Ikleeziyasteez 3:1-22
3 Dehn ga wahn karek taim fi evriting;Wahn taim fi mek evriting hapm pahn di ert.
2 Dehn ga wahn taim fi baan* ahn wahn taim fi ded;Wahn taim fi plaant ahn wahn taim fi root owt weh peepl plaant;
3 Wahn taim fi kil ahn wahn taim fi sayv;*Wahn taim fi tayr dong sohnting ahn wahn taim fi bil sohnting;
4 Wahn taim fi krai ahn wahn taim fi laaf;Wahn taim fi baal ahn wahn taim fi daans;*
5 Wahn taim fi chroa weh stoan ahn wahn taim fi pail op stoan;Wahn taim wen peepl hog ahn wahn taim wen dehn noh fi hog;
6 Wahn taim fi saach fi sohnting ahn wahn taim fi aksep dat sohnting laas;Wahn taim fi kip sohnting ahn wahn taim fi chroa weh sohnting;
7 Wahn taim fi tayr op sohnting ahn wahn taim fi soa sohnting tugeda;Wahn taim fi kip kwaiyet ahn wahn taim fi taak;
8 Wahn taim fi lov ahn wahn taim fi hayt;Wahn taim fi goh da waar ahn wahn taim fi mek pees.
9 Weh riwaad sombadi geh fi aala di haad werk weh ih du?
10 Ah si di werk weh Gaad gi peepl fi du fi kip dehn bizi.
11 Hihn mek evriting priti, an ih mek evriting da di karek taim. Hihn eevn mek peepl wid di dizaiya fi liv fareva. Bot eevn soh, hyoomanz wahn neva andastan evriting weh di chroo Gaad du.
12 Ah geh fi andastan dat notn beta dan fi mek peepl bee hapi ahn du gud tingz eena dehn laif
13 ahn fi mek dehn eet ahn jrink ahn bee hapi sayka aala dehn haad werk. Aala dat da wahn gif fahn Gaad.
14 Ah laan dat evriting weh di chroo Gaad mek wahn laas fareva. Nobadi ku ad tu it ner tek weh fan it. Di chroo Gaad mek tingz da way soh dat peepl ku ga lata rispek far ahn.*
15 Eniting weh di hapm now don hapm eena di paas. Eniting weh wahn egzis eena di fyoocha don egzis aredi. Di chroo Gaad wahn mek di tingz weh hyoomanz waahn ahn di tingz weh dehn di saach fa hapm.
16 Dis da weh Ah si hapm pahn di ert:* Peepl ak wikid da wahn plays wehpaat dehn fi shoa jostis ahn wehpaat dehn fi du weh rait.
17 Soh Ah tel miself: “Di chroo Gaad wahn joj wikid peepl ahn raichos peepl, bikaaz dehn ga wahn taim fi mek evriting hapm ahn wahn taim fi mek tingz geh don.”
18 An Ah eevn tel miself dat Gaad wahn tes peepl ahn shoa dehn dat dehn da jos laik animalz,
19 bikaaz di saym ting weh hapm tu peepl wahn hapm tu animalz. Jos laik how peepl ded, animalz wahn ded, ahn Gaad giv aala dehn di bret a laif. Soh peepl noh beta dan animalz, bikaaz evriting wertles.
20 Aala dehn gwehn da di saym plays. Aala dehn mek owta dos, ahn dehn wahn ton bak intu dos.
21 Hoo reeli noa if di bret a laif weh Gaad gi peepl goh op afta dehn ded? Ahn hoo reeli noa if di bret a laif weh Gaad giv animalz goh dong eena di grong afta dehn ded?
22 An Ah mi si dat notn beta dan fi mek sombadi injai di werk weh dehn du, bikaaz dat da dehn riwaad.* Ahn nobadi ku mek dehn si weh wahn hapm afta dehn ded.
Futnoat
^ Er “wahn taim fi gi bert.”
^ Lit., “heel.”
^ Lit., “jomp; ron bowt.”
^ Lit., “peepl ku fyaa hihn.”
^ Lit., “anda di son.”
^ Er “shayr.”
