Wen prablemz kom op er wen wahn dizaasta hapm, ih ku afek wi helt eena lata difrent wayz.

• Wen terabl tingz hapm, peepl ku feel schres owt. Ahn peepl yoozhwali geh sik wahn lat wen dehn deh anda soh moch schres fi wahn lang taim.

• Wen prablemz kom op er wahn dizaasta hapm, wahn lata peepl ku geh sik sayhn taim ahn dat ku bee haad fi di haaspital dehn. Dehn mait nat eevn ga inof medisn fi evribadi.

• Wen dehnya bad tingz hapm ih afek peepl, soh dehn fain it haad fi pay fi di tingz weh dehn reeli need laik food ahn medisn.

• Wen yu ga seeryos helt prablemz ahn lata schres, ih ku afek di disizhanz weh yu mek, an ih ku stap yu fahn du tingz weh gud fi yu helt. Ahn dat ku mek yu geh eevn moa sik.

• If yu noh tek kayr a yu helt prablemz, dehn ku geh wers an eevn kil yu.

• If yu stay helti, ih ku help yu mek gud disizhanz eevn wen prablemz kom op.

• Noh mata if yu rich er poa, yu ku stil du tingz fi tek kayr a yu helt.

Weneva pasabl, wahn waiz persn si di daynjaz ahn du aal weh ih kud fi avoid dehn. Wen ih kohn tu wi helt, wi waahn kip wiself ahn wi hows kleen fi protek wiself fahn daynjaz laik dizeez. Ih beta fi bee sayf dan sari.

“Wen wi kip wiself ahn wi hows kleen, wi sayv di moni weh wi wuda spen da dakta er pahn medisn.”—Andreas. *