Dyooteronomi 8:1-20
8 “Unu fi mek shoar dat unu obay di komanment dehn weh Ah di giv unu tudeh, soh dat unu ku kantinyu liv an unu nayshan ku geh biga an unu ku kanka di lan weh Jehoava mi swayr tu unu ansestaz dat ih mi wahn giv unu.
2 Memba di lang road weh Jehoava unu Gaad mi mek unu waak pan fi 40 yaaz eena di wildanes. Ih du dat fi teech unu fi bee hombl ahn fi tes unu fi si weh mi deh eena unu haat ahn fi si weda er nat unu mi wahn obay ih komanment dehn.
3 Soh ih mi teech unu fi bee hombl wen ih mi lef unu fi feel hongri ahn wen ih mi feed unu wid di mana, weh da-mi sohnting weh unu ner unu ansesta dehn neva noa bowt. Ih mi du dat soh dat ih kuda mi shoa unu dat food da noh di onli ting weh wahn persn need fi mek ih liv, bot ih need fi lisn tu evriting weh Jehoava seh soh dat ih ku liv.
4 Unu kloaz neva wayr owt, an unu fut neva geh swel op fi dehndeh 40 yaaz.
5 Unu noa dat jos laik how wahn man karek ih son, da di sayhn way Jehoava unu Gaad mi-di karek unu.
6 “Unu fi obay di komanment dehn weh Jehoava unu Gaad giv unu, an unu fi liv akaadn tu fi hihn standadz ahn ga lata rispek far ahn.
7 Bikaaz Jehoava unu Gaad di bring unu eena wahn gud lan weh ga lata schreem ahn waata spring weh di floa eena di vali ahn di mongtin dehn.
8 Da lan ga lata weet, baarli, grayp vain, fig chree, pomegranet, aliv ail, ahn honi;
9 an ih ga lata food an unu wahn ga evriting weh unu need. Da wahn lan weh ga stoan weh ful op a aiyan an unu wahn dig kapa fahn owta di mongtin dehn.
10 “Wen unu di eet an unu geh ful, unu fi prayz Jehoava unu Gaad fi di gud lan weh ih giv unu.
11 Unu fi mek shoar dat unu noh ferget Jehoava unu Gaad, an unu noh fi stap fala ih komanment dehn an ih laa dehn weh Ah di giv unu tudeh.
12 Wen unu eet ahn geh ful an unu bil unu nais hows ahn liv een deh,
13 wen unu animal dehn ga moa ahn moa baybi an unu geh moa ahn moa silva ahn goal, an unu ga evriting unu need,
14 unu noh fi geh prowd ahn ferget Jehoava unu Gaad, hoo da di wan weh mi bring unu owta Eejip, wehpaat unu da-mi slayv.
15 Hihn da-mi di wan weh mi leed unu chroo di big ahn daynjaros wildanes wehpaat lata paiznos snayk deh ahn wehpaat lata skyaapyan deh, ahn wehpaat di grong jrai ahn no waata deh. Hihn mi mek waata kom owta wahn haad rak
16 an eena di wildanes ih mi feed unu mana, weh da sohnting unu ansestaz neva noa bowt. Hihn mi du dat fi teech unu fi bee hombl ahn soh dat unu ku benifit eena di fyoocha.
17 If unu seh tu unuself, ‘Aala dehnya richiz weh Ah ga da weh Ah geh wid mi oan powa ahn mi oan too han,’
18 noh ferget dat da mi Jehoava unu Gaad giv unu di powa fi geh richiz. Ih mi du dat soh dat ih kuda mi kip di kovenant weh ih mi swayr tu unu ansestaz, laik weh ih di du op tu tudeh.
19 “Ah di waan unu tudeh dat fi shoar unu wahn ded if unu ferget Jehoava unu Gaad ahn wership ada gaadz ahn bow dong tu dehn.
20 Unu wahn ded jos laik di ada nayshan dehn weh Jehoava di dischrai, bikaaz unu neva lisn tu weh Jehoava unu Gaad mi-di tel unu.
