Maika 6:1-16
6 Unu peepl, lisn tu weh Jehoava ga fi seh.
Get op ahn prizent unu leegal kays fronta di mongtin dehn,Ahn mek di hil dehn hyaa unu vais.
2 Tu aala di mongtin dehn, weh da di schrang fongdayshan fi di ert,Unu lisn tu Jehoava leegal kays.Unu lisn, bikaaz Jehoava ga wahn kays wid ih peepl.Yes, ih di prizent wahn leegal kays gens Izrel. Dis da weh ih wahn tel ih peepl:
3 “Mi peepl, Ai du unu sohnting?
Ah mek laif haad fi unu er sohnting?
Tel mi, shoa mi proof.
4 Ai da di wan weh bring unu owta EejipAhn sayv unu soh dat unu neva haftu bee slayv agen;Ai eevn sen Moaziz, Ayron, ahn Miryam fi help unu.
5 Mi peepl, pleez memba weh Baylak, di king a Moawab, mi waahn du,Ahn how Beeyor son Baylam mi ansa.Memba weh mi hapm fahn Shitim tu Gilgal,Soh dat unu ku riyalaiz dat Jehoava du wahn lata gud tingz fi unu.”
6 Weh Ah wahn bring wen Ah kohn fronta Jehoava?
Wen Ah bow dong fronta Gaad, da weh Ah wahn bring?
Wen Ah goh fronta hihn, Ah wahn aafa op sohn bon aafrin,*Sohn kyaaf weh onli wan yaaz oal?
7 Jehoava wahn hapi if Ai aafa op towznz a ram,Er wahn hoal lata ail?
Ai wahn sakrifais mi fersbaan son,Mi oan pikni, fi di sin weh Ai komit?
8 Weh Jehoava di ekspek fahn unu?
Ih don tel unu;
Di onli ting weh ih di aks unu fi du da fi bee fyaa, fi lov laayalti,Ahn fi bee hombl fronta unu Gaad!
9 Jehoava di kaal owt tu di peepl fahn di siti;Di peepl weh waiz wahn rispek ih* naym.
Pay atenshan tu di ponishment ahn tu di wan weh di dish it owt.
10 Di wikid peepl dehn stil ga chrezhaz eena dehn hows weh dehn geh fahn di du wikid tingz?Dehn stil ga di faals mezharin kantayna* weh Gaad hayt?
11 Ah ku stil bee kleen* fronta Gaad if Ah yooz wahn skayl weh noh gi di karek wayt,An if Ah yooz wahn stoan wayt weh noh ga di prapa wayt?
12 Di siti ful a rich man weh onli vailent,Ahn di peepl weh liv deh onli laiyad;Evriting weh kom owta dehn mowt da loan lai.
13 “Soh dat da wai Ah wahn ponish unu;Ah wahn dischrai unu lan ahn lef it emti bikaaz a unu sinz.
14 Unu wahn eet, bot unu noh wahn feel satisfai;Unu wahn staav.
Unu wahn kehr unu bilanginz sohnweh sayf, bot unu wahn stil kyaahn hoal aan tu dehn.Ahn wateva unu manij fi kip sayf, Ah wahn han oava tu unu enimiz.
15 Unu wahn plaant, bot unu noh wahn reep notn.
Unu wahn mash alivz fi mek ail, bot unu noh wahn yooz di ail;An unu wahn mek sweet wain, bot unu noh wahn jrink non a it.
16 Unu mi obay Omrai laa dehn ahn fala evriting weh Ayhab an ih famili mi du,An unu mi lisn tu dehn advais.
Dat da wai evribadi wahn shak wen dehn si unu,Ahn dehn wahn mak unu.Unu wahn jos haftu liv wid di fak dat peepl fain unu disgostin.”
Futnoat
^ Si di Glasari, “Bon aafrin.”
^ Lit., “yu.”
^ Er “di eefa mezha weh noh kompleet.” Si Apendiks B14.
^ Er “inosent.”
