1-2. How wi feel wen Jehoava fergiv wi sinz? (Koment pahn di picha.)

 KING Dayvid mi mek lata seeryos mistayks eena ih laif. Soh hihn mi noa weh ih feel laik fi feel gilti. (Saa. 40:12; 51:​3, hedin) Bot Dayvid mi ripent fahn ih haat, ahn Jehoava mi fergiv ahn kaaz a dat. (2 Sam. 12:13) Soh Dayvid mi andastan how ih feel fi geh fergivnis fahn Jehoava.—Saa. 32:1.

² Jos laik Dayvid, wi ku feel hapi wen wi noa dat Jehoava fergiv wi. Ih gud fi noa dat Jehoava wilin fi fergiv wi, eevn fi seeryos sinz, if wi ripent, kanfes wi sinz, ahn du wi bes fi noh du di saym mistayk agen. (Prav. 28:13; Aks 26:20; 1 Jan 1:9) Ahn wi soh hapi dat wans Jehoava fergiv wi, ih noh wahn ponish wi fi da sin eva agen!—Ezek. 33:16.

3-4. How wahn sista mi feel afta shee mi geh baptaiz, ahn weh wi wahn taak bowt eena dis aatikl?

³ Sohntaim, wi mait feel dat Jehoava neva reeli fergiv wi. Tek, fi egzampl, Jennifer, weh mi groa op eena di chroot. Az wahn teenayja, ih staat du bad tingz ahn haid it fahn ih payrents. Yaaz layta, ih kohn bak tu Jehoava ahn geh baptaiz. Shee seh: “Eena di paas, Ah yoostu bee  ignarant, sleep rong, jrink wahn lat, ahn goh afta moni. Ah mi noa dat wans Ah ripent ahn beg Jehoava fi fergivnis, Jeezas sakrifais mek mi kleen. Bot eena mi haat Ah mi stil feel laik Jehoava neva fergiv mi.”

⁴ Yu eva fain it haad fi bileev dat Jehoava fergiv yu fi sohnting weh yu du eena di paas? Jehoava da wahn mersiful Gaad. Dayvid mi shoar dat Jehoava mi fergiv ahn fi di mistayk weh ih du, ahn Jehoava waahn yu feel di saym way laik Dayvid. Eena dis aatikl, wi wahn taak bowt wai wi ku bee shoar dat Jehoava fergiv wi ahn weh ku help wi bee shoar a dat.

WAI YU NEED FI BEE SHOAR DAT JEHOAVA FERGIV YU?

5. Weh Saytan waahn wi bileev? Yooz di egzampl eena di paragraaf.

⁵ Wen yu shoar dat Jehoava fergiv yu, yu noh wahn faal fi wan a Saytan chrik. Memba dat Saytan wahn du eniting fi stap wi fahn serv Jehoava. Fi egzampl, ih waahn mek wi bileev dat wi sin dehn soh seeryos dat Jehoava noh wahn fergiv wi. Tink bowt di man eena di kangrigayshan da Korint weh mi komit sekshwal imoraliti. Sayka dat, dehn mi haftu tek ahn owt fahn di kangrigayshan. (1 Kor. 5:​1, 5, 13) Bot laytaraan ih ripent ahn kohn bak tu di kangrigayshan. Wen dat hapm, Saytan mi waahn di kangrigayshan chreet ahn bad, laik dehn neva lov ahn. Saym taim, hihn mi waahn di man fi feel laik ih sin mi soh bad dat Jehoava neva fergiv ahn. Saytan mi waahn ih “geh soh sad dat ih giv op” ahn stap serv Jehoava. Saytan noh chaynj, an ih di yooz di saym chriks nowadayz. Bot “wee don noa weh kaina chriks hihn yooz fi chrap wi.”—2 Kor. 2:​5-11.

6. If yu feel dat Jehoava noh fergiv yu, weh ku help yu?

⁶ Wen yu shoar dat Jehoava fergiv yu, yu noh haftu hoal aan tu yu gilt. Wen yu sin, ih nachral fi feel gilti. (Saa. 51:17) Dat da wahn gud ting, bikaaz yu kanshans mek yu waahn du beta. (2 Kor. 7:​10, 11) Bot if yu kantinyu feel gilti eevn afta yu ripent, den yu mait giv op. Wen yu shoar dat Jehoava fergiv yu, yu ku lef yu sin eena di paas. Den yu ku serv Jehoava di way hihn waahn yu serv ahn. Yu ku bee hapi bikaaz yu kanshans kleen. (Kol. 1:​10, 11; 2 Tim. 1:3) Bot how yu ku bee shoar eena yu haat dat Jehoava fergiv yu?

WEH KU HELP YU FI BEE SHOAR DAT JEHOAVA FERGIV YU?

7-8. How Jehoava diskraib ihself tu Moaziz, ahn weh yu ku bee shoar a? (Eksodos 34:​6, 7)

⁷ Tink bowt weh Jehoava seh bowt ihself. Fi egzampl, memba weh Jehoava mi tel Moaziz wen Moaziz mi waahn laan moa bowt Ahn. a (Reed Eksodos 34:​6, 7.) Jehoava ga lata byootiful kwalitiz weh hihn kuda mi tel Moaziz bowt, bot ih chooz fi tel ahn dat ih da “wahn Gaad weh shoa lata mersi” ahn “weh ga kompashan.” Weh yoo tink? Yu tink wahn Gaad laik dat wuda rifyooz fi fergiv sohnbadi weh ripent fi dehn sin? Af koars nat! Jehoava kuda neva bee soh koal ahn noh shoa no kaina mersi.

⁸ Yu ku bee shoar dat wen Jehoava seh hihn mersiful, ih di tel di chroot. Jehoava kyaahn tel lai. (Saa. 31:5) Soh yu ku  bileev weh hihn seh. If yu stil feel gilti fi tingz weh yu du eena di paas, aks yuself: ‘Wen Ah laan dat Jehoava da wahn mersiful Gaad weh ga kompashan, Ai reeli bileev dat? Ai bileev dat Jehoava wilin fi fergiv eni sina weh ripent?ʼ If yu bileev dat, den yu ku bee shoar dat Jehoava fergiv yoo.

9. Weh ih meen wen Jehoava fergiv wi sinz? (Saam 32:5)

⁹ Tink bowt how Jehoava yooz di Baibl fi teech wi bowt how hihn fergiv. Tink bowt how King Dayvid mi diskraib Jehoava fergivnis. (Reed Saam 32:5.) Wen Dayvid mi seh “yoo fergiv mi fi mi sin dehn,” hihn mi yooz wahn Heebroo werd weh ku aalso meen “lif op,” “tek weh,” er “bak.” Soh wen Jehoava fergiv Dayvid, da laik ih lif op Dayvid sin dehn ahn bak dehn weh. Dayvid mi feel hapi bikaaz ih neva haftu bak da load nohmoh. (Saa. 32:​2-4) Wee ku feel laik dat tu. Wen wi ripent fahn wi sinz, wi noh haftu bak da berdn nohmoh. Ih wahn bee laik Jehoava bak weh wi sinz.

10-11. Weh Saam 86:5 teech wi bowt Jehoava?

¹⁰ Reed Saam 86:5. Eena da vers, Dayvid seh dat Jehoava “redi fi fergiv.” Dis meenz dat Jehoava noh geh beks faas wen wi du wahn mistayk, ahn hihn fergiv enibadi weh ripent. Afta dat di vers seh: “Yu ga lata lov fi dehn wan weh kaal pahn yu.” Laik weh di laas aatikl seh, Jehoava pramis fi lov dehn wan weh lov hihn an ih wahn neva abandan dehn. Bikaaz a da lov, hihn wilin fi fergiv enibadi weh ripent fahn dehn sinz. (Aiz. 55:7) If yu stil noh shoar weda er nat Jehoava fergiv yu, den yu ku aks yuself: ‘Ai reeli bileev dat Jehoava redi ahn wilin fi fergiv enibadi weh ripent fahn dehn sinz ahn beg hihn fi mersi?ʼ If yu bileev dat, den yu ku bee shoar dat hihn fergiv yoo wen yu beg ahn fi fergivnis.

¹¹ Di Baibl ku gi wi komfert bikaaz ih tel wi dat Jehoava andastan how wi geh mek ahn dat wi noh perfek. (Saa. 139:​1, 2) Dayvid mi mek dat klyaa eena wahn nada saam weh hihn mi rait, weh ku help wi bee shoar dat Jehoava fergiv wi.

WEH JEHOAVA MEMBA BOWT WI?

12-13. Akaadn tu Saam 103:14 weh Jehoava memba bowt wi, ahn weh hihn du bowt dat?

¹² Reed Saam 103:14. Dayvid tel wi wan a di reezn wai Jehoava redi fi fergiv peepl weh ripent. Ih seh dat Jehoava “memba dat wi mek owta dos.” Dat meenz Jehoava noa wi noh perfek. Mek wi tek wahn kloasa luk pahn weh Dayvid seh fi help wi andastan weh dat reeli meenz fi wee.

¹³ Dayvid seh dat Jehoava “noh ferget how ih mek wi.” Hihn mi “yooz di dos fahn di grong” fi mek Adam, soh hihn noa how wi geh mek ahn weh wi need. (Jen. 2:7) Fi egzampl, wi need fi eet ahn wi need fi sleep. Eevn perfek peepl need dat. Bot wen di Baibl seh dat wi mek owta dos, ih ku aalso meen dat wi noh perfek ahn bai naycha wi sinful. Jehoava noh onli noa dat wi sinful. Wen Dayvid seh dat Jehoava “memba” dat wi mek owta dos, ih mi meen dat Jehoava wahn aalwayz chreet wi wid kompashan sayka wi noh perfek. Yu ku tink bowt weh Dayvid seh laik dis: Jehoava andastan dat wi wahn sin sohntaim. Wen wi sin ahn wi ripent, Jehoava dehdeh fi shoa wi mersi ahn fergiv wi.—Saa. 78:​38, 39.

14. (a) Weh Dayvid tel wi bowt di way Jehoava fergiv wi? (Saam 103:12) (b) Weh wi ku laan fahn di way Jehoava mi fergiv Dayvid? (Koment pahn di baks weh naym “ Jehoava Fergiv ahn Ferget.”)

 ¹⁴ Wat els ku help yu fi bee shoar dat Jehoava fergiv yu? (Reed Saam 103:12.) Dayvid seh dat wen Jehoava fergiv wi sin, Ih put “dehn az faar az di ees deh fahn di wes.” Ees deh az faar fahn wes az yu ku get. Weh dis teech wi bowt di sinz weh Jehoava fergiv wi fa? Tink bowt it laik dis: Sohntaim wahn sertn sent ku mek yu memba sohnting fahn way bak. Wahn buk weh koment pahn dis vers seh dat Gaad tek wi sinz soh faar fahn wi da laik nat eevn di sent stay bihain. Soh wen Jehoava fergiv yu, da laik ih waip weh da sin soh kleen dat ih noh wahn memba it ner ponish yu far it.—Ezek. 18:​21, 22; Aks 3:19.

15. Weh yu ku du if yu kyaahn get oava yu gilti feelinz?

¹⁵ How Saam 103 ku help yu fi bee shoar dat Jehoava fergiv yu? If yu kyaahn get oava di gilt fahn sinz weh yu du eena di paas, tink bowt how Jehoava feel. Hihn memba dat yu noh perfek, an ih wahn fergiv yu if yu feel sari fi weh yu mi du ahn mek chaynjiz. Memba dat wans Jehoava fergiv yu, ih chooz fi noh tink bowt da sin agen. Dat meenz ih noh wahn tel yu bowt it er ponish yu far it. Jehoava noh kip di tink bowt sinz weh yu du eena di paas, soh yoo shudn needa. (Saa. 130:3) Wen yu shoar dat Jehoava fergiv yu, yu wahn ku fergiv yuself ahn let goh a di gilti feelinz.

16. Yooz di egzampl di paragraaf fi shoa dat ih daynjaros if wi kip di foakos pahn mistayks weh Jehoava don fergiv. (Koment pahn di picha.)

¹⁶ Tink bowt dis egzampl. Wen sohnbadi di jraiv wahn kaar, ih wuda luk pan ih miro fi si weh deh da bak. Ih need fi du dat fahn taim tu taim, bot ih wuda bee daynjaros if ih onli luk pahn di miro aal di taim. Fi bee sayf, ih haftu luk faawod. Saym way soh, ih okay fi luk bak pahn mistayks weh yu du eena di paas, bot yu noh waahn foakos pahn dat. If yu kip di foakos pahn mistayks weh Jehoava  don fergiv, den yu wahn looz yu jai ahn yu praabli noh wahn serv Jehoava eena di bes way. Soh kip di serv Jehoava ahn tink bowt di fyoocha weh Jehoava pramis, wen yu “noh wahn memba aala dehndeh tingz weh mi deh eena di paas.”—Aiz. 65:17; Prav. 4:25.

KANTINYU KANVINS YUSELF DAT JEHOAVA FERGIV YU

17. Wai yu need fi kantinyu kanvins yuself dat Jehoava lov ahn fergiv yu?

¹⁷ Yu need fi bileev fahn yu haat dat Jehoava lov yu an ih wilin fi fergiv yu. (1 Jan 3:19) Saytan wahn kip di chrai fi mek yu bileev dat Jehoava noh lov yu an ih wahn neva fergiv yu. Az wi di geh kloasa tu di en a dis sistem, Saytan wahn du aal weh ih kud fi mek yu stap serv Jehoava, an ih di werk haada ahn haada fi mek dat hapm. (Rev. 12:12) Noh mek Saytan win!

18. Weh yu ku du fi kanvins yuself dat Jehoava lov ahn fergiv yu?

¹⁸ Fi help yu bileev dat Jehoava reeli lov yu, fala di sojeshanz eena di laas aatikl. Fi help yu bileev dat Jehoava wahn reeli fergiv yu if yu ripent fahn yu sinz, tink bowt weh Jehoava seh bowt ihself ahn how ih yooz di Baibl fi teech wi bowt how hihn fergiv. Noh ferget dat Jehoava noa wi noh perfek ahn dat wi wahn mek mistayks, ahn soh hihn shoa wi mersi. Ahn memba dat wen hihn fergiv yu, da laik yu neva did sin eena di fers plays. Den yu wahn feel laik how Dayvid mi feel wen Jehoava mi fergiv ahn, an yu wahn ku tel Jehoava, “Tanks fi ‘fergiv mi fi mi sin dehnʼ!”—Saa. 32:5.