1 Timoti 5:1-25

  • How fi chreet di yonga an oalda bradaz ahn sistaz (1, 2)

  • Sopoat di wido dehn (3-16)

    • Evribadi fi provaid fi dehn oan famili (8)

  • Shoa lata rispek fi di eldaz weh werk haad (17-25)

    • ‘Jrink lee bit a wain fi yu stomok’ (23)

5  Noh taak rof tu wahn oalda man wen yu karek ahn. Bot taak tu ahn eena wahn kain way, jos laik how yu wuda taak tu yu pa. Ahn taak tu di yonga man dehn jos laik how yu wuda taak tu yu breda dehn.  Yu fi taak tu di oalda uman dehn eena wahn kain way, jos laik how yu wuda taak tu yu ma. Ahn taak tu di yonga uman dehn laik if dehn da yu sista, bot mek shoar yu kip yu haat kleen tuwaadz dehn.  Aana di wido dehn weh noh ga nobadi fi sopoat dehn, ahn tek kayr a dehn.  Bot if wahn wido ga chiljren ahn granchiljren, mek dehn laan fers how tek fi kayr a shee, an eena dis way, dehn wahn di shoa dat dehn di wership Gaad wid aala dehn haat. Di chiljren ahn granchiljren fi gi dehn payrents ahn granpayrents weh dehn dizerv. If dehn du dat, Gaad wahn pleez wid dehn.  Now wahn wido weh noh ga notn ahn weh noh ga nobadi fi sopoat ahn shoa chros eena Gaad, ahn shee fi kantinyu pray ahn bayg Gaad fi help day ahn nait.  Bot di wido weh onli liv fi satisfai ih oan dizaiyaz* ded eevn doa shee alaiv.  Soh kantinyu fi gi dehnya inschrokshanz,* soh dat peepl noh fain no faalt wid dehn.  Wahn persn fi provaid fi ih oan famili, espeshali fi di membaz a ih hows. If ih noh du dat, den ih di ton ih bak pahn weh wi bileev an ih wers dan sombadi weh noh ga no fayt.  Yu onli fi put di naym a wahn wido pahn di lis fi geh help if shee oava 60 yaaz oal, if shee mi faytful tu ih hozban wen hihn mi livin,* 10  if shee ga wahn repyutayshan fi du lata gud, if shee mi chrayn ih chiljren gud, if shee lov fi welkom peepl ahn bee kain tu dehn, if shee wash di fut dehn a di hoali peepl, if shee help peepl wen dehn di sofa, an if shee werk haad fi du lata gud tingz. 11  Pahn di ada han, noh put di yonga wido dehn pahn di lis, kaaz wen dehn sekshwal dizaiya kohn bitween dehn ahn dehn servis tu Krais, dehn wahn waahn geh marid. 12  Ahn dehn wahn bring jojment pahn dehnself bikaaz dehn neva kip di pramis weh dehn mi mek. 13  Dehn mait eevn laan fi bee layzi, ahn dehn mait goh rong fahn wan hows tu di neks, ahn dehn noh onli mait laan fi bee layzi bot dehn mait laik gasip an intafyaa eena ada peepl bizniz, di taak bowt tingz weh dehn noh fi taak bowt. 14  Soh den, Ah waahn di yonga wido dehn geh marid, ga pikni, ahn tek kayr a evribadi weh liv eena dehn hows. Eena dis way, dehn noh wahn gi no reezn tu nobadi fi goh gens dehn ahn taak bad bowt dehn. 15  In fak, som wido lef di chroot aredi fi fala Saytan. 16  If wahn uman weh da wahn bileeva ga wahn famili memba weh da wahn wido, den shee fi help di wido soh dat ih da noh wahn berdn tu di kangrigayshan. Den di kangrigayshan ku help di wido dehn weh noh ga nobadi fi sopoat dehn. 17  Unu fi shoa lata rispek tu di eldaz weh di tek di leed eena wahn gud way, espeshali di wan dehn weh werk haad fi taak bowt di werd a Gaad ahn teech it. 18  Kaaz laik weh di skripcha seh, “Yu noh fi kova wahn bul mowt soh ih kyaahn eet wen ih di chrash owt di grayn,” aalso, “di werka dizerv ih pay.” 19  Yu noh fi du notn if sombadi akyooz wahn oalda man,* eksep if too er chree witnis gi proof. 20  If enibadi kip aan di praktis sin, yu mos karek dehn fronta evribadi, ahn dat wahn serv az wahn waanin fi evribadi els.* 21  Ah di koman yu fronta Gaad, Krais Jeezas, ahn di aynjel dehn weh Gaad chooz, fi obay dehnya inschrokshanz widowt prejudis ahn widowt shoa fayvritizm. 22  Neva hori fi apoint wahn man. Pahn tap a dat, noh tek paat eena ada peepl sin. Kip yuself kleen eena di tingz weh yu du. 23  Noh jrink nohmoh waata,* bot jrink wahn lee bit a wain fi help yu stomok ahn bikaaz yu aalwayz sik. 24  Evribadi noa bowt di sin dehn weh som peepl du, ahn dehndeh peepl geh joj rait away, bot di sin dehn weh ada peepl du noh kohn tu lait til laytaraan. 25  Saym way soh, evribadi noa bowt di gud tingz weh peepl du, ahn nobadi ku haid di gud tingz weh dehn du eena seekrit.

Futnoat

Dis ku aalso rifaa tu sekshwal dizaiyaz.
Er “koman.”
Lit., “if shee da-mi di waif a wan hozban.”
Er “wahn elda.”
Lit., “soh dat di res wahn bee frayd.”
Er “Noh onli jrink waata.”