Tin ékôane Bengaa be Yéhôva é ne mone nsamba bitôtôlô Bekristene ba tebele ésaé Bengaa be Yéhôva ya si ése. Ésaé jap é bili mefase mebaé:

•   Ba kômesane miñye’elane ya Kalate Zambe bia bi a zene ya bekalate, bisulan a besikôlô Bengaa be Yéhôva.​—Luc 12:42.

•   Ba tebele ésaé nkañete Bengaa be Yéhôva ja bobane si ése, ba kate fe avale bobejañe ba yiane belane mimvean.

 Tin ékôane ja tôñ éve’ela “minlôman a bemvendé ya Jérusalem” mi nga li’i ntete mimbu ôsu. Be mbe be nyoñe’e mintyi’an asu bikôane bekristene bise ya éyoñe jap. (Mam minlôman 15:2) Aval ane Bekristene bete, bobejañe ya Tin ékôane be nji nyoñe bebien ane bivete ya ékôane Bengaa be Yéhôva. Kalate Zambe nnye a liti be avale ba yiane tebele ésaé; ba yeme na, Yéhôva a nga telé Yésus ane nlô ya ékôane bekristene.​​—1 Becorinthien 11:3; Beéphésien 5:​23.

Beza be ne bibu’a ya Tin ékôan?

 Bobejañe be ne bibu’a ya Tin ékôane Bengaa be Yéhôva be ne môé na: Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, a Jeffrey Winder. Ba saé e wofise Bengaa be Yéhôva ya si ése ô ne Warwick, e tisone ba loone na New York, e si ya Amelka.

Tin ékôan é ne nta’an aya?

 Tin ékôane Bengaa be Yéhôva é nga telé bimo’o bisamane bia tebele bisaé bise bia boban ékôane jangan, mojañ ase a ne ébu’a ya Tin ékôan a tebele émo’o jia nge ke abui bimo’o.

•   Émo’o bobejañe ba tebele bisaé: Ja tebele mame ma fombô metiñe nge mejô ma nambe ékôane jangan, ja nyoñe fe mintyi’an éyoñ ébubua éziñe ja kui. Éyoñe Bengaa be Yéhôva ya vôm éziñe ba tôban étibela’a amu mbunane wop, nge ke nju’u éziñ wo yiane kômban avôl avôl, émo’o éte nje je kôme jam éte.

•   Émo’o asu bôte ba saé Béthel: Ja tebele mame mese ma nambe bobejañe ba saé Bebéthel.

•   Émo’o asu nkulane bekalate: Ja tebele ésaé nkulane bekalate, ja bo fe na bekalate bete be ke kui bikôane bekristen; ja wulu fe ésaé nlôñane Meba m’Éjôé, nlôñane menda ba kôñelane bekalate, a nlôñane bewofise ya Bebéthel.

•   Émo’o asu ésaé nkañete: Ja tebele ésaé nkañetane “Mbamba foé ya Éjôé”​—Matthieu 24:14.

•   Émo’o asu ñye’elan: Ja tebele mame mese ma fombô nkômesane bidi ya nsisime bia bi a zene ya bisulan, besikôlô, be audio, a bevidéo.

•   Émo’o asu ntilane bekalate: Ja tebele mame mese ma fombô nkômesane bidi ya nsisime bia bi a zene ya bekalate, miñye’elane bia koone mie anjeñe mefoé dangan, ja wulu fe ésaé nkôñelane bekalate.

 Ane ô vaa nalé, Tin ékôane ja bo ékôane sondô ase asu na é fase miñyiane Bengaa be Yéhôva ya si se. Éyoñe ba bo ékôan éte, ba jeñe na be yeme jé Kalate Zambe a jô, ba jô’é fe na mbamba nsisime nnye a liti be zen; ba ve ngule ya kui tyiñ ôsusua na ba nyoñe mintyi’an.​​—Mam minlôman 15:25.

Beza ba loone na bevolô ya Tin ékôan?

 Be ne bekristene bi too be ndi; mbe ba su’u bobejañe ya Tin ékôan ésaé jap. (1 Becorinthien 4:2) Be jaéya saé asu ékôane Yéhôva a ba yeme bo ésaé émo’o jap ja tebele, ba tabe fe bikôane Tin ékôane ja bo sondô ase. Akusa bo na sa ke mbe ba nyoñe mintyi’an, ve asimesane bobejañe bete ba ve, da volô Tin ékôane na é bo ésaé jé mvo’é, nalé a bo na ésaé ékôane Yéhôva é ke ôsu. Tin ékôan ja lôme fe be na be ke jome bobejañe ya abui bevôm. Ja belane fe be na be wulu beta bisulane biziñ, ane beta ésulane ba bo mbu ôse nge ji ja dibe sikôlô ya Galaad.