Aks 2:1-47

  • Gaad poar owt ih hoali spirit da Pentikaas (1-13)

  • Peeta taak tu di krowd (14-36)

  • Di krowd rispan tu weh Peeta mi seh (37-41)

    • 3,000 peepl mi geh baptaiz (41)

  • Di Kristyanz du tingz tugeda (42-47)

2  Now pahn di day a Pentikaas,* aala di disaipl dehn mi deh tugeda eena di saym hows.  Den aal af a sodn, dehn hyaa wahn lowd naiz fahn hevn weh mi song laik wahn schrang breez, an ih mi song eevn haada eena di hows wehpaat dehn mi-di sidong.  Ahn dehn si sohnting weh mi luk laik flaymz a faiya,* ahn di flaym dehn divaid op monks dehn ahn res pahn eech wan a dehn,  an aala dehn geh ful op wid hoali spirit. Den dehn staat tu taak eena difrent langwij* akaadn tu di gaidans a Gaad hoali spirit.  Joorin da taim deh, Jooz weh mi rispek Gaad ahn weh mi kohn fahn aala di nayshanz rong di werl, mi-di stay da Jeroosalem.  Soh wen dehn hyaa da naiz, wahn big krowd gyada rong, ahn dehn mi onli kanfyooz kaaz dehn mi-di hyaa fi dehn oan langwij wen di disaiplz staat tu taak.  Aala dehn mi shak; dehn seh: “Aala dehnya peepl da noh fahn Gyalilee?  Soh den, da how komz eech wan a wi di hyaa fi wee oan langwij?*  Wi gat peepl monks wi fahn Paatya, Meedya, Eelam, Mesopotaymya, Judeeya, Kapadoasha, Pontus, di dischrik a Aysha, 10  Frijya ahn Pamfilya, Eejip ahn paats a Libya weh deh kloas tu Saireeni, ahn sohn peepl weh mi-di vizit fahn Roam tu, som a dehn da Jooz, ahn som a dehn di fala di Jooish teechinz. 11  Wi aalso gat sohn peepl fahn Kreet an Araybya tu. Ahn yet wi hyaa dehn di taak tu wi eena fi wee oan langwij bowt di powaful tingz weh Gaad du.” 12  Yes, aala dehn mi shak, ahn dehn staat tu aks wan anada: “Da weh di hapm ya now?” 13  Bot adaz mek fon a di disaipl dehn ahn seh: “Dehn mosi jronk.” 14  Bot Peeta stan op wid di 11 apasl dehn ahn seh wid wahn lowd vais: “Peepl a Judeeya an evribadi weh liv da Jeroosalem, unu pay atenshan tu weh Ah di seh. 15  Dehnya man noh jronk, az a mata a fak, unu noa dat da bowt nain aklak eena di maanin.* 16  Insted, weh di hapm rait now di fulfil weh di prafit Joawel mi rait bowt. Ih mi seh: 17  ‘“Eena di laas dayz,” Gaad mi seh, “Ai wahn poar owt mi spirit pahn evri kaina persn, an unu son ahn daata dehn wahn prafesai, ahn di yong man dehn wahn si vizhanz, ahn di oal man dehn wahn ga jreemz. 18  Joorin da saym taim deh, Ah wahn aalso poar owt mi spirit pahn mi mayl ahn feemayl servant dehn, ahn dehn wahn prafesai. 19  An Ai wahn shoa peepl sohn amayzin tingz eena di skai ahn miraklz pahn di ert; som a dehnya tingz wahn bee blod, faiya, klowdz, ahn tik smoak. 20  Bifoa di grayt ahn speshal day a Jehoava kom, di son wahn geh daak ahn di moon wahn geh red jos laik blod. 21  An evribadi weh kaal pahn di naym a Jehoava wahn geh sayv.”’ 22  Peeta kantinyu fi seh: “Peepl a Izrel, hyaa weh Ah di seh: Unu don noa dat Gaad mi sen Jeezas di Nazareen, ahn Hihn mi giv ahn di powa fi du lata mirakl an ada powaful werks monks unu. 23  Gaad mi noa fahn lang taim dat unu mi wahn ares Jeezas; Hihn mi werk it owt fi mek ih hapm da way. Soh wen unu han oava Jeezas tu dehndeh wikid peepl, unu mi nayl ahn tu di stayk an unu kil ahn tu. 24  Bot Gaad mi free ahn fahn det wen ih rezorek ahn, bikaaz ih neva pasabl fi mek det kip ahn laik wahn prizna. 25  Bikaaz Dayvid mi seh bowt ahn: ‘Ai wahn kip Jehoava fronta mi* aala di taim, kaaz hihn deh da mai rait han, soh Ah noh need fi wori bowt eniting. 26  Dat da wai mi haat soh hapi now an Ah taak owt wid lata jai. An Ai* wahn liv di chros eena yoo. 27  Yoo noh wahn lef mi* eena di Grayv,* ner wahn alow mi badi fi ratn, bikaaz Ai laayal tu yoo. 28  Yu mi help mi fi noa di way tu laif; Ah feel lata jai wen Ai deh fronta yoo.’* 29  “Bradaz, alow mi fi bee aanis wid unu bowt wi ansesta Dayvid; hihn mi ded ahn beri, an ih toom stil deh ya op tu tudeh. 30  Hihn da-mi wahn prafit an ih mi noa weh Gaad mi tel ahn wid wahn oat. Gaad mi tel ahn dat wan a ih son dehn wahn sidong pan ih chroan. 31  Ahn hihn mi si di rezorekshan a di Krais bifoa ih mi hapm; ih mi aalso seh dat Gaad neva mi wahn lef ahn eena di Grayv* ner mek ih badi ratn* een deh. 32  Gaad mi rezorek Jeezas, an aala wi ku gi wahn witnis bowt dis. 33  Soh den, Jeezas don gaahn bak da hevn an ih di sidong da di rait han said a Gaad an ih geh di hoali spirit weh di Faada mi pramis tu ahn. Dat da wai hihn poar owt hoali spirit pahn wee, ahn dat da weh unu di si ahn hyaa ya tudeh. 34  Akchwali, Dayvid neva did gaan da hevn, ahn yet hihn mi seh, ‘Jehoava seh tu mi Laad: “Sidong pahn mi rait han said 35  til Ah put yu enimi dehn anda yu fut laik wahn futstool.”’ 36  Soh den, evribadi eena di nayshan a Izrel haftu noa dat Gaad mi apoint hihn, Jeezas, az Laad ahn Krais, di saym wan weh unu mi nayl tu di stayk.” 37  Wel, wen dehn hyaa dis, dehn mi feel laik sombadi stab dehn eena dehn haat, soh dehn aks Peeta ahn di ada apasl dehn: “Bradaz, da weh wi need fi du now?” 38  Peeta tel dehn: “Unu mos ripent ahn geh baptaiz eena di naym a Jeezas Krais if unu waahn geh fergivnis fi unu sin dehn, an unu wahn geh di hoali spirit, weh da wahn free gif fahn Gaad. 39  Dis pramis da fi aala unu, unu chiljren, peepl weh liv faar fahn ya, an evribadi els weh Jehoava wi Gaad chooz.” 40  Ahn Peeta kantinyu fi gi wahn ful eksplanayshan a di gud nyooz. Hihn inkorij dehn ahn tel dehn: “Separayt unuself fahn dis wikid jenarayshan an unu wahn avoid dischrokshan.” 41  Soh di wan dehn weh mi wilin fi aksep weh Peeta mi-di seh geh baptaiz, ahn da day deh bowt 3,000 peepl* staat tu bileev. 42  Ahn dehn kantinyu fi pay kloas atenshan tu di teechin a di apaslz. Dehn kantinyu fi shayr weh dehn mi gat wid wan anada, fi shayr food, ahn fi pray. 43  Afta evribadi* si di sainz ahn mirakl dehn weh di apasl dehn mi-di du, dehn staat tu fyaa Gaad. 44  An aala di nyoo bileeva dehn gyada tugeda ahn shayr evriting weh dehn mi gat wid wan anada. 45  Dehn sel dehn lan an evriting els weh dehn mi oan ahn dehn gi di moni tu eech persn, akaadn tu weh dehn mi need. 46  An evri day dehn mi deh da di templ wid wan main, ahn dehn eet dehn food da wan anada hows. Dehn mi hapi fi shayr dehn food, ahn dehn mi du it wid wahn sinsyaa haat 47  wail dehn mi-di prayz Gaad tu. Aalso, moa peepl mi-di geh fi laik dehn. An evri day, Jehoava mi-di ad aan moa ahn moa peepl tu di kangrigayshan fi mek dehn geh sayv.

Futnoat

Si di Glasari, “Pentikaas.”
Di flaym a faiya mi shayp laik wahn tong.
Er “difrent tong.”
Er “fi wee oan mada tong.”
Lit., “di terd owa a di day.”
Er “fronta mi aiy dehn.”
Lit., “mi flesh.”
Er “mi soal.”
Er “eena Haydeez,” weh da di grayv. Si di Glasari, “Grayv.”
Er “fronta yu fays.”
Er “eena Haydeez,” weh da di grayv. Si di Glasari, “Grayv.”
Er “ih badi dikay.”
Er “soal.”
Er “aala di soal dehn.”