1 Peeta 1:1-25

  • Greetinz fahn Peeta (1, 2)

  • Wi geh wahn nyoo hoap wen wi baan agen (3-12)

  • Unu fi bee hoali laik chiljren weh obeedyant tu Gaad (13-25)

1  Dis da Peeta, an Ai da wahn apasl a Jeezas Krais. Ah di rait dis leta tu di kangrigayshan dehn weh deh da Pontus, Galaysha, Kapadoasha, Aysha, ahn Bitinya. Yes, dis leta da fi unu weh Gaad mi pik, hoo di liv laik farinaz.  Gaad, di hevnli Faada, mi noa heda taim dat hihn mi wahn pik unu. An ih giv unu ih hoali spirit fi mek unu ku bee hoali. Hihn mi du dat soh dat unu obay ahn, an fi mek unu bee kleen wid di blod a Jeezas Krais: Ah pray seh dat Gaad wahn shoa unu moa a fi hihn grayt kainis* ahn giv unu moa pees.  Mek wi gi prayz tu di Gaad ahn Faada a wi Laad Jeezas Krais. Bikaaz Gaad mi ga lata mersi pahn wi wen ih mek wi baan agen ahn wen ih gi wi wahn hoap weh wahn laas chroo di rezorekshan a Jeezas Krais fahn di ded.  Ahn wen wi baan agen, Gaad gi wi wahn inheritans weh kyaahn geh dischrai. Ahn da riwaad di wayt fi unu da hevn.  Ahn Gaad wahn wach oava unu wid ih grayt powa bikaaz unu ga fayt. Gaad di wach oava unu soh dat unu ku gayn dis salvayshan weh evribadi wahn si eena di taim a di en.  Ahn bikaaz a dis unu di rijais, eevn doa unu haftu sofa fi wahn lee wail sayka di chraiyalz weh unu di goh chroo.  Dehnya tingz hapm fi tes owt unu fayt, ahn da kaina fayt wahn mek unu geh prayz, aana, ahn gloari joorin di taim wen Jeezas Krais kohn bak. Dis kaina fayt ga moa valyu dan goal weh ku geh dischrai eevn doa ih paas chroo di faiya.  An eevn doa unu neva si Krais, unu stil lov ahn, an aldoa unu noh di si ahn now, unu stil shoa fayt eena ahn. Ahn bikaaz a dis, unu di ekspeeryens soh moch jai dat unu kyaahn eevn eksplayn it.  An unu noa seh dat unu fayt wahn giv unu salvayshan.* 10  Di prafit dehn weh mi prafesai bowt di grayt kainis a Gaad weh bilangz tu unu now, mi eega fi saach ahn fain owt bowt dis salvayshan. 11  Dehn mi kip aan di stodi bowt weh mi wahn hapm tu di Krais, ahn bowt wen dehndeh tingz weh di hoali spirit* mi seh mi wahn hapm tu ahn. Kaaz di hoali spirit mi mek dehn noa heda taim weh aal di Krais mi wahn sofa, ahn bowt di gloari weh hihn mi wahn get afta dat. 12  Gaad mi mek dehndeh prafit noa dat di prafesi weh dehn mi rait da neva fi dehn, bot da mi fi unu. Ahn now unu di hyaa dehnya tingz chroo di wan dehn weh di preech di gud nyooz tu unu wid di help a di hoali spirit weh kohn fahn hevn. Ahn dehnya da di tingz weh eevn di aynjel dehn eega fi andastan. 13  Soh den, pripyaa unu main fi akshan ahn yooz gud jojment eena evriting. Ahn ga kanfidens eena di grayt kainis weh unu wahn geh wen Jeezas Krais kohn bak. 14  Unu da Gaad chiljren an unu obeedyant tu ahn. Soh stap liv akaadn tu di rang dizaiyaz weh unu yoostu ga bifoa unu mi noa ahn. 15  Insteda dat, unu fi bee hoali eena evriting weh unu du, jos laik di Hoali Wan weh kaal unu. 16  Bikaaz ih rait dong eena di Skripchaz: “Unu fi bee hoali, bikaaz Ai hoali.” 17  An if unu di kaal pahn di Faada weh noh shoa no fayvritizm, bot hoo joj peepl akaadn tu weh dehn du, den joorin di taim weh unu spen ya pahn dis ert, unu beta shoa bai unu akshanz dat unu fyaa Gaad. 18  Kaaz unu noa dat da neva wid tingz weh ku geh dischrai, laik silva er goal, dat Gaad mi reskyu unu fahn di wotlis way a laif weh unu ansesta dehn paas aan tu unu. 19  No, bot da mi wid di preshos blod a Krais, di Lam weh neva ga notn rang wid ahn. 20  Gaad mi pik Krais fahn bifoa di biginin a di hyooman famili,* bot now hihn mi kohn fi fi unu sayk da di en a dehnya dayz.* 21  Ahn bikaaz a weh Jeezas du, unu da bileevaz eena Gaad now, ahn hihn rayz op Jeezas fahn di ded an ih giv ahn gloari. Soh den, unu fi ga fayt ahn kanfidens eena Gaad. 22  Ahn bikaaz unu obay di chroot, unu kleen,* ahn sayka dat unu ga chroo chroo lov fi wan anada. Soh now, unu mos kantinyu fi ga deep lov fi wan anada. 23  Bikaaz, chroo di werd a di Gaad weh liv fareva, unu baan agen. Ahn da noh fahn wahn seed weh ku ded, bot fahn wahn seed weh gi laif.* 24  Kaaz jos laik weh wahn skripcha seh, “Evribadi da jos laik graas, ahn dehn gud luks da jos laik di priti flowaz weh deh monks di graas. Di graas jrai op ahn di flowaz jrap aaf. 25  Bot di werd a Jehoava laas fareva.” Ahn da “werd” da di gud nyooz weh geh preech tu unu.

Futnoat

Si di Glasari, “Grayt kainis.”
Er “giv unu salvayshan fi unu soal.”
Er “di hoali spirit weh mi deh eena dehn.”
Dis di rifaa tu Adam ahn Eev chiljren.
Er “da di en a di taimz.”
Er “unu soal kleen.”
Dis di rifaa tu wahn seed weh ku projoos er bayr froot.