Look 22:1-71
-
Di prees dehn fain di bes way fi kil Jeezas (1-6)
-
Di disaipl dehn mek preparayshan fi di Paasoava meel (7-13)
-
Jeezas staat op di selibrayshan a Krais Eevnin Meel (14-20)
-
“Di persn weh wahn bichray mi di sidong wid mi ya da di taybl” (21-23)
-
Wahn heetid aagyument bowt hoo moa impoatant (24-27)
-
Di kovenant weh Jeezas mek fi wahn kingdom (28-30)
-
Jeezas seh dat Peeta mi wahn disoan ahn (31-34)
-
Bee pripyaa; di too soad dehn (35-38)
-
Jeezas pray pahn di Mongt a Alivz (39-46)
-
Dehn ares Jeezas (47-53)
-
Peeta dinai Jeezas (54-62)
-
Dehn mek fon a Jeezas (63-65)
-
Dehn joj Jeezas eena di Sanhejrin (66-71)
22 Now di Festival a di Bred Widowt Ees, weh da-mi di Paasoava, mi deh kloas.
2 Ahn di cheef prees dehn ahn di skraibz mi-di chrai fain di bes way fi kil Jeezas, bikaaz dehn mi frayd fi weh di peepl dehn mi wahn du.
3 Den Saytan get eena Joodas Iskariyat, wan a di 12 apasl.
4 Soh Joodas gaahn taak tu di cheef prees ahn di kyaptin dehn a di templ bowt how fi bichray Jeezas tu dehn.
5 Dehn mi onli hapi wen dehn hyaa dat, ahn dehn agree fi giv ahn silva moni.
6 Soh hihn agree tu wahn prais an ih staat tu luk fi wahn gud apachooniti fi bichray Jeezas. Bot ih neva waahn du it fronta di peepl dehn.
7 Now pahn di day a di Festival a di Bred Widowt Ees, di peepl yoostu aafa op di Paasoava sakrifais.
8 Soh Jeezas tel Peeta ahn Jan: “Goh geh di Paasoava meel redi fi mek wi eet.”
9 Dehn aks ahn: “Wehpaat yu waahn wi goh fi get it redi?”
10 Hihn tel dehn: “Wen unu goh eena di siti, wahn man weh di bak wahn waata jaar wahn meet unu. Ahn wen ih goh eena wahn hows, unu fala ahn een deh.
11 Ahn tel di lanlaad, ‘Di Teecha seh: “Wehpaat di ges room deh weh Ah ku eet di Paasoava meel wid mi disaipl dehn?”’
12 Ahn hihn wahn shoa unu wahn big opstayz room weh ga weh wi need. Geh di meel redi deh.”
13 Soh dehn lef, an evriting mi hapm jos laik how Jeezas mi tel dehn. Soh dehn pripyaa evriting fi di Paasoava.
14 Soh wen di taim kom, hihn sidong rong di taybl lang wid ih apasl dehn.
15 Ahn hihn tel dehn: “Ah onli hapi fi eet dis Paasoava meel wid unu bifoa Ah sofa;
16 kaaz Ah di tel unu, Ai noh wahn eet dis Paasoava meel agen til evriting* kohn chroo eena di Kingdom a Gaad.”
17 Ahn wan a dehn han Jeezas wahn kop, ahn hihn tank Gaad far it ahn seh: “Jrink dis ahn paas it rong tu eech ada,
18 kaaz di onli taim Ai wahn jrink dis wain agen da wen di Kingdom a Gaad kom.”
19 Aalso, ih tek wahn bred, gi Gaad tanks, brok it, ahn shayr it owt monks dehn. Den ih tel dehn: “Dis stan fi mai badi, weh Ah wahn giv op fi unu. Kip aan di du dis fi memba mi.”
20 Den ih du di saym ting wid di kop afta dehn mi eet di eevnin meel. Den ih tel dehn: “Dis kop stan fi di nyoo kovenant weh wahn staat wen Ah poar owt mi blod fi unu.
21 “Bot di persn weh wahn bichray mi di sidong wid mi ya da di taybl.
22 Kaaz di Son a man wahn lef unu jos laik weh di Skripchaz seh bowt ahn; bot chrobl wahn kohn pahn di man hoo bichray hihn!”
23 Soh dehn staat diskos monks dehnself wich wan a dehn wuda du soch a ting.
24 Bot aala dehn get intu wahn heetid aagyument bowt hoo moa impoatant monks dehn.
25 Soh ih tel dehn: “Di king dehn a di nayshanz rool op fi dehn peepl, ahn di peepl gi dehn wan weh ga atariti oava dehn sohn speshal naym.*
26 Bot unu noh fi bee da way. Unu fi mek di persn weh moa impoatant monks unu bee laik di yongis, ahn di persn weh di tek di leed fi bee laik di wan weh di serv.
27 Wich persn moa impoatant, di wan weh di sidong fi eet er di wan weh di serv? Da di wan weh di sidong fi eet, noh chroo? Bot Ai da di wan weh di serv unu.
28 “Bot, unu da di wan dehn weh mi stik wid mi chroo aala mi chraiyalz;
29 an Ai mek wahn kovenant wid unu, jos laik how mai Faada mek wahn kovenant wid mee, fi wahn kingdom,
30 soh dat unu ku eet ahn jrink da mai taybl eena mi Kingdom, an unu wahn sidong pahn chroan fi joj di 12 chraib a Izrel.
31 “Saiman, Saiman, Saytan aks fi permishan fi siv unu laik weet.
32 Bot Ai don bayg Gaad eena pryaa fi yu soh dat yu fayt noh geh week; bot wen fi yoo fayt geh schrang agen, schrentn yu bradaz.”
33 Den Peeta tel ahn: “Laad, noh wori; Ai redi fi goh wid yu da prizn ahn fi ded wid yu.”
34 Bot Jeezas tel ahn: “Peeta, Ah di tel yu dis, bifoa wahn roosta kroa tudeh, yu wahn disoan mi chree taimz.”
35 Jeezas aalso tel dehn: “Wen Ah yoostu sen unu owt goh preech widowt wahn moni bag ahn wahn food bag ahn sandalz, unu mi need eniting?” Dehn tel ahn: “No, wi neva need notn!”
36 Den ih tel dehn: “Bot now, if unu ga wahn moni bag er food bag, kehr it wid unu, an if unu noh ga wahn soad, sel unu jakit ahn bai wan.
37 Ai di tel unu, weh deh eena di Skripchaz bowt mee haftu kohn chroo; di Skripchaz seh, ‘Dehn wahn chreet ahn laik hihn da wahn kriminal.’* Dehnya werdz bowt mee di kohn chroo.”
38 Den dehn seh: “Laad luk ya! Si too soad ya.” Ih tel dehn: “Dehnya soad inof.”
39 Wen Jeezas mi-di lef, ih gaan da di Mongt a Alivz, kaaz dat da-mi fi hihn kostom, an ih disaipl dehn fala ahn deh.
40 Wen aala dehn reech di plays, ih tel dehn: “Kantinyu pray soh dat unu noh giv een tu temtayshan.”
41 Den ih gaahn wahn lee wayz heda dehn, an ih neel dong ahn staat pray;
42 ih seh: “Faada, pleez noh mek Ah jrink owta dis kop. Bot, Ai wahn du weh yoo waahnt, noh weh Ai waahn.”
43 Den wahn aynjel fahn hevn apyaa tu ahn an schrentn ahn.
44 Bot ih mi deh anda soh moch schres, soh ih kantinyu pray haada; an ih swet mi-di jrap pahn di grong laik jraps a blod.
45 Afta ih pray, ih gaahn tu ih disaipl dehn ahn fain dehn di sleep; dehn mi taiyad bikaaz a di sadnis weh dehn mi feel.
46 Hihn tel dehn: “Da wai unu di sleep? Get op ahn kantinyu pray, soh dat unu noh giv een tu temtayshan.”
47 Wail Jeezas mi stil di taak, wahn big krowd a peepl reech wehpaat dehn mi deh, ahn Joodas, wan a di 12 apasl, mi-di leed dehn; hihn gaan op tu Jeezas ahn giv ahn wahn kis.
48 Bot Jeezas tel ahn: “Joodas, yoo di bichray di Son a man wid wahn kis?”
49 Wen di wan dehn weh mi deh lang wid ahn si weh mi wahn hapm, dehn seh: “Laad, yu waahn wi difen yu wid di soad?”
50 Wan a dehn eevn chap aaf di rait ayz a di slayv a di hai prees.
51 Bot Jeezas seh: “Yu neva need fi du dat.” An ih toch di man ayz ahn heel ahn.
52 Den Jeezas tel di cheef prees dehn, di kyaptin dehn a di templ, ahn di Jooish rilijos leedaz weh mi kohn fi ares ahn: “Unu kom owt ya fi ares mee wid soad ahn klob laik if Ai da wahn teef?
53 Evri day Ai yoostu deh wid unu da di templ, wai unu neva ares mi den? Bot dis da fi unu taim ahn di taim fi mek daaknis rool.”
54 Den dehn ares ahn an kehr ahn tu di hows a di hai prees; bot Peeta mi-di fala dehn fahn wahn distans.
55 Den dehn lait wahn faiya eena di midl a di koatyaad ahn sidong tugeda, ahn Peeta gaahn sidong rait monks dehn tu.
56 Bot wan a di servant gyal dehn si ahn di sidong bai di faiya di chrai kip waam. Soh shee tek wahn gud luk pan ahn an seh: “Dis man yoostu goh rong wid hihn tu.”
57 Bot Peeta dinai it; ih seh: “Ai noh noa hihn.”
58 Lee wail afta dat, wahn nada persn si ahn an seh: “Yoo da wan a ih disaipl dehn fi chroo.” Bot Peeta seh: “No, Ai da noh wan a dehn.”
59 Bowt wahn owa layta, wahn nada man staat tu insis; di man seh: “Fi shoar dis man mi-di goh rong wid hihn, kaaz hihn da fahn Gyalilee!”
60 Bot Peeta seh: “No man, Ai noh noa weh yoo di taak bowt.” Ahn rait away, wail ih mi stil di taak, wahn roosta kroa.
61 Da saym taim deh, di Laad luk schrayt pahn Peeta, ahn Peeta memba weh di Laad mi tel ahn: “Bifoa wahn roosta kroa tudeh, yu wahn disoan mi chree taimz.”
62 Den ih gaan owtsaid ahn put aaf wan pees a baalin.
63 Now di man dehn weh mi-di gyaad Jeezas staat tu mek fon a hihn ahn nak ahn;
64 afta dehn kova ih fays, dehn nak ahn, an dehn tel ahn: “If yoo da wahn prafit fi chroo, tel wi da hoo nak yu!”
65 Ahn dehn tel ahn lata ada insoltin tingz.
66 Wen maanin kom, di oalda man dehn fahn monks di cheef prees dehn ahn di skraibz gyada tugeda, ahn dehn kehr ahn eena di Sanhejrin; dehn seh:
67 “Tel wi if yoo da reeli di Krais.” Bot hihn tel dehn: “Eevn if Ah tel unu, unu stil wudn bileev mi.
68 Pahn tap a dat, if Ai wuda aks unu wahn kweschan, unu wudn waahn giv mi wahn ansa.
69 Bot, fahn now aan di Son a man wahn di sidong da di rait han a di powaful Gaad.”
70 Wen dehn hyaa dat, aala dehn aks ahn: “Soh den, yoo da di Son a Gaad?” Hihn tel dehn: “Unu jos giv di ansa.”
71 Dehn seh: “Wai wi need moa witnis? Wi don hyaa it fi wiself, rait fahn owta ih oan mowt.”
Futnoat
^ “Evriting” di rifaa tu di tingz weh di Paasoava stan fa.
^ Dehnya naym da speshal taitl fi peepl hoo du gud tingz fi adaz, laik doanayt moni.
^ Er “laik peepl widowt laa.”
