi. Dat gi wi wahn wandaful hoap fi di fyoocha. Wid Jehoava blesin, wi ku win di fait gens temtayshan!