Machyu 21:1-46
-
Jeezas enta Jeroosalem (1-11)
-
Jeezas chroa owt evribadi weh mi-di bai ahn sel eena di templ (12-17)
-
Jeezas put wahn kers pahn wahn fig chree (18-22)
-
Dehn kweschan Jeezas atariti (23-27)
-
Di iloschrayshan a di too son dehn (28-32)
-
Di iloschrayshan a di faamaz weh komit merda (33-46)
-
Di moas impoatant kaanastoan (42)
-
21 Wen dehn geh kloas tu Jeroosalem, dehn stap da Betfaji da di mongtin weh naym di Mongt a Alivz, ahn Jeezas tel too a ih disaipl:
2 “Goh da di vilij weh deh heda unu, an unu wahn fain wahn dongki an ih yong wan tai op. Loos dehn ahn bring dehn fi mi.
3 If enibadi tel unu eniting, jos seh, ‘Di Laad need dehn.’ Ahn rait away ih wahn sen dehn.”
4 Dis mi akchwali hapm soh dat weh Gaad mi seh chroo di prafit kohn chroo; Ih mi seh:
5 “Tel di daata a Zaiyan: ‘Yu king di kohn tu unu. Hihn hombl an ih di sidong pahn wahn dongki, pahn wahn yong dongki.’”
6 Soh di disaipl dehn gaan ahn du egzakli weh Jeezas tel dehn fi du.
7 Dehn bring di dongki an ih yong wan, ahn dehn put dehn jakit pahn dehn, den hihn sidong pahn di yong dongki.
8 Moas a di peepl staat tu spred dehn jakit pahn di road, ahn sohn adaz mi-di kot dong sohn branch fahn di chree dehn ahn spred dehn owt fronta ahn.
9 Pahn tap a dat, di krowd weh mi-di goh heda ahn an di wan dehn weh mi-di fala ahn mi stay di showt: “Gaad, wi di bayg yu, sayv di Son a Dayvid! Jehoava bles di wan weh kom eena fi hihn naym! Sayv ahn, wi pray, yoo weh liv da hevn!”
10 Ahn wen ih geh da Jeroosalem, di hoal siti mi deh eena wahn big komoashan; dehn mi-di aks: “Da hoo dis?”
11 Di krowd seh: “Dis da di prafit Jeezas; hihn da fahn Nazaret eena Gyalilee!”
12 Den Jeezas gaan eena di templ ahn chroa owt evribadi weh mi-di bai ahn sel eena di templ. An ih ton oava di taybl dehn a di peepl weh mi-di chaynj moni, an ih ton oava di bench dehn a di wan dehn weh mi-di sel dov.
13 An ih tel dehn: “Di Skripchaz seh, ‘Mai hows wahn bee wahn hows a pryaa,’ bot unu ton it intu wahn hows fi di teef dehn.”
14 Wail Jeezas mi deh da di templ, peepl weh mi blain ahn kudn waak kohn tu ahn, an ih kyoar dehn.
15 Wen di cheef prees ahn di skraib dehn si di mirakl dehn weh ih mi-di du, ahn hyaa how di chiljren mi-di hala eena di templ, “Gaad, wi di bayg yu, sayv di Son a Dayvid!” dehn neva hapi wid dat ataal.
16 Dehn tel ahn: “Yoo hyaa weh dehnya chiljren di seh?” Jeezas tel dehn: “Yes, Ah hyaa dehn. Bot unu neva reed dehnya werdz, ‘Yu kaaz chiljren an infants fi prayz yu wid dehn mowt’?”
17 Den ih lef di siti, ahn gaan da Betani ahn spen di nait deh.
18 Wail ih mi-di goh bak tu Jeroosalem soon da maanin, ih mi feel hongri.
19 Ih si wahn fig chree bai di roadsaid ahn gaahn bai di chree, bot ih neva fain eni froot pan it, onli leef, an ih tel di chree: “Fahn now aan, yu wahn neva bayr froot.” Ahn di chree jrai op pahn di spat.
20 Wen di disaipl dehn si dis, dehn mi sopraiz ahn seh: “How di fig chree jrai op soh kwik?”
21 Jeezas ansa dehn: “Ah di tel unu di chroot, if unu ga fayt ahn noh dowt, unu noh onli wahn du wat Ai mi du tu di fig chree, bot unu wahn seh tu dis mongtin, ‘Get op ahn chroa yuself eena di see,’ an ih wahn hapm.
22 If unu ga fayt, unu wahn get aala di tingz weh unu di pray fa.”
23 Afta ih gaan eena di templ, di cheef prees ahn di Jooish leedaz a di peepl kom op tu ahn wail ih mi-di teech an aks ahn: “Weh atariti yoo ga fi du dehnya tingz? Ahn da hoo gi yoo di atariti fi du dehn?”
24 Jeezas tel dehn: “Wel, Ai ga sohnting fi aks unu tu. If unu ansa mi, den Ai wahn tel unu fahn hoo Ai geh di atariti fi du dehnya tingz:
25 Da fahn hoo Jan geh di atariti fi baptaiz peepl? Fahn Gaad* er fahn man?” Bot dehn staat tu taak monks dehnself ahn seh: “If wi seh, ‘Fahn Gaad,’ den ih wahn tel wi, ‘Wai unu neva bileev Jan den?’
26 Ahn wi frayd fi seh, ‘Fahn man,’ kaaz hoo noaz weh di krowd mait du, kaaz tu dehn, Jan da-mi wahn prafit.”
27 Soh dehn tel Jeezas: “Wee noh noa.” Soh hihn tel dehn: “Wel den, Ai noh wahn tel unu da hoo gi mee di atariti fi du dehnya tingz needa.
28 “Weh unu tink bowt dis? Wahn man mi ga too son. Ih gaahn tu di oalda wan ahn seh, ‘Son, goh werk eena di grayp aachad tudeh.’
29 Di oalda son seh, ‘Ai noh waahn goh,’ bot aftawodz, ih mi feel sari an ih gaan.
30 Den di pa gaahn tu di yonga son ahn tel ahn di saym ting. Di son tel ih pa, ‘Ah gwehn,’ bot ih neva did gaan.
31 Wich wan a dehnya too son mi du weh di pa mi waahnt?” Dehn seh: “Di oalda wan.” Den Jeezas tel dehn: “Ah di tel unu, di taks kalekta ahn prastichoot dehn di goh heda unu eena di Kingdom a Gaad.
32 Bikaaz Jan mi kom ahn shoa unu di rait way,* bot unu neva bileev ahn. Bot, di taks kalekta ahn prastichoot dehn mi bileev ahn, an eevn wen unu mi si dis, unu stil neva feel sari ahn bileev ahn.
33 “Lisn tu dis ada iloschrayshan: Dehn mi ga dis man weh mi oan lan. Ih mi plaant wahn grayp aachad ahn put wahn fens rong it an ih dig owt wahn plays fi skweez di grayps fi mek wain. Afta dat, ih bil wahn towa ahn rent owt di aachad tu sohn faamaz ahn gaahn chravl faar fahn hoam.
34 Wen di taim kohn fi haavis di grayps, ih sen ih slayvz fi goh tu di faama dehn fi kalek fi hihn shayr a di grayps.
35 Bot di faama dehn tek ih slayvz ahn beet op wan a dehn, kil wan, ahn stoan wahn neks wan.
36 Ih sen sohn ada slayvz, moa dan di fers groop, bot dehn du di saym ting tu dehnya wan.
37 Fainali, ih sen ih oan son; ih seh, ‘Dehn wahn rispek mi son.’
38 Wen di faama dehn si di son, dehn seh monks dehnself, ‘Dis da di wan weh wahn geh di aachad. Unu kom, mek wi kil ahn an geh fi hihn inheritans!’
39 Soh dehn tek ahn an jreg ahn owta di grayp aachad ahn kil ahn.
40 Soh weh unu tink di oana a di aachad wahn du tu dehndeh faama wen ih kom?”
41 Dehn tel ahn: “Hihn wahn kil eech an evri wan a dehn bikaaz dehn eevl, an ih wahn rent owt di aachad tu sohn ada faama weh wahn giv ahn fi hihn shayr a di grayps wen dehn di haavis.”
42 Jeezas tel dehn: “Di Skripchaz seh, ‘Di stoan weh di bilda dehn neva waahn en op fi bee di moas impoatant kaanastoan.* Dis kohn fahn Jehoava, ahn da wahn mirakl tu wee.’ Unu neva reed dat den?
43 Dat da wai Gaad wahn tek weh di blesinz a di Kingdom fahn unu ahn gi dehn tu peepl weh di du weh hihn waahn.
44 Ahn di persn weh bok ih fut ahn jrap pahn dis stoan wahn geh bad hert. Bot if dis stoan jrap pahn enibadi, ih wahn kil dehn.”
45 Wel, wen di cheef prees ahn di Farisee dehn hyaa ih iloschrayshanz, dehn mi noa dat hihn mi-di taak bowt dehn.
46 Dehn mi waahn ares ahn, bot dehn mi frayd, kaaz di krowd mi si ahn az wahn prafit.
