Habakuk 1:1-17
1 Ai, di prafit Habakuk,* mi geh wahn mesij eena wahn vizhan. Ah mi seh:
2 Oa Jehoava, da how lang Ah wahn krai owt tu yu fi help, ahn yu noh lisn tu mi?
How lang Ah haftu aks yu fi put wahn stap tu aal di vailens, bot yu noh du notn bowt it?
3 Da wai yu mek Ah si aala dehnya bad tingz weh di hapm?
Ahn da wai yu lef peepl fi chreet adaz kruwil?
Aal weh Ah di si da vailens ahn di chrobl weh ih kaaz.
Ahn soh moch peepl di kwaaril ahn kyaahn get lang wid eech ada.
4 Di laa noh ga no powa,Ahn dat da wai peepl noh geh jostis.
Wikid peepl chreet raichos peepl kruwil;Dat da wai evriting soh korop ahn reel jostis noh deh.
5 “Luk pahn di ada nayshan dehn ahn noatis weh wahn hapm tu dehn!
Ahn wach gud, bikaaz yu wahn shak;Eena yu laiftaim sohnting wahn hapm,Ahn yu noh wahn bileev it eevn if dehn mi don tel yu ih wahn hapm.
6 Ah wahn gi powa tu di peepl dehn fahn Kaldeeya;Dehn da wahn kruwil nayshan, ahn dehn du tingz widowt tink.
Dehn maach aal oava di ertAhn jos tek weh ada peepl hows.
7 Dehn da wahn skayri set a peepl.
Dehn disaid weh fyaa, ahn dehn noh rispek enibadi weh mait ga moa powa dan dehn.
8 Dehn haas dehn faasa dan di lepad dehn,Ahn di peepl skayriya dan di wulf dehn wen dehn hont da nait.
Di haas dehn weh dehn yooz fi waar ron faas,Ahn dehn kohn fahn faar.
Ahn di peepl atak laik wahn eegl weh daiv dong faas fi kech sohnting fi eet.
9 Aala dehn kohn set fi du vailent tingz.
Wen dehn gyada tugeda, dehn da jos laik di schrang breez weh bloa fahn di ees,Ahn dehn rayk op priznaz laik if dehn da san.
10 Dehn tek di king dehn mek papishohAhn laaf aata di hai ofishal dehn.
Dehn laaf aata di schrang sitiz;Dehn pail op dert fi mek wahn ramp soh dat dehn ku kraas oava ahn kyapcha dehndeh schrang siti.
11 Den dehn paas chroo da lan faas laik wahn schrang breez,Bot dehn wahn geh ponish,Bikaaz dehn seh dat dehn gaad gi dehn da powa.”*
12 Oa Jehoava, yoo mi aalwayz egzis.
Mi Gaad, yoo da di Hoali Gaad, ahn yu wahn neva ded.*
Oa Jehoava, yu yooz dehn fi bring jojment pahn wi;Mi Rak, yoo pik dehn fi ponish wi.
13 Yoo tu pyoar fi luk pahn tingz weh eevl;Yu noh talarayt wikidnis.
Soh wai yu talarayt peepl weh chriki?Ahn wai yu noh seh notn wen wahn wikid persn dischrai wahn persn weh noh az wikid az hihn?
14 Wai yu lef peepl fi bee laik di fish dehn eena di see,Fi bee laik di see animal dehn weh noh ga no leeda fi protek dehn?
15 Dehn* haal een peepl wid wahn fish huk.
Dehn kech peepl eena dehn net,Ahn dehn gyada peepl eena dehn fishin net.
Dat da wai dehn soh hapi.
16 Dat da wai dehn aafa sakrifais tu dehn net,An dehn aafa sakrifais tu dehn fishin net;Bikaaz dat da how dehn get aala dehn nais food.Ahn di food weh dehn get da di bes.
17 Dehn stay di kech op peepl eena dehn net ahn di emti it owt.* How lang dat wahn kantinyu?
How lang dehn wahn kantinyu fi kil op di peepl fahn di nayshanz wid no mersi?
