1 Korintyanz 1:1-31

  • Greetinz fahn Paal (1-3)

  • Paal tank Gaad fi di bradaz da Korint (4-9)

  • Paal inkorij di bradaz fi bee yoonaitid (10-17)

  • Krais da di powa a Gaad ahn di wizdom a Gaad (18-25)

  • Wi onli fi boas bowt Jehoava (26-31)

1  Dis leta da fahn mee, Paal, hoo Gaad kaal fi bee wahn apasl a Krais Jeezas, ahn fahn wi brada Sostineez.  Wi di rait tu di kangrigayshan a Gaad weh deh da Korint. Gaad set unu apaat fi bee wan wid Krais Jeezas, an ih kaal unu fi bee ih hoali peepl. Ahn wi di rait tu evribadi weh kaal pahn di naym a wi Laad Jeezas Krais tu, noh mata wehpaat dehn deh, kaaz hihn da fi dehn Laad ahn fi wee Laad tu:  Wi pray dat Gaad wi Faada ahn di Laad Jeezas Krais shoa unu grayt kainis* ahn giv unu pees.  Ah aalwayz tank Gaad fi unu bikaaz a di grayt kainis weh Gaad shoa unu chroo Krais Jeezas.  Bikaaz unu da wan wid Krais, Gaad giv unu evriting weh unu need, ahn dat da wai unu ku preech di mesij a Gaad gud, an unu ku noa di werd a Gaad gud tu.  Ahn di mesij bowt di Krais tek root eena unu,  soh dat unu ga evri gif weh unu need wail unu di wayt ahn luk faawod tu wen wi Laad Jeezas Krais wahn shoa ih powa.  Pahn tap a dat, Gaad wahn mek unu schrang tu di en soh dat nobadi kyaahn fain no faalt wid unu pahn di day a wi Laad Jeezas Krais.  Gaad faytful, ahn hihn kaal unu soh dat unu ku ga wahn kloas rilayshanship wid ih Son, Jeezas Krais wi Laad. 10  Now mi bradaz, Ah di bayg unu, chroo di naym a wi Laad Jeezas Krais, fi mek aala unu gree wid wan anada soh dat no divizhan noh deh monks unu. Unu fi ga di saym main, an unu fi ga di saym way a tinkin. 11  Mi bradaz, som a di membaz a di hows a Kloawi mi tel mi bowt unu, dat unu kyaahn gree wid wan anada. 12  Ah di seh dis kaaz som a unu di seh wan ting ahn di adaz di seh wahn neks ting. Som di seh: “Ai di fala Paal,” an adaz di seh, “Ai di fala Apolos.” Ahn stilyet som a unu di seh, “Ai di fala Seefas,”* an adaz di seh, “Ai di fala Krais.” 13  Unu tink Krais divaid op eena peesiz? Paal neva ded pahn di stayk fi unu, noh chroo? Er unu mi geh baptaiz eena di naym a Paal? 14  Ah tank Gaad dat Ah neva baptaiz non a unu eksep Krispos ahn Gaiyos, 15  soh dat nobadi ku seh dat unu mi geh baptaiz eena mai naym. 16  Yes, Ah mi baptaiz Stefanas an ih famili tu. Ada dan dat, Ah noh memba if Ah mi baptaiz enibadi els. 17  Krais neva sen mi fi baptaiz peepl, bot fi preech di gud nyooz tu dehn. Ah noh di taak laik peepl weh tink seh dehn waiz, bikaaz if Ah du dat, den Krais det pahn di taacha stayk* wuda bee yoosles. 18  Kaaz di teechin bowt Krais det pahn di taacha stayk* da sohnting foolish tu peepl hoo wahn geh dischrai. Bot fi wee weh di geh sayv, da teechin shoa Gaad powa. 19  Kaaz da jos laik weh di skripcha seh: “Ah wahn dischrai di wizdom a waiz peepl, an Ah wahn rijek di tinkin a waiz peepl.” 20  Wehpaat di waiz peepl deh eena dis sistem a tingz?* Wehpaat di peepl deh weh teech di Laa? Wehpaat di peepl deh weh ku aagyu gud? Gaad shoa dat di wizdom a di werl foolish. 21  Eevn doa peepl a di werl neva geh fi noa Gaad chroo fi dehn oan wizdom, Gaad mi hapi fi sayv peepl weh bileev eena ahn chroo di mesij weh wi preech, eevn doa peepl a di werl tink da mesij foolish. Eena da way, Gaad shoa ih wizdom. 22  Di Jooz aks fi sainz, ahn di Greek dehn luk fi wizdom. 23  Bot wee preech dat Krais mi ded pahn di stayk. Ahn dis da sohnting haad fi mek di Jooz aksep* ahn da sohnting foolish tu peepl a di nayshanz. 24  Bot tu di peepl weh Gaad kaal, di Jooz ahn di Greek dehn, Krais da di powa a Gaad ahn di wizdom a Gaad. 25  Peepl mait tink dat di tingz a Gaad foolish ahn week, bot dehnya tingz waiza ahn schranga dan dehn. 26  Soh mi bradaz, unu si fi unuself dat wen Gaad mi kaal unu, lata unu neva waiz akaadn tu hyooman standadz, lata unu neva powaful, ahn lata unu neva kohn fahn impoatant famili. 27  Bot Gaad pik di tingz a di werl weh peepl si az foolish fi shaym dehn wan weh waiz. Ahn Gaad pik di tingz a di werl weh peepl luk pan az week fi shaym dehn wan weh schrang. 28  Ahn Gaad pik di tingz a di werl weh peepl noh si az impoatant ahn di tingz weh peepl luk dong pan ahn tink da noh notn. Ih pik dehndeh tingz fi dischrai di tingz weh peepl si az impoatant, 29  soh dat nobadi* ku boas fronta Gaad. 30  Bot da bikaaz a Gaad unu da wan wid Krais Jeezas, ahn hihn tel wi bowt Gaad wizdom ahn raichosnis. Bikaaz a Jeezas wi ku bee hoali, ahn chroo fi hihn det ih bai wi bak ahn set wi free. 31  Soh da jos laik weh rait dong eena di skripcha: “If enibadi boas, mek dehn boas bowt Jehoava.”

Futnoat

Si di Glasari, “Grayt kainis.”
Seefas da wahn nada naym fi Peeta.
Si di Glasari, “Taacha stayk.”
Si di Glasari, “Taacha stayk.”
Si di Glasari, “Sistem a tingz.”
Er “dis kaaz di Jooz fi stombl.”
Lit., “no flesh.”