1 Korintyanz 8:1-13

  • Paal kongsl bowt food weh peepl aafa op tu aidol (1-13)

    • Wee noa dat onli wan Gaad deh (5, 6)

8  Now mek Ah taak tu unu bowt food weh peepl aafa op tu aidol. Aala wi noa bowt dat. Nalij mek wi geh prowd, bot lov bil wi op.  If enibadi tink ih noa sohnting, den ih noh noa evriting bowt it yet.  Bot if enibadi lov Gaad, den Gaad noa ahn.  Now mek wi taak bowt weda er nat wi ku eet di food weh peepl aafa op tu aidol. Wee noa dat wahn aidol da noh notn ataal ahn dat onli wan Gaad deh.  Lata tingz deh weh peepl kaal gaad, weda op da hevn er pahn ert, jos laik how lata “gaad” ahn lata “laad” deh.  Bot wee noa dat onli wan Gaad deh, di Faada. Evriting kohn fahn hihn ahn wee bilangz tu hihn. An onli wan Laad deh, Jeezas Krais. Evriting kohn chroo hihn ahn wee egzis chroo hihn.  Bot noh evribadi noa dat. Som peepl yoostu wership aidol. Bikaaz a dat, if dehn eet food weh geh aafa op tu wahn aidol, dehn feel laik dehn di wership da aidol. Soh, dehn week kanshans bada dehn.  Bot food noh wahn bring wi kloasa tu Gaad. Wi noh looz notn if wi noh eet, ahn wi noh gayn notn if wi eet.  Unu mos bee kyaaful dat unu freedom fi chooz noh kaaz nobadi wid wahn week kanshans fi sin* eena sohn kaina way. 10  Sopoaz sombadi si yoo, weh ga nalij, di eet food eena wahn templ wehpaat peepl wership aidol. Yu noh tink dat di wan weh ga wahn week kanshans wahn feel dat ih ku eet food weh peepl aafa op tu aidol tu? 11  Soh di nalij weh yu ga wahn damij yu brada weh ga wahn week kanshans, di saym brada weh Krais mi ded fa. 12  Wen unu sin gens unu bradaz eena da way ahn hert dehn week kanshans, unu di sin gens Krais tu. 13  Dat da wai if food kaaz mi brada fi looz ih fayt,* Ah wahn neva eet meet agen, soh dat Ah noh kaaz mi brada fi sin.*

Futnoat

Er “fi stombl.”
Er “fi stombl.”
Er “fi stombl.”