Dyooteronomi 17:1-20
17 “If wan a unu bul er unu sheep sik er sohnting els rang wid it, den unu noh fi sakrifais it tu Jehoava unu Gaad, bikaaz dat da sohnting weh Jehoava unu Gaad hayt.
2 “Wahn man er wahn laydi weh di liv eena wan a di siti dehn weh Jehoava unu Gaad di giv unu mait staat du sohnting weh Jehoava unu Gaad si az bad ahn brok di kovenant.
3 Da persn mait goh wership ada gaadz ahn bow dong tu dehn er ih mait bow dong tu di son, di moon, ahn di staar dehn. Ahn dat da sohnting weh Ah seh unu noh fi du.
4 An if unu hyaa bowt it er sohnbadi tel unu bowt it, den unu fi mek shoar dat unu fain owt if da chroo. An if unu proov dat da chroo dat da persn mi du sohnting weh Gaad hayt da Izrel,
5 den unu fi bring da persn da di siti gayt, weda da wahn man er wahn laydi. An unu fi stoan ahn mek ih ded, bikaaz ih du sohnting bad.
6 Unu onli fi kil da persn if too er chree peepl seh dat dehn mi si di persn du sohnting bad. Bot unu noh fi kil ahn if onli wan persn seh dat ih mi si ahn du sohnting bad.
7 Di peepl weh mi seh dat dehn si ahn du sohnting bad fi bee di saym peepl weh fi stoan ahn fers, ahn den di res a peepl fi kohn stoan ahn tu til ih ded. Unu fi geh rid a eniting weh bad weh deh monks unu.
8 “If wahn prablem kom op weh tu haad fi deel wid eena wan a unu siti dehn, weda da sohnting weh ga fi du wid wahn merda er da bowt wahn leegal mata er sohnbadi mi du sohnting vailent er eni ada prablem kom op, den unu fi goh da di plays weh Jehoava unu Gaad chooz.
9 Unu fi goh da di Leevait dehn hoo di serv az prees ahn tu di persn weh di serv az joj joorin da taim. Unu fi tel dehn bowt di prablem, ahn dehn wahn tel unu weh dehn disaid.
10 Wen unu goh da di plays weh Jehoava chooz, ahn di prees dehn ahn di joj tel unu weh fi du, unu fi mek shoar dat unu du evriting weh dehn seh.
11 Unu fi fala di tingz weh dehn teech unu fahn di laa. Ahn wen dehn mek wahn disizhan, unu fi du weh dehn tel unu fi du. Unu fi mek shoar dat unu noh stap obay weh dehn tel unu fi du.
12 Unu fi kil wahn prowd persn weh stap lisn tu di joj er weh stap lisn tu di prees weh serv Jehoava unu Gaad. Unu fi geh rid a eniting bad weh deh monks unu.
13 Aala di peepl wahn hyaa weh hapm tu ahn, an dehn wahn geh fraitn. Ahn dehn noh wahn bee prowd nohmoh.
14 “Wen unu goh eena di lan weh Jehoava unu Gaad di giv unu an unu kanka it ahn staat liv deh an unu seh dat unu waahn mek sombadi bee king oava unu laik weh di ada nayshan dehn di du,
15 unu fi mek di persn weh Jehoava chooz bee unu king. Unu fi mek sohnbadi weh da wahn Izrelait bee unu king. Unu noh fi mek wahn farina bee unu king.
16 Ahn di king noh fi geh lata haas fi ihself er mek di peepl goh bak da Eejip fi geh moa haas, bikaaz dis da weh Jehoava tel unu, ‘Unu noh fi goh bak da Eejip.’
17 Hihn noh fi geh lata waif fi ihself, soh dat ih noh stap du weh rait. An ih noh fi geh lata silva ahn goal needa.
18 Wen ih staat rool az king, ih fi geh wahn kapi a di Laa fahn di Leevait dehn weh da prees, ahn hihn fi rait dong ih oan kapi a di Laa eena wahn skroal.
19 “Ih fi aalwayz kip da Laa wid ahn, an ih fi reed it evri day fi di res a ih laif, soh dat ih ku laan fi ga lata rispek fi Jehoava ih Gaad ahn obay weh di Laa seh ahn fala aala di roolz.
20 Hihn noh wahn tink dat ih beta dan di ada Izrelait dehn, an ih noh wahn stap fala di komanment dehn, soh dat ih ku rool az king oava di Izrelait dehn fi wahn lang taim ahn soh dat ih son dehn ku rool az king tu.
