Ifeezhanz 2:1-22

  • Gaad gi wi laif ahn mek wi bee wan wid Krais (1-10)

  • Krais dischrai di waal weh separayt wi (11-22)

2  Pahn tap a dat, Gaad giv unu laif bikaaz da laik unu mi ded sayka unu sin dehn.  Kaaz unu yoostu liv di saym way laik how peepl eena dis werl* liv, di way di roola weh ga powa fi kanchroal di ayaa mi waahn unu liv. Ahn da ayaa da di spirit* weh ga powa oava peepl weh noh obeedyant.  Eevn wee yoostu bee monks dehn wan weh liv akaadn tu weh dehn sinful badi waahn. Wi yoostu du weh wi sinful badi ahn main waahn wi du. Ahn fahn di taim wi baan wi dizerv Gaad raat jos laik evribadi els.  Bot Gaad ga soh moch mersi, an ih lov wi soh moch  dat ih gi wi laif ahn mek wi bee wan wid Krais, eevn wen wi mi ded sayka wi sin dehn. An unu geh sayv sayka fi hihn grayt kainis.*  Pahn tap a dat, Gaad gi wi laif ahn wahn plays fi sidong da hevn, bikaaz wi da wan wid Krais Jeezas.  Gaad du dat soh dat eena di fyoocha sistem a tingz,* hihn ku shoa wi ih grayt kainis chroo di gud tingz weh ih du fi wi bikaaz wi da wan wid Krais Jeezas.  Sayka da grayt kainis unu geh sayv bikaaz a unu fayt, ahn dat da noh bikaaz a weh unu du, bot da wahn gif fahn Gaad.  No, unu neva geh sayv sayka weh unu du. Ahn dats wai nobadi wahn ga eni reezn fi boas. 10  Wi da di werk a Gaad han, ahn bikaaz wi da wan wid Krais Jeezas, Gaad mek wi fi du gud tingz weh hihn mi disaid heda taim fi mek wi du. 11  Soh den, memba dat unu da noh Joo ahn dat di “peepl weh serkomsaiz” bai ada peepl kaal unu “peepl weh noh serkomsaiz.” 12  Unu neva noa Krais an unu mi separayt fahn di peepl a Izrel. Ahn bikaaz unu da-mi schraynjaz, unu da neva paat a di kovenant dehn weh bays pahn Gaad pramis. Unu mi-di liv eena di werl widowt hoap, an unu neva noa Gaad. 13  Bot now dat unu da wan wid Krais Jeezas, unu weh neva noa Gaad kohn fi noa ahn bikaaz a di blod a di Krais. 14  Kaaz Krais bring wi pees, ahn hihn da di wan weh mek di too groop intu wan groop, an ih dischrai di waal weh mi-di separayt dehn. 15  Bikaaz a di sakrifais a ih badi,* ih mi geh rid a di Laa weh mek op a aala di komanment dehn, weh kaaz haychrid bitween di too groop. Hihn mi du dat soh dat fahn di too groop hihn ku mek wan nyoo groop.* Ahn sins di too groop da wan wid Krais, hihn mek pees bitween dehn. 16  Ahn bikaaz a fi hihn det pahn di taacha stayk,* hihn geh rid a weh kaaz haychrid ahn mek pees bitween Gaad ahn di too groop a peepl soh dat di too a dehn ku bee wan badi. 17  Ahn hihn mi kom ahn preech di gud nyooz a pees tu unu weh neva noa Gaad, ahn tu peepl weh mi noa ahn tu. 18  Bikaaz a Krais, wee, weh da di too groop a peepl, ku kohn fronta di Faada sayka weh aala wi geh di saym hoali spirit. 19  Soh unu da noh schraynjaz ahn farinaz nohmoh, bot unu da sitizn monks di hoali peepl an unu da paat a Gaad famili. 20  An unu kohn fi bee paat a di bildin weh Gaad bil pahn di fongdayshan. Da fongdayshan da di apasl dehn ahn di prafit dehn, wail Krais Jeezas da di kaanastoan a di fongdayshan. 21  Eech paat a da bildin jain op tugeda gud, ahn bikaaz da bildin da wan wid Krais, di bildin di groa fi bee wahn hoali templ fi Jehoava. 22  Soh bikaaz unu da wan wid Krais, Gaad di bil op aala unu tugeda fi bee wahn plays wehpaat hihn liv, bikaaz fi hihn spirit dehdeh.

Futnoat

Er “di sistem a tingz a dis werl.” Si di Glasari, “Sistem a tingz.”
Dis di rifaa tu di way peepl tink.
Si di Glasari, “Grayt kainis.”
Si di Glasari, “Sistem a tingz.”
Lit., “flesh.”
Lit., “wan nyoo man.”
Si di Glasari, “Taacha stayk.”