Skip tu di aatikl

DI BAIBL CHAYNJ PEEPL LAIF

“Ah Mi Ignarant ahn Vailent”

“Ah Mi Ignarant ahn Vailent”
  • Baan Eena: 1975

  • Konchri Weh Ih Kohn Fram: Mexico

  • Laif Hischri: Ignarant; vailent; kriminal

MI LAIF EENA DI PAAS

Ai mi baan da San Juan Chancalaito, wahn lee tong eena di stayt a Chiapas, Mexico. Mi famili da fahn wahn rays kaal di Chol, weh kohn fahn di Maiya peepl. Mi payrents mi ga 12 chiljren. Ai da-mi di fif wan. Wen Ai da-mi wahn pikni, mee ahn mi res a brada ahn sista dehn mi stodi di Baibl wid Jehoava Witnisiz. Bot, Ah neva aplai weh Ah mi-di laan.

Bai di taim Ah mi 13 yaaz oal, Ah mi-di tek jrogz ahn teef tingz fahn ada peepl. At da ayj Ah lef hoam ahn gaahn fahn plays tu plays. Wen Ah mi 16, Ah mi staat werk pahn wahn weed plantayshan. Ah mi werk deh fi bowt wahn yaa. Den, wahn nait wen wi mi-di kehr wahn boat-ful a weed, wahn groop a ada jrog deelaz atak wi wid gon. Dehn mi-di shoot op aata wi, bot Ah jomp da riva ahn swim aal di way dong di riva fi eskayp. Noh lang afta dat, Ah en op da di United States.

Wen Ah get da di States, Ah kantinyu fi werk az wahn jrog deela ahn get eena moa chrobl. Wen Ah mi 19, dehn ares mi ahn sen mi da prizn bikaaz Ah mi-di teef fahn peepl an Ah mi nayli kil sombadi. Da prizn, Ah jain wahn gang ahn du moa wikid tingz. Bikaaz a dat, dehn sen mi tu wahn hai-sikyoariti prizn da Lewisburg, Pennsylvania wehpaat dehn kip seeryos kriminal.

Da di Lewisburg prizn, Ah gaan fahn bad tu wos. Sins Ah mi don gat aan gang tatoo, ih mi eezi fi jain di saym gang eena dis neks prizn. Ah geh moa vailent, ahn get eena wan fait afta di ada. Wahn taim Ah mi deh eena wahn gang fait eena di prizn yaad. Wi mi kruwil. Wi yooz baysbaal bat an sohn baar bel fi beet op di ada gang. Di gyaad dehn mi haftu yooz tyaa gyas fi brok op di fait. Afta dat, dehn put mi weh dehn kip daynjaros priznaz eena di prizn. Ah mi ga wahn bad tempa an Ah neva ga rispek fi nobadi wen Ah taak tu dehn. Ah wudn tink twais fi beet op sombadi. In fak, Ah mi laik it. Ah neva feel sari fi eniting Ah mi du er seh.

HOW DI BAIBL CHAYNJ MI LAIF

Now dat Ah mi deh eena dis paat a di prizn, Ah mi haftu stay eena mi sel fi moas a di day. Soh Ah staat reed di Baibl. Layta, wahn gyaad gi mi di buk You Can Live Forever in Paradise on Earth. * Wen Ah mi-di reed dis buk, Ah memba wahn lata di tingz weh Ah mi laan wen Ai da-mi wahn pikni. Afta dat, Ah staat tu tink bowt how sad mi laif ton owt fi bee bikaaz Ah mi soh vailent. Ah mi eevn tink bowt mi famili. Too a mi sista dehn da-mi Witnisiz. Den, Ah tink tu miself, ‘Dehn wahn liv fareva.’ Soh Ah aks miself, ‘Wai Ai kyaahn liv fareva tu?’ Da den Ah mek op mi main fi chaynj mi laif.

Bot, Ah noa dat Ah mi need help fi chaynj. Soh, di fos ting Ah du da pray tu Jehoava Gaad, an Ah bayg ahn fi pleez help mi. Den, Ah rait tu di branch aafis a Jehoava Witnisiz da di United States an aks fi wahn Baibl stodi. Dehn neva mi-di alow peepl hoo da neva famili fi vizit mi. Soh wahn Brada fahn di kangrigayshan staat rait mi sohn inkorijin leta ahn sen Baibl lichricha fi mi. Dis mi mek Ah waahn chaynj eevn moa.

Wan a di fos big chaynj Ah mi mek da wen Ah disaid fi lef di gang weh Ah mi yoostu bee paat a fi yaaz. Di gang leeda mi-di stay eena da paat a di prizn tu, soh wahn taim wen wi mi-di tek wan a wi brayk dehn, Ah tel ahn dat Ah mi waahn bee wan a Jehoava Witnisiz. Ih tel mi: “If yu seeryos, du it. Ai kyaahn get eena Gaad way. Bot if yu jos waahn lef di gang, yu noa weh wahn hapm, rait?” Wel, Ah mi sopraiz!

Joorin di neks too yaaz, di prizn gyaad dehn mi noatis dat Ah mi-di mek sohn chaynj eena mi laif. Soh, dehn staat chreet mi difrent. Fi egzampl, di gyaad dehn neva yoostu hankof mi wen dehn di kehr mi fi goh bayd. Wan a di gyaad mi eevn inkorij mi fi noh stap mek dehn chaynjiz. In fak, dehn moov mi fahn deh ahn put mi eena wahn kyamp kloas tu di mayn prizn weh mi ga les sikyoariti. Eena 2004, afta Ah spen ten yaaz da prizn, dehn free mi ahn dipoat mi tu Mexico pahn wahn prizn bos.

Az soon az Ah get da Mexico, Ah fain wahn Kingdom Haal a Jehoava Witnisiz. Ah gaahn da mi fos meetin eena mi prizn yoonifaam kaaz dat da-mi di onli deesent kloas Ah mi gat. Eevn doa Ah mi luk laik dat, di Witnisiz mi gi mi wahn waam welkom. Fi dehn kainis mi mek Ah riyalaiz dat Ah mi deh monks chroo Kristyanz. (Jan 13:35) Da saym meetin deh, di eldaz set op wahn Baibl stodi fi mi. Ah mi baptaiz az wan a Jehoava Witnisiz wan yaa layta, pahn Septemba 3, 2005.

Ah staat painyaa eena Janiweri 2007, an Ah spen 70 owaz evri mont di teech peepl di Baibl. Den eena 2011, Ah grajuayt fahn di Baibl Skool fi Singl Bradaz, weh da now di Skool fi Kingdom Ivanjelaizaz. Dis skool mi reeli help mi fi tek kayr a mi difrent rispansabiliti eena di kangrigayshan.

Ah injai di minischri kaaz Ah di teech adaz fi bee peesabl

Eena 2013, Ah marid mi waif, Pilar. Shee seh dat sohntaim shee kyaahn bileev di tingz dehn weh Ah yoostu du eena di paas. Ah neva gaahn bak tu da oal laif weh Ah mi liv. Mee ahn mi waif bileev dat di persn Ai ton owt fi bee tudeh da proof dat di Baibl ga di powa fi chaynj peepl laif.​—Roamanz 12:2.

HOW AH BENIFIT

Ai feel laik di skripcha da Look 19:10 da fi mee. Ih seh: “[Jeezas] kohn fi luk fi dehn wan weh laas soh dat ih ku sayv dehn.” Eena mi laif, Ah noh feel laik Ah laas nohmoh. Bikaaz a di Baibl, now Ah ga wahn perpos eena laif, peesful rilayshanship wid adaz, ahn wahn gud rilayshanship wid mi Kriyayta, Jehoava Gaad. Ah reeli apreeshiayt weh di Baibl mi du fi mi.

[FUTNOAT]

^ par. 13 Jehoava Witnisiz yoostu poblish dis buk, bot dehn noh print it nohmoh. Now wi yooz di buk Weh di Baibl Ku Teech Wi? fi help peepl andastan di Baibl.