Skip tu di aatikl

Di Baibl Chaynj Peepl Laif

Di Bes Praiz a Mi Laif

Di Bes Praiz a Mi Laif
  • BAAN EENA: 1967

  • KONCHRI WEH IH KOHN FRAM: FINLAND

  • LAIF HISCHRI: PROFESHANAL TENIS PLAYA

MI LAIF EENA DI PAAS

Ai groa op eena wahn kwaiyet lee vilij da Finland, weh naym Tampere. Mi famili neva reeli rilijos, bot ejukayshan ahn gud manaz mi impoatant tu dehn. Mai ma da fahn Germany, ahn wen Ah mi smaal, sohntaim Ah wuda spen wahn lee taim da West Germany, wehpaat mi granpayrents mi liv.

Fahn Ai da-mi wahn lee bwai Ai mi laik spoats. Ai doz play aal kaina spoats, bot wen Ah mi bowt 14, Ah disaid jos fi foakos pahn tenis. Bai di taim Ah mi ton 16, Ah mi-di chrayn too er chree taimz fi di day​—Ah mi ga too profeshanal chraynin seshan, ahn den wen eevnin taim kohn, Ah praktis bai miself. Ai mi lov evriting bowt di gaym; wen Ah mi play tenis, da mi wahn way fi chalenj mi main ahn badi. Eevn doa Ah mi laik heng rong wid mi frenz ahn ga wahn lee jrink evri now an agen, Ah neva get eena no chrobl bikaaz a jrogz er alkohol. Mai laif mi senta rong tenis​—dat da weh mi kohn fos.

Ah staat tu play eena ATP toarnaments wen Ah mi 17. * Afta Ah mi win wahn lata dehn sayhn toarnament, di hoal konchri mi geh fi hyaa bowt mi ahn lov mi. Wen Ah mi 22, Ah mi deh monks di tap 50 tenis playa dehn eena di werl.

Fi yaaz, Ah chravl rong di werl di play profeshanal tenis. Ah mi si sohn byootiful plays, bot ih aalso oapm mi aiy tu aala di prablemz wi di fays rong di werl, laik kraim, jrog abyoos, ahn eevn polooshan. Fi egzampl, wen Ah mi deh da di US, dehn tel wi noh fi goh da sertn lee ayrya eena som a di siti dehn bikaaz a di hai kraim rayt. Aala dat mi badi mi. Soh eevn doa Ah mi-di du sohnting weh Ah lov, Ah stil mi feel laik sohnting mi misn.

HOW DI BAIBL CHAYNJ MI LAIF

Mi gyalfren, Sanna, mi staat tu stodi di Baibl wid Jehoava Witnisiz. Ah neva noa shee mi rilijos, bot Ah neva stap ahn fahn stodi. Eena 1990 wi mi geh marid, ahn di yaa afta dat, shee geh baptaiz az wan a Jehoava Witnisiz. Bot Ai neva tink bowt miself az wahn rilijos persn, eevn doa Ah mi bileev eena Gaad. Ah memba dat mi German graama yoostu reed di Baibl wahn lat, ahn shee mi eevn teech mi how fi pray.

Wahn day, mee ahn Sanna mi-di vizit wahn Witnis kopl. Di hozban, weh mi naym Kari, mi shoa mi weh di Baibl prafesai bowt “di laas dayz.” (2 Timoti 3:​1-5) Dat mi ga wahn big ifek pahn mi, kaa den Ah riyalaiz wai soh moch bad tingz di hapm eena di werl. Da day deh wi neva taak tu moch bowt rilijan. Bot afta dat, Ah mi staat tu taak tu Kari bowt di Baibl, an evriting weh Ah mi laan mi mek lata sens. Ih mi haad fi kantinyu wid mi stodi bikaaz Ah mi bizi an Ah yoostu chravl soh moch, bot dat neva stap Kari. Aala di kweschan dehn weh Ah mi aks joorin wi Baibl stodi, Kari wuda rait wahn leta fi ansa dehn. Di ansaz weh di Baibl gat bowt laif mi mek sens tu mee, ahn lee bit bai lee bit, Ah staat tu si di mayn mesij a di Baibl​—dat di Kingdom a Gaad wahn mek Gaad perpos fi di ert ahn fi hyoomanz kohn chroo. Wen Ah mi laan dat Gaad naym da Jehoava, ahn si weh aal hihn du fi wi, ih mi reeli toch mi haat. (Psalm 83:18) Bot wen Ah fain owt dat hihn giv op ih onli Son jos fi wee, dat da weh mi toch mi di moas​—da neva jos wahn leegal araynjment bot ih mi shoa fi hihn lov fi wi. (Jan 3:​16) Ah aalso laan dat Ai ga di apachooniti fi bee Gaad fren ahn liv fareva eena wahn peesful paradais. (Jaymz 4:8) Ah staat tu aks miself, “How Ai ku shoa mi apreeshiayshan fi dat?”

Ah staat tu luk pahn how Ah mi-di liv. Fahn di Baibl, Ah mi-di laan dat moa hapinis kohn tu wi wen wi giv, an Ah mi reeli waahn shayr weh Ah mi-di laan wid adaz. (Aks 20:35) Ai da-mi wahn profeshanal tenis playa, ahn fi bowt 200 dayz owta di yaa Ah mi deh owt di kompeet, an Ah mi deh faar fahn hoam. Mai hoal famili mi-di mek wahn lata sakrifais jos fi mee soh dat Ai kuda kantinyu mi kareeya. Soh Ah riyalaiz dat Ah mi haftu mek wahn chaynj.

Ah mi noa fi shoar dat mi disizhan fi lef bihain wahn gud spoats kareeya fi rilijos reeznz mi wahn bee wahn sohnting weh lata peepl wudn andastan. Bot di apachooniti fi jraa kloasa tu Jehoava ahn liv fareva beta dan eni praiz Ai kuda mi eva win di play tenis. Soh dis disizhan da-mi wahn eezi wan. Ah mek it mi goal noh fi wori bowt weh ada peepl mait seh​—dis da-mi mai disizhan. Wahn Skripcha weh mi reeli inkorij mi fi noh giv een tu dehn kaina presha da-mi Psalm 118:6: “Jehoava deh pahn mai said; Ai noh wahn bee frayd. Da weh man ku du tu mee?”

Rong dis taim, sohn sponsa mi aafa mi wahn krayzi deel weh mi wahn alow mi fi play tenis fi wahn lang taim. Bot Ah mi don mek op mi main, soh Ah neva aksep di aafa an Ah stap play eena di ATP toarnament dehn. Ah kantinyu fi stodi di Baibl, ahn pahn Joolai 2, 1994, Ah mi geh baptaiz az wan a Jehoava Witnisiz.

HOW AH BENIFIT

Fi mee, sohnting bad neva haftu hapm tu mi fi mek Ah staat tu tink bowt Gaad. An Ah neva reeli si miself az sohnbadi weh mi-di saach fi di chroot eeda. Ah mi tink dat mai laif mi gud, ahn dat Ah mi gat evriting weh Ah kuda mi eva aks fa. Bot da mi laik di chroot fahn di Baibl mi-di wayt fi mek Ah fain it. Ah laan dat laif ga moa meenin, ahn dis da di bes laif eva! Wi famili schranga ahn moa yoonaitid dan eva. An Ah soh hapi dat mi chree son disaid fi fala mi futstep​—noh az sohnbadi weh play spoats, bot az wahn Kristyan.

Ah stil laik play tenis. Ahn chroo di yaaz Ah werk az wahn tenis koach, an Ah aalso manij wahn tenis senta. Bot mai laif noh senta rong spoats nohmoh. Bifoa, Ah wuda chrayn fi soh moch owaz evri week fi bee wahn beta tenis playa, wahn wina. Bot now, az wahn ful-taim ivanjelaiza, Ah soh hapi fi yooz mi taim di help ada peepl laan an aplai Baibl prinsiplz weh mi chaynj mai laif. Wen mai rilayshanship wid Jehoava tek fos plays eena mi laif, ahn wen Ah ku tel adaz mai hoap fi wahn beta fyoocha, dat da wen Ah chrooli hapi.​—1 Timoti 6:​19.

^ par. 10 ATP stan fi Association of Tennis Professionals. Di ATP Toar inklood wahn lata profeshanal toarnament. Ahn di winaz get points ahn moni. Di ATP disaid how dehn wahn rank di playaz bays pahn di amonk a points weh dehn get.