•  Inchrodokshan 2

•  Chrezhaz Fahn di Werd a Gaad 3-5

  •  Taak 3

  •  Spirichwal Chrezhaz 4

  •  Baibl Reedin 5

•  Werk Haad fi Du Beta Eena di Minischri 6-11

  •  Sampl Kanvasayshan Veedyo 7

  •  Fers Kaal 8

  •  Ritern Vizit 9

  •  Baibl Stodi 10

  •  Taak 11

•  Liv Yu Laif az Wahn Kristyan 12-13

  •  Kangrigayshan Baibl Stodi 13

•  Fainal Koments 14

•  Laan fi Reed ahn Teech Beta 15

•  Komendayshan ahn Kongsl 16

•  Di Taimin a di Meetin 17

•  Wen Da di Week a di Serkit Oavaseeya Vizit 18

•  Wen Da di Week a Wahn Asembli er Kanvenshan 19

•  Wen Da di Week a di Memoaryal 20

•  Laif ahn Minischri Meetin Oavaseeya 21

•  Laif ahn Minischri Meetin Chyaaman 22

•  Agzilari Kongsla 23

•  Agzilari Klaas 24

•  Di Veedyo Dehn 25

1. Wi need fi kandok di Laif ahn Minischri Meetin akaadn tu di skejul an inschrokshanz eena di Laif ahn Minischri Meetin Werkbuk an eena dis dakyument. Mek aala di poblisha dehn noa dat wi di invait dehn fi mek dehnself avaylabl fi tek paat eena di difrent asainment dehn. Eni ada inchrestid peepl weh di kohn da aala di meetin dehn ku tek paat tu, az lang az dehn bileev weh di Baibl seh ahn dehn don di liv akaadn tu di prinsipl dehn eena di Baibl.—be payj 282.

  2. Wan minit. Eech week, afta di sang ahn pryaa, di Laif ahn Minischri Meetin chyaaman wahn help evribadi fi geh inchrestid eena di meetin fi da nait. Ih wahn foakos pahn di points eena di meetin weh di kangrigayshan wahn benifit fram di moas.

  3. Taak: Ten minits. Di Laif ahn Minischri Meetin Werkbuk gat een di teem fi dis taak lang wid bowt too er chree mayn points. Wahn elda er wahn ministeeryal servant weh kwalifai ku gi dis taak. Wen wi wahn staat wahn nyoo buk a di Baibl, play di inchrodokshan veedyo fers. Di speeka ku mek kanekshanz bitween di teem a di taak ahn di veedyo if ih waahn. Bot ih fi mek shoar  ih kova di point dehn fahn eena di werkbuk. Pahn tap a dat, dipendin pahn humoch taim ih gat, ih fi mek gud yoos a di picha ahn skripcha dehn fi bring owt di mayn points.

 4. Spirichwal Chrezhaz: Ten minits. Dis da wahn kweschan-ahn-ansa diskoshan weh noh ga wahn inchrodokshan ner wahn kankloozhan. Wahn elda er wahn ministeeryal servant weh kwalifai ku handl it. Ih need fi disaid humoch taim fi gi eech kweschan dipendin pahn di needz a di kangrigayshan, bot ih need fi aks di too kweschan. Da hihn fi disaid weda er nat ih ga inof taim fi mek dehn reed aala di skripcha dehn. Aal koments fi bee 30 sekants er les.

 5. Baibl Reedin: Foa minits. Dis styoodent asainment da fi bradaz. Di styoodent fi reed di vers dehn weh asain widowt wahn inchrodokshan er wahn kankloozhan. Di meetin chyaaman wahn help dehn fi laan fi reed smood, karek, wid andastandin, an eena wahn nachral way. Ih wahn help dehn fi put feelin eena di reedin mek ih bee laivli, ahn fi paaz eena wahn nachral way fi bring owt di moas owta di reedin. Bikaaz som a di reedin asainment dehn lang an adaz shaat, di Laif ahn Minischri Meetin oavaseeya need fi tek intu kansidarayshan weh eech styoodent ku handl wen ih di mek dehnya asainment.

 6. Fifteen minits. Dis sekshan a di meetin da fi mek wi praktis fi di minischri ahn laan how wi ku du beta eena wi preechin ahn teechin. Poblishaz shuda diskos di tapik a di sampl kanvasayshan weh deh eena di Laif ahn Minischri Meetin Werkbuk. Bot, anles ih seh adawaiz, dehn ku yooz wahn difrent kweschan, skripcha, sichuwayshan, er neks kweschan weh wahn werk gud eena di loakal teritori. Di styoodent ku disaid weda er nat fi yooz wan a di poblikayshan er veedyo dehn fahn owta wi Teechin Toolbaks if dehn paat noh kohn wid spesifik inschrokshanz fi du dat. Fi help aala wi eena di minischri, di sampl kanvasayshan eena di werkbuk mait ga wahn sekshan weh naym “Yu Ku Fain Moa Infamayshan Pahn Dis Tapik Eena di Teechin Toolbaks.” Eech styoodent ku disaid weda er nat fi yooz dis sekshan eena dehn styoodent asainment. Di Laif ahn Minischri Meetin Werkbuk wahn gi di styoodent wahn set taim fi du di asainment, an ih mait gi di styoodent ada inschrokshanz tu. Di styoodent dehn noh need fi ad een ada infamayshan jos fi yooz op di taim. If di asainment dehn pripyaa gud, ih pasabl som a dehn mait eevn finish erli bai wahn minit er moa. If nesiseri, eldaz ku geh asainments tu. Sohntaim, di skejul wahn inklood wahn diskoshan a wahn veedyo weh da noh wahn sampl kanvasayshan veedyo. Wahn elda er wahn ministeeryal servant weh kwalifai wahn handl dehndeh paat.

 7. Sampl Kanvasayshan Veedyo: Wi wahn play ahn diskos sohn sampl kanvasayshan veedyo eech mont. Di veedyo dehn wahn shoa wahn sampl a di fers kaal ahn di ritern vizit. Di Laif ahn Minischri Meetin chyaaman wahn handl dis diskoshan.

 8. Fers Kaal: Eeda wahn brada er wahn sista ku du dis asainment. If da wahn brada, di howshoalda fi bee wahn brada tu, an if da wahn sista, di howshoalda fi bee wahn sista tu. Di onli way di howshoalda ku bee fahn di opozit seks da if da wahn famili memba. Dehn ku du di paat stan op er sidong wail dehn du di asainment, ih op tu dehn. Di styoodent shuda greet di persn eena wahn way weh soot di ayrya weh dehn liv. Dis paat fi bee bays pahn di tapik a di sampl kanvasayshan eena di Laif ahn Minischri Meetin Werkbuk.

 9. Ritern Vizit: Eeda wahn brada er wahn sista ku du dis asainment. Di howshoalda noh fi bee sombadi fahn di opozit seks. (km-E 5/97 p. 2) Dehn ku eeda sidong er stan op, ih op tu dehn. Di styoodent shuda shoa how fi goh bak ahn taak tu sohnbadi weh mi shoa inchres pahn di fers kaal. Dis paat shuda bays pahn di tapik a di sampl kanvasayshan eena di Laif ahn Minischri Meetin Werkbuk.

 10. Baibl Stodi: Eeda wahn brada er wahn sista ku du dis asainment. Di howshoalda noh fi bee sombadi fahn di opozit seks. (km-E 5/97 p. 2) Dehn ku eeda sidong er stan op, ih op tu dehn. Dis paat shuda shoa wahn sekshan a wahn Baibl stodi laik if ih don di hapm. Dehn noh need fi  ga wahn inchrodokshan er wahn kankloozhan anles wan a dehndeh kongsl point da weh di styoodent di werk pan. Dehn noh need fi reed aala di stodi mateeryal joorin di asainment, bot dehn kud if dehn waahn. If di mateeryal ga wahn veedyo, di styoodent fi diskos di veedyo bot noh play it. Gud teechin skilz da weh wi waahn foakos pan wid dis asainment.

 11. Taak: Dis asainment da fi bradaz onli. Dehn fi handl it az wahn taak tu di kangrigayshan.

 12. Afta di sang, di neks 15 minits a dis sekshan a di meetin wahn ga wan er too paat weh dizain fi help di aadyans yooz di Werd a Gaad eena dehn laif. Asain dehnya paat tu eldaz er ministeeryal servants weh kwalifai, anles di inschrokshanz seh adawaiz. Eni loakal needz paat shuda geh asain tu wahn elda. Wen wahn paat da wahn diskoshan weh inklood wahn aatikl eena di Laif ahn Minischri Meetin Werkbuk, di brada weh asain fi handl di paat ku aks difrent kweschanz fi help bring owt di mayn point eena di aatikl.

  13. Kangrigayshan Baibl Stodi: Terti minits. Onli eldaz weh kwalifai ku du dis paat. (Eni kangrigayshan weh shaat a eldaz ku yooz ministeeryal servants weh kwalifai if dehn need.) Di badi a eldaz shuda disaid hoo aal kwalifai fi dis. Di bradaz weh dehn aproov shuda bee bradaz weh ku kandok di stodi eena wahn way weh benifit di kangrigayshan, kip di stodi pahn taim, bring owt di mayn skripcha dehn, ahn help di aadyans si how dehn ku yooz weh dehn di stodi eena dehn day-tu-day laif. Di inschrokshanz pahn how fi kandok di Wachtowa Stodi ku help. Wans yu don kova di mateeryal fi di week prapali, yu noh need fi jreg owt di stodi fi di res a di terti minits. If pasabl, yooz difrent bradaz fi kandok ahn reed eech week. If di Laif ahn Minischri Meetin chyaaman aks fi mek di stodi finish lee erli, den di brada weh di kandok need fi disaid how hihn wahn shaatn it. Ih ku disaid noh fi reed som a di paragraaf dehn.

  14. Chree minits. Di Laif ahn Minischri Meetin chyaaman wahn goh oava som a di points fahn di meetin weh ku benifit evribadi, ahn den goh oava som a di points weh wi ku luk faawod tu pahn neks week meetin. Ih ku goh oava hoo aal ga paat pahn neks week meetin if ih ga inof taim fi du it. Anles ih seh adawaiz, eni anonksment er leta weh need fi reed tu di kangrigayshan shuda reed joorin dis paat a di meetin. Regyula infamayshan, laik regyula feel servis araynjments ahn di kleenin skejul, shudn anonks fahn di platfaam. Jos put dehn pahn di infamayshan boad. If eni anonksment er leta fi reed tu di kangrigayshan tu lang fi di chree minits weh deh pahn di skejul fi dis paat a di meetin, di chyaaman wahn haftu aks di bradaz weh ga paat pahn di Liv Yu Laif az Wahn Kristyan sekshan a di meetin fi shaatn dehn paat fi mek taim. (Adishanal infamayshan deh eena  paragraaf 13 ahn  17.) Di meetin wahn finish wid wahn sang ahn wahn pryaa.

 15. Eech styoodent shuda bring ih Reed ahn Teech broashoar, weda da dijital er paypa kapi, tu di Laif ahn Minischri Meetin eech week. Di Laif ahn Minischri Meetin chyaaman shuda bays ih kongsl ahn komendayshan pahn di broashoar. Eech styoodent wahn werk pahn di stodi point weh eena brakit saida di asainment eena di Laif ahn Minischri Meetin Werkbuk. Di “Kip Chrak a How Yu Di Du” sekshan a di broashoar da fi mek di styoodent yooz, soh di chyaaman noh wahn maak it fi dehn.

  16. Afta eech a di styoodent asainment dehn, di Laif ahn Minischri Meetin chyaaman ga bowt wan minit fi gi di styoodent komendayshan ahn kongsl bays pahn di Reed ahn Teech broashoar. Wen di chyaaman inchrojoos di styoodent, ih noh wahn anonks ih kongsl point. Bot afta di styoodent finish di asainment, di chyaaman shuda giv ahn sohn komendayshan ahn den seh weh kongsl point di styoodent mi-di werk pan. Den ih ku tel ahn eena weh way ih mi du gud, er ih ku tel  ahn eena wahn nais way wai ih wahn need fi kantinyu werk pan it. Di chyaaman ku aalso koment pahn eni ada deetaylz weh ih tink di styoodent er di aadyans ku benifit fram. Akaadn tu weh eech styoodent need, di chyaaman ku gi praivit kongsl afta di meetin er wahn nada taim. Dis kongsl shuda bays pahn di Reed ahn Teech broashoar, an ih ku bee bowt di kongsl point weh di styoodent mi-di werk pan er ih ku bee bowt wahn nada kongsl point.—Goh da  paragraaf 17,  22, ahn  23 fi moa infamayshan bowt di Laif ahn Minischri Meetin chyaaman ahn di agzilari kongsla.

     17. No paat a di meetin shuda goh oavataim, noh eevn di koments a di Laif ahn Minischri Meetin chyaaman. Eevn doa di taim weh set fi eech asainment noh seh “er les” pahn di skejul, dat noh meenz di styoodent er di brada weh asain di paat haftu yooz di ful amonk a taim. Wans dehn don kova di mateeryal prapali, dehn ku finish di paat. Di chyaaman wahn need fi stap eni styoodent weh goh oavataim, bot eena wahn nais way. If eni ada paat pahn di meetin goh oavataim, di agzilari kongsla fi gi di brada praivit kongsl. (Goh da  paragraaf 23 fi moa infamayshan.) Di hoal meetin, inkloodin di sang ahn pryaa dehn, shuda laas 1 owa ahn 45 minits.

 18. Wen di serkit oavaseeya vizit di kangrigayshan, yu wahn stil du di meetin jos laik how di skejul seh eena di Laif ahn Minischri Meetin Werkbuk eksep fi di Kangrigayshan Baibl Stodi. Insteda di stodi, di serkit oavaseeya wahn gi wahn 30-minits servis taak. Eevn doa di servis taak tek di plays a di Kangrigayshan Baibl Stodi eena di Liv Yu Laif az Wahn Kristyan sekshan a di meetin, di Laif ahn Minischri Meetin chyaaman wahn goh oava di points fahn di meetin, koment pahn di neks week meetin, ahn mek eni anonksment er reed eni leta bifoa ih inchrojoos di serkit oavaseeya. Di serkit oavaseeya wahn pik di sang fi en di meetin, ahn den afta di servis taak, da hihn wahn kloaz di meetin. Hihn ku aks wahn neks brada fi seh di pryaa if ih waahn. Joorin di serkit oavaseeya vizit, no agzilari klaas wahn deh anles da fi wahn farin langwij groop. If di kangrigayshan di sponsa wahn langwij groop, dehn ku stil ga dehn meetin joorin di serkit oavaseeya vizit. Bot dehn stil need fi jain op bak wid di hoas kangrigayshan fi di servis taak.

 19. No meetin wahn deh joorin di week wen yu ga asembli er kanvenshan. Eech famili er poblisha shuda goh oava di infamayshan fi da week deh joorin dehn famili wership.

 20. Wen di Memoaryal faal pahn wahn day joorin di week, no Laif ahn Minischri Meetin wahn deh. Af koars, di kangrigayshan ku stil plan wahn meetin fi feel servis pahn di day a di Memoaryal.

 21. Di badi a eldaz wahn pik wan a di elda dehn fi bee di Laif ahn Minischri Meetin oavaseeya. Hihn wahn rispansabl fi mek shoar di meetin wel aaganaiz ahn goh akaadn tu dehnya inschrokshanz. Hihn wahn need fi ga gud kamyoonikayshan wid di agzilari kongsla. Az soon az di Laif ahn Minischri Meetin Werkbuk kom owt, di Laif ahn Minischri Meetin oavaseeya wahn asain owt aala di midweek meetin paat dehn fi di too monts. (Adishanal infamayshan deh eena  paragraaf 2-14.) Dis inklood di styoodent asainment dehn, aala di paats weh kohn bifoa an afta di styoodent asainment dehn, ahn hoo wahn bee chyaaman owta aala di bradaz weh di badi a eldaz aproov. Evribadi weh ga paat pahn di meetin shuda geh dehn asainment at lees chree weeks bifoa di day wen dehn fi du dehn asainment. Eech wan a di styoodent dehn shuda geh di Wi Kristyan Laif ahn Minischri Meetin Asainment slip (S-89) wid aala di infamayshan ful owt pan it. Di Laif ahn Minischri Meetin oavaseeya fi mek shoar dat wahn kapi a di meetin skejul wid aala di asainment dehn shuda deh pahn di infamayshan boad. Di badi a eldaz ku asain wahn nada elda er ministeeryal servant fi help ahn. Bot onli yooz eldaz fi asain owt di paats weh kohn bifoa an afta di styoodent asainment dehn.

  22. Eech week, wan a di elda dehn wahn serv az di chyaaman fi di Laif ahn Minischri Meetin. (If di kangrigayshan shaat a eldaz, yu ku yooz ministeeryal servants weh kwalifai.) Hihn rispansabl fi pripyaa di inchrodokshan ahn di fainal koments fi di meetin, ahn fi diskos di sampl kanvasayshan veedyo. Da hihn wahn inchrojoos eech paat pahn di meetin, ahn dipendin pahn di amonk a bradaz weh deh pahn di badi a eldaz, hihn mait need fi help wid ada paats a di meetin, espeshali paats weh jos inchrojoos wahn veedyo widowt diskos it. Eni koments weh hihn mek bitween eech paat shudn tek op tu moch taim. Di badi a eldaz disaid hoo aal kwalifai fi bee chyaaman. Eech elda weh kwalifai wahn geh ih tern fi bee chyaaman. Dipendin pahn humoch eldaz kwalifai, di Laif ahn Minischri Meetin oavaseeya mait serv az chyaaman moa dan di ada bradaz. If wahn elda kwalifai fi du di Kangrigayshan Baibl Stodi, den ih praabli kwalifai fi bee chyaaman tu. Pleez memba dat di elda weh serv az chyaaman wahn need fi bee sombadi weh ku bee kain ahn pazitiv eena di komendayshan ahn kongsl weh dehn gi tu di difrent styoodent dehn. Ih fi bee sombadi weh ku kip di meetin pahn taim tu. (Adishanal infamayshan deh eena  paragraaf 14 ahn and  17.) If di chyaaman prifaa, ahn if nof spays deh, yu ku put wahn standin maik pahn di said a di stayj soh dat hihn ku anonks di difrent paat fahn deh wail di speeka goh da di mayn maik wan taim widowt haftu wayt. Sayhn way, di chyaaman mait prifaa sidong da wahn taybl joorin di Baibl reedin asainment ahn di Werk Haad fi Du Beta Eena di Minischri sekshan a di meetin. Dehnya opshan mait sayv taim.

   23. If pasabl, ih bes fi mek wahn elda wid lata ekspeeryens bee di agzilari kongsla. Di agzilari kongsla rispansabl fi gi praivit kongsl tu eldaz ahn ministeeryal servants if dehn need it. Ih ku bee fi paats pahn di Laif ahn Minischri Meetin er fi poblik taak. Ih ku aafa kongsl pahn di way how dehn kandok er reed fi di Wachtowa Stodi er Kangrigayshan Baibl Stodi. (Adishanal infamayshan deh eena  paragraaf 17.) If lata eldaz eena di kangrigayshan da gud speeka ahn teecha, den wahn difrent brada ku serv az agzilari kongsla eech yaa. Ih noh nesiseri fi mek di agzilari kongsla aafa kongsl afta eech asainment.

 24. Dipendin pahn humoch styoodents eena di kangrigayshan, ih mait pasabl fi ga agzilari klaas fi di Laif ahn Minischri Meetin. Eech agzilari klaas need fi ga wahn kongsla, an ih beta mek ih bee wahn elda. If yu shaat a eldaz, yu ku yooz ministeeryal servant weh kwalifai. Di badi a eldaz disaid hoo kwalifai fi dis ahn weda er nat wan brada wahn du it er yu wahn skejul wahn difrent brada eech week. Di kongsla fi fala di inschrokshanz eena  paragraaf 16. If yu ga wahn agzilari klaas, di styoodents wid asainment gwehn da di klaasroom rait afta di Spirichwal Chrezhaz paat eena di Chrezhaz Fahn di Werd a Gaad sekshan a di meetin. Den dehn wahn jain op bak wid di mayn aadyans afta di Werk Haad fi Du Beta Eena di Minischri sekshan a di meetin. Wen di Laif ahn Minischri Meetin chyaaman wahn diskos wahn veedyo, di aadyans eena di agzilari klaasroom ku tai een tu di diskoshan fahn weh dehn deh if dat pasabl. Adawaiz, di agzilari kongsla ku handl it wid wahn foan, tablet, er laptap rait deh eena di agzilari klaasroom.

 25. Sertn veedyo wahn skejul fi play joorin di meetin dehn. Dehnya veedyo wahn avaylabl eena di JW Library ap ahn yu ku play dehn pahn aal kaina divais. Now an agen yu ku yooz di sampl kanvasayshan veedyo dehn fi yu meetinz fi feel servis.