Machyu 17:1-27

  • Jeezas hoal apyaarans chaynj (1-13)

  • “Fayt di saiz a wahn lee mostad seed” (14-21)

  • Jeezas taak bowt ih det agen (22, 23)

  • Dehn pay di taks wid di silva koin weh dehn fain eena di fish mowt (24-27)

17  Siks dayz layta, Jeezas kehr Peeta, Jaymz an ih breda Jan lang wid ahn op pahn wahn hai mongtin bai dehnself.  Den ih hoal apyaarans chaynj fronta dehn, an ih mi luk difrent tu dehn; ih fays staat tu shain brait laik di son, an ih kloaz geh az wait az lait.  An aal af a sodn, Moaziz an Ilaija apyaa fronta dehn di taak wid Jeezas.  Den Peeta seh tu Jeezas: “Laad, da wahn privilij fi mek wi deh ya! If yu waahn, Ah ku bil chree tent ya, wan fi yoo, wan fi Moaziz, ahn wan fi Ilaija.”  Wail Peeta mi stil di taak, wahn brait klowd kom oava dehn, ahn wahn vais fahn owta di klowd seh: “Dis da mai Son, di wan weh Ah onli lov, ahn di wan weh Ah pleez wid. Unu mos lisn tu ahn.”  Wen dehn mi hyaa dat, di disaipl dehn geh frayd ahn neel dong wid dehn fays tu di grong.  Den Jeezas kohn kloas tu dehn, an ih toch dehn ahn seh: “Get op. Noh bee frayd.”  Wen dehn luk op, dehn neva si nobadi els eksep Jeezas.  Wen dehn mi-di kohn dong fahn di mongtin, Jeezas koman dehn: “Noh tel nobadi bowt di vizhan til di Son a man rayz op bak fahn di ded.” 10  Bot di disaipl dehn aks Jeezas: “Da wai di skraib dehn seh dat Ilaija haftu kohn bifoa di Krais?” 11  Jeezas ansa dehn: “Ilaija di kohn fi chroo an ih wahn get evriting redi. 12  Bot Ah di tel unu dat Ilaija don kom aredi, ahn di peepl neva rekonaiz ahn, an dehn mi du aal kaina bad tingz tu ahn. Eena da saym way, dehn wahn mek di Son a man sofa tu.” 13  Den di disaipl dehn riyalaiz dat Jeezas mi-di taak bowt Jan di Baptis. 14  Wen dehn kohn tuwaadz di krowd, wahn man kohn tu Jeezas ahn neel dong, ahn seh: 15  “Laad, ga mersi pahn mi son, ih ga fits an ih sik bad. Ih aalwayz di faal dong eena di faiya an eena waata. 16  Ah bring ahn tu yu disaipl dehn, bot dehn kudn kyoar ahn.” 17  Den Jeezas seh: “Unu da wahn korop jenarayshan weh noh ga no fayt. Da how lang Ah fi deh ya wid unu? Da how lang Ah shuda talarayt unu? Bring di bwai ya fi mi.” 18  Den Jeezas koman di deemon shaap-wan fi kom owta di bwai, an ih kom owt, ahn fahn da owa ih geh kyoar. 19  Den di disaipl dehn kohn taak tu Jeezas eena praivit an aks: “Da wai wee kudn jraiv owt di deemon?” 20  Jeezas tel dehn: “Da bikaaz unu fayt noh schrang. Bot Ah di tel unu, if unu ga fayt di saiz a wahn lee mostad seed, unu ku tel dis mongtin, ‘Moov fahn ya ahn goh oava deh,’ an ih wahn moov, ahn notn wahn impasabl fi unu.” 21  *—— 22  Wen Jeezas an ih disaipl dehn mi deh tugeda da Gyalilee, ih tel dehn: “Sombadi wahn bichray di Son a man ahn han ahn oava tu ih enimiz, 23  ahn dehn wahn kil ahn, an pahn di terd day hihn wahn rayz op bak fahn di ded.” An ih disaipl dehn haat geh hevi. 24  Afta Jeezas an ih disaipl dehn reech da Kapernyam, di man dehn weh mi-di kalek di templ taks* kohn tu Peeta ahn seh: “Fi unu teecha pay di templ taks er nat?” 25  Hihn seh: “Yes, hihn pay it.” Bot wen ih gaan eena di hows, Jeezas taak tu hihn fers ahn seh: “Saiman, weh yoo tink? Fahn hoo di king dehn a di werl kalek hed taks er di ada taks dehn? Fahn dehn chiljren er ada peepl?” 26  Wen ih ansa: “Fahn di ada peepl,” Jeezas tel ahn: “Wel den, dat meenz di chiljren noh haftu pay taks. 27  Bot jos soh dat wi noh ofen nobadi, goh da di see, ahn chroa een yu fishin lain, ahn bring di fers fish weh yu kech, ahn wen yu oapm ih mowt, yu wahn fain wahn silva koin.* Tek di koin ahn goh pay di taks fi di too a wi.”

Futnoat

Dis vers noh deh eena som a di oalda manyuskrip dehn ahn praabli da noh paat a di Hoali Skripchaz.
Lit., “di dobl jrakma.”
Lit., “stayter koin,” weh dehn tink fi bee di techrajrakma.