1 Samwel 16:1-23
16 Afta sohn taim paas, Jehoava tel Samwel: “Fi humoch langa yu wahn bee sad oava* Saal? Yu noh si dat Ah don rijek ahn az king oava Izrel? Ful yu haan wid ail ahn goh da Jesi weh liv da Betlihem, kaaz Ah don pik wan a fi hihn son fi bee king oava di Izrelait dehn.”
2 Bot Samwel seh: “Wen Saal hyaa bowt it, ih wahn kil mi. Soh da how Ai fi goh?” Den Jehoava tel ahn: “Kehr wahn yong kow wid yu ahn seh, ‘Ah gwehn aafa wahn sakrifais tu Jehoava.’
3 An invait Jesi fi goh wid yu da di plays weh yu wahn aafa di sakrifais, ahn den Ah wahn mek yu noa weh fi du. Ah wahn shoa yu hoo Ai pik ahn yu fi anoint* ahn.”
4 Soh Samwel du weh Jehoava tel ahn fi du. Wen hihn reech Betlihem ahn meet op wid di eldaz* eena di siti, dehn staat chrimbl, ahn dehn seh: “Evriting aarait?”
5 Den hihn seh: “Yea, evriting gud. Ah kohn fi aafa wahn sakrifais tu Jehoava. Unu geh redi* an unu kohn wid mi.” Den afta dat hihn mek Jesi an ih son dehn geh redi tu, an ih kehr dehn da di plays weh ih mi wahn aafa di sakrifais.
6 Az dehn kom een, Samwel aiy gaahn schrayt pahn Elaiyab, an ih seh: “Fi shoar dis da di wan weh Jehoava pik.”*
7 Bot Jehoava tel Samwel: “Noh pay main tu how ih luk er how taal ih taal, kaaz hihn da noh di wan weh Ai chooz. Di way peepl si tingz da noh di saym way how Gaad si tingz, kaaz peepl onli si how wahn persn luk pahn di owtsaid, bot Jehoava si weh deh eena dehn haat.”
8 Den Jesi kaal Abinadab ahn bring ahn da Samwel, bot Samwel seh: “Jehoava noh pik dis wan needa.”
9 Neks Jesi bring Shama fronta ahn, bot Samwel seh: “Jehoava noh pik dis wan needa.”
10 Soh Jesi bring sevn a ih son dehn fi Samwel, bot Samwel tel Jesi: “Jehoava noh pik non a dehn.”
11 Fainali Samwel aks Jesi: “Dehnya da aala yu son?” Ahn hihn ansa: “Dehn stil ga di yongis wan, bot hihn di tek kayr a di sheep.” Den Samwel tel Jesi: “Tel ahn fi kohn ya, kaaz wi noh wahn eet til ih get ya.”
12 Soh ih sen far ahn, an ih kohn. Now hihn mi luk hansom ahn helti, an ih aiy dehn mi priti. Den Jehoava seh: “Get op an anoint ahn, kaaz hihn da di wan!”
13 Soh Samwel geh di haan weh gat een di ail an anoint Dayvid fronta ih breda dehn. Ahn fahn da day deh Jehoava spirit mi gi Dayvid powa. Afta dat Samwel lef fahn deh ahn gaahn da Rayma.
14 Now Jehoava tek weh ih spirit fahn Saal, ahn Jehoava alow Saal oan main* fi taament ahn.
15 Saal servant dehn tel ahn: “Gaad di alow yu oan main fi fraitn yu.
16 Wi laad, pleez koman wan a yu servant fi luk fi sombadi weh noa how fi play di haap gud. Hihn ku play di haap enitaim dat hapm tu yu, ahn yu wahn feel beta.”
17 Soh Saal tel ih servant dehn: “Pleez fain sombadi fi mi weh ku play di haap gud, ahn bring ahn ya.”
18 Wan a ih servant seh: “Jesi fahn Betlihem ga wahn son weh noa how fi play di haap gud; Ah don si how ih play. Hihn ga lata korij an ih schrang, ih noa how fi ekspres ihself gud, ih hansom, ahn Jehoava deh wid ahn.”
19 Soh Saal sen sohn mesinja fi tel Jesi: “Sen mi yu son Dayvid weh deh owt di main di sheep dehn.”
20 Soh Jesi tek wahn bag weh mek owta animal skin ahn ful it op wid wain ahn put di bag ahn sohn bred pahn wahn dongki, an ih sen di dongki ahn wahn yong goat lang wid Dayvid fi mek ih goh da Saal.
21 Soh Dayvid gaahn da Saal ahn staat serv ahn. Saal mi lov Dayvid wahn lat an ih mek Dayvid bee di persn weh bak ih aama an ih wepan dehn.
22 Saal sen wahn mesij tu Jesi ahn seh: “Pleez mek Dayvid stay ahn kantinyu serv mi, kaaz Ah reeli laik ahn.”
23 Enitaim Gaad alow Saal main fi taament ahn, Dayvid wuda play di haap ahn dat wuda mek Saal kaam dong ahn feel beta, an ih main wuda stap bada ahn.
Futnoat
^ Er “moarn fi.” Si di Glasari, “Moarn.”
^ Si di Glasari, “Anoint.”
^ Si di Glasari, “Elda.”
^ Er “kleen unuself.” Si di Glasari, “Kleen.”
^ Er “da Jehoava anointid wan.”
^ Er “alow wahn bad spirit.” Dis di rifaa tu Saal oan wikid wayz.
