Jan 16:1-33

  • Jeezas disaiplz mait haftu fays det (1-4a)

  • Di tingz weh di hoali spirit wahn du (4b-16)

  • Di sadnis weh di disaiplz feel wahn ton intu jai (17-24)

  • Jeezas kanka di werl (25-33)

16  “Ah di tel unu dehnya tingz soh dat unu noh looz unu fayt.*  Peepl wahn kik unu owta di sinagag. In fak, di taim di kohn wen peepl wahn kil unu ahn tink dat dehn di du wahn hoali servis* tu Gaad.  Bot dehn wahn du dehnya tingz bikaaz dehn noh noa mee ner di Faada.  Ah tel unu dehnya tingz soh dat wen di taim kohn fi mek dehn hapm, unu wahn memba dat Ah mi tel unu bowt dehn aredi. “Ah neva tel unu bowt dehnya tingz erliya, kaaz Ah mi stil deh wid unu.  Bot now Ah gwehn bak tu di Wan weh sen mi; ahn yet non a unu aks mi, ‘Wehpaat yu di goh?’  Bot now dat Ah di tel unu dehnya tingz, unu haat ful a sadnis.  Bot Ah di tel unu di chroot, ih beta fi mek Ah goh, kaaz if Ah noh goh, den Ah noh wahn sen di helpa* fi unu. Bot if Ah goh, Ah wahn sen ahn tu unu.  Ahn wen di helpa kom, ih wahn shoa di werl klyaa-wan wat da sin, wat da raichosnis, ahn wat da Gaad jojment.  Fers, ih wahn shoa klyaa-wan wat da sin, kaaz di werl noh di shoa fayt eena mee. 10  Den, ih wahn shoa di werl dat Ai du weh raichos bikaaz Ai gwehn bak tu di Faada. Den unu noh wahn si mi nohmoh. 11  An ih wahn shoa da hoo Gaad wahn joj kaaz Hihn don joj di roola a dis werl. 12  “Ah stil ga lata tingz fi tel unu, bot unu wahn kyaahn andastan dehn rait now. 13  Bot wen di helpa kom, in ada werdz, wen di hoali spirit weh shoa wat da di chroot kom, ih wahn gaid unu fi noa di chroot. Kaaz ih noh wahn teech ih oan ting, bot ih onli wahn teech weh ih hyaa, an ih wahn eksplayn tu unu weh wahn hapm. 14  Di helpa wahn aana mee, kaaz ih wahn eksplayn tu unu weh ih hyaa fahn mee. 15  Evriting weh mai Faada ga da aalso fi mee. Dats wai Ah seh, ‘Ih wahn eksplayn tu unu weh ih hyaa fahn mee.’ 16  Eena wahn lee wail moa, unu noh wahn si mi nohmoh, den afta wahn nada lee wail, unu wahn si mi agen.” 17  Wid dat, som a ih disaipl dehn seh tu wan anada: “Da weh hihn meen wen ih seh, ‘Eena wahn lee wail moa, unu noh wahn si mi nohmoh, den afta wahn nada lee wail, unu wahn si mi agen;’ ahn weh hihn meen wen ih seh, ‘bikaaz Ai gwehn bak tu di Faada’?” 18  Ahn dehn aalso seh: “Da weh hihn meen wen ih seh, ‘Eena wahn lee wail moa’? Wee noh noa weh hihn di taak bowt.” 19  Jeezas mi noa dat dehn mi waahn kweschan ahn, soh ih tel dehn: “Unu di aks wan anada dis bikaaz Ah mi seh: ‘Eena wahn lee wail moa, unu noh wahn si mi nohmoh, den afta wahn nada lee wail, unu wahn si mi agen’? 20  Bileev mi, unu wahn krai ahn baal, bot di werl wahn rijais; unu wahn sad, bot unu sadnis wahn ton tu jai. 21  Wen wahn uman deh eena layba, shee ga payn bikaaz da taim fi mek shee gi bert; bot wen di baybi baan, fi shee payn ton tu jai wen ih si ih baybi. 22  Da di saym wid unu, rait now unu di goh chroo sadnis, bot wen unu si mi agen, unu wahn rijais an unu wahn ful op a jai, ahn nobadi wahn ku tek weh unu jai. 23  Wen da taim kom, unu noh wahn aks mi nohmoh kweschanz. Bileev mi, if unu aks di Faada fi eniting eena mai naym, hihn wahn giv it tu unu. 24  Op tu now unu noh aks fi eniting yet eena mai naym. Aks eena mai naym an unu wahn get, soh dat unu geh ful op a jai. 25  “Ah yooz iloschrayshanz fi tel unu dehnya tingz. Bot di taim di kohn wen Ah noh wahn yooz iloschrayshanz nohmoh, bot Ah wahn tel unu playn ahn schrayt bowt di Faada. 26  Wen da taim kom, unu wahn ku pray tu di Faada eena mai naym, bot dis noh meen dat Ai wahn taak tu di Faada fi unu. 27  Kaaz di Faada lov unu, bikaaz unu mi lov mee an unu bileev dat Ai kom az di wan weh reprizent Gaad. 28  Ai kom eena di werl az di wan weh reprizent di Faada. Bot now Ai wahn lef di werl an Ah gwehn bak tu di Faada.” 29  Ih disaipl dehn tel ahn: “Now wi andastan weh yoo di seh kaaz yu noh di yooz iloschrayshanz nohmoh. 30  Now wi noa dat yoo noa evriting ahn yu noh need fi mek enibadi aks yu wahn kweschan, kaaz yoo noa weh eech persn di tink. Ahn dat da how wee noa yoo kohn fahn Gaad.” 31  Jeezas tel dehn: “Now unu bileev mi? 32  Ah di tel unu, di taim wahn kohn wen unu wahn skyata, an eech wan a unu wahn ron lef mi bai miself ahn goh bak tu unu oan hoam. Bot Ai noh wahn deh bai miself, kaaz di Faada deh wid mee. 33  Ah di tel unu dehnya tingz soh dat unu ku ga pees chroo mee. Unu wahn fays chribyulayshan eena di werl, bot tek korij! Kaaz Ai don kanka di werl aredi.”

Futnoat

Lit., “soh dat unu noh geh stombl.”
Er “saykrid servis.” Si di Glasari, “Hoali servis.”
Jeezas mi yooz di werd ‘helpa’ ahn di werd ‘ahn’ eena dis vers laik wahn persn fi reprizent di hoali spirit. Aldoa di hoali spirit da noh mayl ner feemayl.