Machyu 22:1-46
22 Den Jeezas yooz sohn iloschrayshan fi teech dehn agen; ih seh:
2 “Di Kingdom a hevn da laik wahn marij fees weh wahn king mi ga fi ih son.
3 Ih sen som a ih slayv fi goh kaal aal di wan dehn weh mi geh wahn invitayshan tu di marij fees, bot dehn neva waahn kom.
4 Den di king sen sohn moa slayv; ih tel dehn, ‘Tel di wan dehn weh geh wahn invitayshan: “Ah don pripyaa dina, an Ah don slaata di fatis a mi animal dehn, an evriting redi fi di marij fees. Soh unu kohn da di wedn.”’
5 Bot di peepl ignoar dehn ahn gaahn du ada tingz, som gaan da dehn feel, an adaz gaahn tek kayr a dehn bizniz;
6 bot di res a di peepl grab ih slayv dehn an insolt dehn op ahn kil dehn.
7 “Di king geh beks bad wid dehn an ih sen sohn soalja fi kil dehndeh merdaraz ahn bon op dehn siti.
8 Den di king tel ih slayv dehn, ‘Di marij fees redi, bot di wan dehn weh Ah mi invait neva dizerv fi kom.
9 Soh unu goh an invait evribadi weh unu fain pahn di mayn road dehn fi kohn tu di marij fees.’
10 Soh, di slayv dehn gaan owt pahn di mayn road dehn ahn bring evribadi weh dehn kuda mi fain, noh kay if dehn mi wikid er gud. Ahn di wedn haal geh ful op wid ges.
11 “Wen di king kohn fi inspek di ges dehn, ih mi noatis wahn man weh neva gat aan sootabl kloaz fi wahn wedn.
12 Soh ih aks ahn, ‘Mi fren, da how yoo get een ya widowt sootabl kloaz fi wahn wedn?’ Di man neva noa weh fi seh.
13 Den di king tel ih slayv dehn, ‘Tai op ih han an ih fut ahn chroa ahn owtsaid eena di daaknis. Da rait deh ih wahn moan ahn baal ahn grain op ih teet.’
14 “Kaaz lata peepl mi geh wahn invitayshan, bot onli wahn lee bit a dehn geh pik.”
15 Den di Farisee dehn mi waahn akyooz ahn soh dehn gaahn plan op tugeda fi si how dehn kuda mi chrik ahn fi seh sohnting rang.
16 Soh dehn sen fi dehn disaipl lang wid som a di paati falowaz a Herod tu Jeezas, ahn seh: “Teecha, wi noa yu aalwayz taak di chroot ahn teech di chroot bowt Gaad. Ahn yoo noh di luk fi prayz fahn peepl, bikaaz yu chreet evribadi di saym way.
17 Soh tel wi weh yoo tink? Ih rait fi pay taks* tu Seeza er nat?”
18 Bot Jeezas mi noa dehn wikid plan, soh ih tel dehn: “Da wai unu di chrai tes mi? Unu hipokrit unu!
19 Shoa mi wahn taks koin.” Soh dehn bring wahn denayriyos far ahn.
20 Hihn tel dehn: “Fi hoo fays ahn naym deh pahn dis?”
21 Dehn seh: “Seeza.” Den Jeezas tel dehn: “Wel den, pay bak Seeza tingz tu Seeza, bot pay bak Gaad tingz tu Gaad.”
22 Wen dehn hyaa dat, dehn mi shak, ahn dehn lef ahn loan ahn gaahn dehn way.
23 Pahn da saym day, di Sadyusee dehn, hoo neva bileev eena di rezorekshan, kohn tu ahn an aks:
24 “Teecha, Moaziz mi seh: ‘If wahn man ded ahn neva ga chiljren, ih breda haftu marid ih sista-in-laa ahn ga chiljren fi ih breda weh ded.’
25 Dehn mi ga sevn breda. Di oaldis breda marid ahn ded, ahn neva ga no chiljren, soh ih breda marid di uman.
26 Di saym ting hapm tu di sekant ahn di terd, til sevn a dehn marid di uman.
27 Ahn pahn di en, di uman ded tu.
28 Soh eena di rezorekshan, wich wan owta di sevn breda wahn geh shee az ih waif? Kaaz aala dehn mi marid tu ahn.”
29 Jeezas ansa dehn: “Unu rang, kaaz unu noh noa di Skripchaz ner how di powa a Gaad aparayt;
30 bikaaz eena di rezorekshan man ner uman noh wahn geh marid. Insted, dehn wahn bee laik di aynjel dehn da hevn.
31 Unu neva reed weh Gaad mi seh bowt di rezorekshan? Ih seh:
32 ‘Ai da di Gaad a Aybraham ahn di Gaad a Aizak ahn di Gaad a Jaykop.’ Hihn da di Gaad a di livin, ahn noh di Gaad a di ded.”
33 Wen di krowd a peepl hyaa dat, dehn mi sopraiz bowt di tingz weh hihn mi-di teech dehn.
34 Wen di Farisee dehn hyaa dat di Sadyusee dehn kudn gi Jeezas wahn ansa, dehn aal gaahn tu hihn az wahn groop.
35 Ahn wan a di teecha dehn a di Laa aks wahn kweschan fi tes ahn; ih aks:
36 “Teecha, wich wan a di komanment dehn a di Laa a Moaziz da di moas impoatant wan?”
37 Hihn tel ahn: “‘Yu fi lov Jehoava yu Gaad wid yu hoal haat ahn wid yu hoal soal* ahn wid yu hoal main.’
38 Dis da di fers komanment ahn di moas impoatant wan.
39 Di sekant wan da dis: ‘Yu fi lov yu nayba jos laik how yu lov yuself.’
40 Di hoal Laa ahn di werdz a di prafit dehn bays pahn dehnya too komanment.”
41 Ahn wail di Farisee dehn mi stil deh tugeda, Jeezas aks dehn:
42 “Weh unu tink bowt di Krais? Hoo da fi hihn ansesta?” Dehn tel ahn: “Dayvid.”
43 Soh hihn aks dehn: “Wel den, da how komz di hoali spirit mi gaid Dayvid fi kaal ahn Laad? Dayvid mi seh:
44 ‘Jehoava seh tu mi Laad: “Sidong pahn mi rait han said til Ah put yu enimi dehn anda yu fut.”’
45 Soh if Dayvid kaal ahn Laad, how di Krais wahn bee ih son?”
46 Wel, nobadi kuda mi ansa ahn, an fahn da day deh, non a dehn mi ga di korij fi aks ahn wahn nada kweschan.
