Jaymz 5:1-20

  • Jaymz waanin tu rich peepl (1-6)

  • Gaad bles di wan dehn weh payshent ahn bayr op (7-11)

  • If yu seh “yes,” meen yes (12)

  • Wahn pryaa wid fayt reeli powaful (13-18)

  • Wen wi help wahn sina fi kohn bak tu di chroot (19, 20)

5  Lisn tu mi now, unu rich peepl, krai ahn baal owt oava di chroblz weh di kohn pahn unu.  Unu richiz di ratn weh, an insek di eet unu kloaz.  Unu goal ahn silva rosti, ahn sayka weh dehn soh rosti dat wahn bee wahn witnis gens unu, an ih wahn eet unu op. Evriting weh unu don stoar op wahn bee laik wahn faiya eena di laas dayz.  Lisn op! Di werkman dehn weh werk pahn unu faam di baal owt sayka weh unu noh di pay dehn, ahn wen dehn krai fi help, Jehoava, di Komanda a di hevnli aami, hyaa dehn.  Unu liv wahn greedi laif pahn di ert, an unu liv onli fi pleez unu oanself. Unu fatn op unuself laik kyatl fi di day a slaata.  Unu kandem di raichos wan ahn merda ahn. Dat da wai hihn deh gens unu.  Unu mos bayr payshens den, mi bradaz, til di taim wen di Laad kohn bak ahn deh ya wid wi.* Lisn op! Di faama kip di wayt fi geh di preshos froot fahn di ert, an ih bayr payshens til wen di erli rayn ahn di layt rayn kom.  Unu mos bayr payshens tu. Schrentn unu haat, kaaz di taim wen di Laad wahn kohn bak ahn deh ya wid wi soon kom.*  Mi bradaz, unu noh fi grombl* gens wan anada, soh dat di Laad noh joj unu. Di Joj di stan op rait da di doa. 10  Bradaz, unu waahn wahn gud egzampl a how fi bayr payshens eevn wen unu di sofa? Fala di egzampl a di prafit dehn weh mi taak eena Jehoava naym. 11  Wen peepl sofa ahn dehn noh giv op, wi seh dehn hapi.* Unu hyaa bowt Joab an aal weh ih gaahn chroo, ahn how ih neva giv op. Ahn bikaaz a weh Jehoava mi du far ahn pahn di en, unu noa dat Jehoava ful a mersi ahn kompashan.* 12  Moa dan eniting els, mi bradaz, unu mos stap swayr, eeda bai hevn er bai di ert er wid eni ada oat. Bot if unu seh “Yes,” unu fi meen yes, an if unu seh “No,” unu fi meen no. Adawaiz, Gaad wahn joj unu. 13  Enibadi monks unu di sofa? Mek ih kip aan di pray. Enibadi monks unu feel hapi? Mek ih sing saamz. 14  Enibadi sik monks unu? Mek ih kaal di kangrigayshan elda dehn, ahn mek dehn pray oava ahn, an poar ail pan ahn eena di naym a Jehoava. 15  Ahn wen dehn pray wid fayt, di wan weh sik* wahn geh beta, ahn Jehoava wahn rayz ahn op. An if ih mi komit eni sin, Gaad wahn fergiv ahn. 16  Soh unu mos kanfes unu sin dehn tu wan anada ahn pray fi wan anada, soh dat unu ku geh heel. Wen wahn raichos man pray haad, dat powaful an ih ku reeli help peepl.* 17  Ilaija da-mi wahn man wid feelinz jos laik wee, bot wen hihn mi pray haad fi mek ih noh rayn, ih neva rayn fi chree an a haaf yaaz. 18  Den hihn mi pray agen, ahn rayn kohn dong fahn hevn an evriting staat tu groa pahn di ert agen. 19  Mi bradaz, if sombadi leed wan a unu aschray fahn di chroot ahn sombadi els help ahn fi kohn bak, 20  noa dis: Enibadi weh help wahn sina fi ton bak fan ih sin wahn sayv da persn laif,* ahn Gaad wahn fergiv ahn fi di lata sin weh ih du.

Futnoat

Er “til di prezens a di Laad.” Si di Glasari, “Prezens.”
Er “kaaz di taim a di Laad prezens deh kloas.” Si di Glasari, “Prezens.”
Er “komplayn.”
Er “bles.”
Er “an ih haat saaf tuwaadz wi.”
Dis ku aalso bee “taiyad.”
Lit., “ga lata powa wen ih di du ih werk.”
Er “soal.”