Praverbz 4:1-27

  • Sohn waiz inschrokshan fahn wahn pa (1-27)

    • Du aal weh yu kud fi geh wizdom (7)

    • Noh goh pahn di road weh wikid peepl waak pan (14, 15)

    • Di road weh raichos peepl waak pan geh braita (18)

    • “Protek yu haat” (23)

4  Mi son dehn, lisn tu unu pa wen ih karek unu.Pay atenshan soh dat unu ku bee waiz,   Bikaaz Ah wahn teech unu gud tingz,Soh noh rijek di tingz weh Ah wahn teech unu.*   Ai da-mi wahn gud son tu mi pa,Ahn mi ma mi lov mi moa dan enibadi els.   Mi pa teech mi an ih seh: “Kip di tingz weh Ah tel yu eena yu haat. Obay mi komanment dehn, ahn yu wahn liv fi wahn lang taim.   Du aal weh yu kud fi geh wizdom an andastandin. Noh ferget weh Ah tel yu, ahn noh ton weh fan it needa.   Noh rijek wizdom, an ih wahn protek yu. Lov it, an ih wahn kip yu sayf.   Wizdom da di moas impoatant ting,* soh du aal weh yu kud fi geh wizdom.Lang wid evriting els weh yu get, mek shoar yu geh andastandin.   Mek wizdom bee preshos tu yu, an ih wahn prayz yu. Ih wahn aana yu bikaaz yu hoal it kloas tu yu.   Ih wahn put wahn byootiful krong pahn yu hed,An ih wahn mek yu luk byootiful.” 10  Mi son, lisn tu mi ahn pay atenshan tu di tingz weh Ah tel yu,Ahn yu wahn liv wahn lang laif. 11  Ah wahn teech yu soh dat yu ku bee waiz,An Ah wahn gaid yu soh dat yu ku du weh rait. 12  Notn wahn deh eena yu way wen yu di waak,An if yu ron, yu noh wahn jrap dong. 13  Hoal aan tu disiplin; noh let it goh. Protek it, bikaaz ih wahn kip yu alaiv. 14  Noh goh pahn di road weh wahn wikid persn waak pan,Ahn noh waak pahn di road weh wikid peepl waak pan. 15  Stay weh fan it, noh goh pan it.Stay faar fan it, ahn waak pahn wahn nada road. 16  Wikid peepl noh goh sleep til dehn du sohnting bad. Dehn looz owt pahn sleep bikaaz dehn stay op fi hert sombadi. 17  Wikidnis da laik bred fi dehn,Ahn vailens da laik wain fi dehn. 18  Bot di road weh raichos peepl waak panDa laik di brait lait da maanin weh geh braita ahn braita til di midl a di day. 19  Wikid peepl da laik sombadi weh waak pahn wahn daak daak road.Dehn jrap dong, bot dehn noh noa wai. 20  Mi son, pay atenshan tu di tingz weh Ah di seh;Lisn gud tu di tingz weh Ah di tel yu. 21  Noh ferget dehn;Kip dehn deep eena yu haat, 22  Bikaaz peepl weh fain dehndeh tingz wahn geh laif,Ahn dehn badi wahn helti. 23  Protek yu haat moa dan eniting els,Bikaaz dat da weh wahn gi yu laif. 24  Noh tel lai, ahn noh chrik peepl wid weh yu seh. 25  Mek yu aiy dehn luk schrayt heda yu,Ahn kip di luk* pahn weh deh fronta yu. 26  Geh rid a eniting weh deh eena yu way,Ahn di road weh yu waak pan wahn bee sayf. 27  Noh goh tu di rait ner tu di lef. Kip yu fut dehn faar fahn badnis.

Futnoat

Er “noh rijek mi laa.”
Er “di mayn ting.”
Er “Ahn mek yu brait aiy dehn kip di luk.”