Skip tu di aatikl

Yu Tink Enibadi Wahn Eva Dischrai di Ert?

Yu Tink Enibadi Wahn Eva Dischrai di Ert?

Weh di Baibl seh?

Nobadi wahn eva dischrai di ert, bon it op wid faiya, er sen hyoomanz fi liv sohnweh els. Di Baibl seh dat Gaad mek di ert fi peepl liv pan fareva.

  • “Di raichos wan dehn wahn inherit di ert, ahn dehn wahn liv fareva pan it.”​—Psalm 37:29.

  • “[Gaad] put di ert pan ih fongdayshan; ih wahn neva moov fahn weh ih deh fareva an eva.”​—Psalm 104:5.

  • “Di ert deh ya fareva.”​—Ecclesiastes 1:4.

  • “Di Wan hoo mek di ert, di Kriyayta hoo mek it fi laas fareva, . . . neva du it fi notn, bot fi mek peepl liv pan.”​—Isaiah 45:18.

Yu tink hyoomanz wahn dischrai di ert?

Gaad noh wahn alow hyoomanz fi dischrai di ert. Eevn doa ih mait luk laik hyoomanz wahn dischrai evriting chroo waar ahn polooshan, di Baibl seh dat Gaad wahn “dischrai dehn wan weh dischrai di werl.” (Revilayshan 11:18) How ih wahn du dis?

Gaad wahn yooz fi hihn perfek Kingdom da hevn fi tek di plays a aala di govament dehn pahn di ert, bikaaz non a dehn ku protek di ert fahn geh dischrai. (Daniel 2:​44; Machyu 6:​9, 10) Da Gaad Son, Jeezas Krais, da di King a di Kingdom a Gaad. (Isaiah 9:​6, 7) Wen Jeezas mi deh pahn di ert, hihn mi shoa dat hihn ga di powa fi du mirakl ahn kanchroal di powa a naycha. (Maak 4:​35-​41) Soh az King a Gaad Kingdom, hihn wahn kanchroal di ert ahn naycha wid fi hihn powa. Hihn wahn ku yooz ih powa fi fiks tingz pahn di ert ahn mek di ert bee wahn paradais laik di gyaadn a Eedn agen.​—Machyu 19:28; Look 23:43.

Som peepl bileev dat di Baibl seh dat di ert wahn bon op wid faiya. Da chroo?

No, da noh chroo. Lata peepl bileev dat bikaaz dehn noh andastan 2 Peeta 3:7, weh seh dat Gaad wahn mek di hevn ahn di ert ‘bon op eena faiya pahn di Day wen hihn wahn joj di peepl weh noh waahn du weh ih seh, ahn ih wahn dischrai dehn.’ Bot mek wi taak bowt too impoatant tingz weh help wi fi andastan da vers beta:

  1. Di Baibl yooz di werd “hevn,” di werd “ert,” ahn di werd “faiya” fi meen lata difrent ting. Fi egzampl, Genesis 11:1 seh: “Di hoal ert mi taak wan langwij.” Eena dis vers, “di ert” da di peepl dehn weh mi liv bak den.

  2. Di vers dehn bifoa an afta 2 Peeta 3:7 help wi fi andastan weh hevn, ert, ahn faiya meen eena dis chapta a di Baibl. Vers 5 ahn 6 kompyaa di ‘Day wen Gaad wahn joj peepl’ tu di taim wen Noawa mi liv. Bak den, Gaad mi dischrai di werl, bot di planet Ert neva geh dischrai. Insted, di Flod mi dischrai onli di wikid peepl. (Genesis 6:​11) Ih mi dischrai di hevn bak den tu​—di peepl hoo mi-di rool oava aala di wikid peepl bak den. Soh, da mi onli di wikid peepl ahn di wan dehn hoo mi-di rool oava dehn mi geh dischrai, noh di ert. Noawa ahn fi hihn famili mi servaiv chroo di Flod ahn liv pahn di ert afta di waata mi jrai op.​—Genesis 8:​15-​18.

Soh jos laik joorin di Flod, di dischrokshan, er “faiya,” weh 2 Peeta 3:7 taak bowt wahn bee di en a aal wikid peepl, noh di planet Ert. Gaad pramis wi “wahn nyoo hevn ahn wahn nyoo ert” wid chroo jostis ahn raichosnis.” (2 Peeta 3:​13) Di “nyoo hevn,” er di nyoo roolaship a Gaad Kingdom, wahn rool oava di “nyoo ert,” aal raichos hyoomanz weh servaiv. Anda di nyoo roolaship, di ert wahn bee wahn paradais agen.​—Revilayshan 21:​1-4.