Skip tu di aatikl

HELP FI DI FAMILI

How fi Shoa Afekshan

How fi Shoa Afekshan

Som marid kopl shoa les ahn les afekshan fi eech ada. If dis di hapm eena yu marij, yu tink dis da sohnting weh yu shuda bee kansaan bowt?

 Weh yu need fi noa

Afekshan impoatant if yu waahn ga wahn schrang marij. Jos laik how di badi need food ahn waata evri day fi stay schrang ahn helti, wahn marij need afekshan aal di taim fi stay schrang. Eevn afta yaaz a marij, wahn hozban ahn wahn waif need fi tel eech ada dat dehn lov ahn kayr fi wan anada.

Chroo lov noh selfish. Wahn persn weh ga chroo lov wahn du tingz fi mek di ada persn hapi. Soh insteda shoa lov onli wen yoo feel laik it, wahn kansidarayt hozban er waif wahn noatis wen ih mayt need afekshan an ih wahn du evriting ih kud fi dehdeh far ahn.

Moas a di taim, wahn waif need moa afekshan dan ih hozban. Wahn hozban mait ga deep lov fi ih waif. Bot if hihn shoa lov onli da di staat a di day ahn di en a di day, er onli bifoa sekshwal rilayshanz, ih waif mait feel laik ih noh reeli lov ahn kayr far ahn. If faar beta fi shoa afekshan difrent taimz joorin di day.

 Weh yu ku du

Shoa afekshan wid werdz. Werdz laik “Ai lov yu” er “Yu soh preshos tu mi” ku mek yu mayt feel laik yu cherish ahn.

Baibl prinsipl: “Wateva unu haat ful op wid, dat da weh wahn kom owta unu mowt.”​—Machyu 12:34.

Tip: Noh jos tel yu mayt dat yu lov ahn. Rait wahn lee noat, wahn eemayl, er sen ahn wahn lee teks mesij.

Shoa afekshan wid akshanz. Wahn hog, wahn kis, er jos di hoal eech ada han ku shoa dat yu reeli meen it wen yu seh “Ai lov yoo.” Sohn ada wayz fi shoa yu mayt dat yu reeli kyaa da fi luk pan ahn eena wahn lovin way, er toch ahn eena wahn tenda, lovin way, er giv ahn wahn lee gif wans in a wail—ih mait song simpl bot dehnya tingz shoa lov an afekshan. Yu tink yu ku du sohn helpful tingz fi yu waif? Maybi yu ku du tingz laik bak di bag dehn, oapm wahn doa far ahn, wash op di dishiz, help ahn wash di kloaz, er maybi eevn kuk wahn lee sohnting far ahn. Tu wahn lata waif, dehnya tingz shoa dat dehn hozban lov ahn kyaa fi dehn!

Baibl prinsipl: ‘Noh mek wi onli seh wid wi mowt dat wi lov peepl, bot mek wi shoa it fi chroo bai weh wi du.’​—1 Jan 3:​18.

Tip: Chreet yu mayt di way yu mi chreet ahn wen unu mi-di dayt.

Mek taim fi eech ada. Wen unu spen taim tugeda, jos di too a unu, yu ku schrentn yu marij ahn yu mayt wahn noa dat yu reeli laik fi deh rong ahn. Af koars, ih mait bee haad fi set taim wan said fi jos di too a unu if unu ga chiljren er if unu ga ada impoatant tingz weh unu need fi taak bowt eech day. Bot maybi yu ku stil plan wahn lee eevnin waak, weh jos di too a unu ku spen taim tugeda.

Baibl prinsipl: “Noa weh da di bes ting fi du.”​—Filipiyanz 1:​10.

Tip: Som koplz weh bizi set taim wan said fi ga wahn “dayt nait” er “dayt weeken” jos soh dat dehn ku spen taim tugeda az wahn kopl.

Noa yu mayt. Aala wi difrent fahn wan anada. Soh yu mayt mait ga wahn difrent need fi afekshan dan yoo. Taak tu eech ada; fain owt how yu mayt prifaa fi get afekshan an if yu need fi shoa moa. Den chrai yu bes fi giv yu mayt weh ih need. Memba, afekshan, er lov ahn kyaa, veri impoatant if yu waahn ga wahn schrang marij.

Baibl prinsipl: ‘If yu ga lov, yu noh wahn bee selfish an aalwayz waahn yu oan way aal di taim.’​—1 Korintyanz 13:4, 5.

Tip: Insteda foas yu mayt fi shoa yu afekshan, er seh ih haftu shoa yu afekshan, aks yuself, ‘Weh Ai ku du soh dat mi mayt feel moa afekshan fi mee?’