1 Peeta 5:1-14

  • Bee laik wahn shepad fi di flak weh bilangz tu Gaad (1-4)

  • Bee hombl ahn deh pahn yu gyaad (5-11)

    • Chroa aala yu woriz pahn Gaad (7)

    • Di Devl da laik wahn laiyan weh di roar (8)

  • Peeta en ih leta (12-14)

5  Soh den, bikaaz Ai da wahn elda jos laik di eldaz monks unu, an Ai mi witnis aal weh Krais mi sofa, ahn bikaaz Ai wahn shayr eena di gloari weh hihn wahn shoa wi, Ah di bayg aala di eldaz:  Unu mos bee laik wahn shepad ahn tek kayr a di flak weh bilangz tu Gaad, ahn nobadi shuda foas unu fi protek di kangrigayshan, bot unu fi bee wilin. An unu fi du it wid aala unu haat, ahn noh bikaaz unu greedi fi geh mateeryal tingz.  An unu noh fi chreet di peepl weh bilangz tu Gaad di way som maasta baas op dehn slayv, insteda dat, unu fi bee wahn egzampl tu di flak.  Ahn wen di cheef shepad apyaa, unu wahn geh di krong a gloari weh wahn neva fayd weh.  Saym way, di yonga man dehn fi lisn tu di oalda man dehn.* Bot aala unu fi deel wid wan anada eena wahn hombl way, bikaaz Gaad noh pleez wid peepl weh prowd, bot ih giv ih grayt kainis* tu hombl peepl.  Soh den, hombl unuself anda di maiti han a Gaad, ahn hihn wahn aana unu wen di rait taim kom.  Ahn chroa aala unu woriz ahn kyaa pahn hihn, bikaaz hihn kay bowt unu.  Deh pahn unu gyaad ahn yooz gud sens! Unu enimi, di Devl, di waak rong laik wahn laiyan weh di roar fi si hoo ih ku eet op.  Bot unu fi ga schrang fayt, ahn dis wahn help unu fi stan op gens ahn. Unu mos noa dat unu bradaz aal rong di werl di sofa di saym kaina tingz laik unu. 10  Bot afta unu sofa fi wahn lee wail, di Gaad weh shoa grayt kainis eena evri way, ahn hoo kaal unu fi bee wan wid Krais ahn fi geh wahn gloari weh wahn laas fareva, wahn finish unu chraynin. Ahn hihn wahn mek unu schrang, hihn wahn help unu fi stay faytful, ahn hihn wahn put unu pahn wahn salid fongdayshan. 11  Aal powa bilangz tu hihn fareva. Aymen. 12  Silvaynos,* hoo da wahn faytful brada, help mi fi rait dis shaat leta tu unu. Ah rait it fi inkorij unu ahn fi mek unu noa dat Gaad mi reeli giv unu ih grayt kainis. Soh unu mos hoal aan tait tu dis kainis. 13  Wi sista* weh deh ya da Babilan, hoo Gaad mi pik tu, sen heloa fi unu. Ahn Maak, hoo da laik mi son, sen heloa fi unu tu. 14  Greet wan anada wid wahn kis fi shoa dat unu ga lov fi wan anada. Ah pray seh dat aala unu weh da disaipl a Krais ku ga pees.

Futnoat

Er “di eldaz.”
Si di Glasari, “Grayt kainis.”
Silvaynos da wahn nada naym fi Sailas.
Dis di rifaa tu di kangrigayshan da Babilan.