1 Timoti 4:1-16

  • Waanin gens di teechinz fahn di deemonz (1-5)

  • How fi bee wahn gud servant a Krais Jeezas (6-10)

    • Eksasaiz; serv Gaad wid yu hoal haat (8)

  • Du yu bes fi bee wahn gud teecha (11-16)

4  Bot di mesij weh kohn fahn Gaad* seh dat eena di fyoocha* som peepl wahn looz dehn fayt eena Gaad, ahn dehn wahn pay atenshan tu sohn mesij weh luk laik dehn kohn fahn Gaad bot weh da noh chroo,* ahn dehn wahn lisn tu teechinz weh kohn fahn deemonz.  Ahn dis da bikaaz dehn wahn lisn tu sohn hipokrit weh tel lai, ahn dehn kanshans noh wahn feel notn nohmoh, laik if sombadi bon it wid wahn hat aiyan.  Ahn dehnya hipokrit wahn stap peepl fahn geh marid ahn dehn wahn koman peepl noh fi eet sertn kaina food. Bot Gaad kriyayt dehn food soh dat peepl weh ga fayt ahn ga di karek andastandin a di chroot ku eet it an tel ahn tanks far it.  Kaaz evriting weh Gaad mek gud, ahn yu noh fi rijek notn if yu don pray ahn tel Gaad tanks far it.  Bikaaz Gaad werd ahn pryaa mek di food hoali.  If yu gi dis kongsl tu di bradaz, yu wahn proov dat yu da wahn gud servant a Krais Jeezas. Yu wahn shoa dat yu di feed pahn di werd a fayt ahn di gud teechin weh yu di fala kloas-wan.  Bot rijek eni faals stoari, laik di wan dehn weh dehn oal laydi tel. Dehn stoari goh gens weh hoali ahn dehn noh wert notn. Insteda dat, werk haad fi chrayn yuself fi serv Gaad wid yu hoal haat.  Ih impoatant fi eksasaiz, bot di benifit a dat noh laas lang. Bot if wahn persn serv Gaad wid ih hoal haat, dat help ahn eena evriting bikaaz ih ku geh di blesinz weh Gaad pramis eena laif now an eena di fyoocha.  Yu ku chros an aksep weh Ah di tel yu. 10  Dis da wai wi di werk haada ahn haada, bikaaz wi put wi chros eena wahn livin Gaad, hoo da wahn Sayvya fi aal kaina peepl, espeshali faytful peepl. 11  Kip aan di gi dehnya koman ahn kantinyu fi teech. 12  Noh mek enibadi luk dong pahn yu bikaaz yu yong. Insteda dat, yu fi shoa dehn wan weh bileev eena Krais di way dehn shuda bihayv bai di way how yu taak, di way how yu du tingz, di way how yu lov peepl, di way how yu shoa yu fayt, ahn di way how yu di liv wahn kleen laif.* 13  Kantinyu fi werk haad fi reed beta fronta peepl, fi bee moa inkorijin, ahn fi teech beta til wen Ah kohn bak. 14  Noh stap yooz di gif weh Gaad mi gi yu chroo wahn prafesi wen di badi a eldaz mi apoint yu. 15  Tek taim fi tink bowt dehnya tingz ahn kip aan di stodi dehn wid aala yu haat, soh dat evribadi ku si dat yu di du beta aala di taim. 16  Du yu bes fi bee wahn gud egzampl ahn fi bee wahn gud teecha. Kip aan di werk haad fi du dehnya tingz, bikaaz if yu du dis, yu wahn sayv yuself ahn di peepl weh lisn tu yu.

Futnoat

Er “fahn di spirit.”
Er “dat laytaraan.”
Lit., “sohn spirit weh chrik peepl.”
Er “wahn laif weh pyoar.”