Ôwé. Bengaa be Yéhôva be wô’ô volô bôte bevok éyoñe mbia jam akui be. Bi wô’ô volô Bengaa, to’o ba be nji bo Bengaa. Kalate Zambe émien ajô Begalate 6:10 na: “mbo’ane mam me ne mvaé mfa’a ya bôte bese, a dañedañ mfa’a ya be ba be ne ba ya nda mbunan.” Bia jeñe fe na bi volô bôte be bili nju’u nlem.—2 Becorinthien 1:3, 4.

Éyoñe ébubua ja kui, bevemdé ya valé ba tate jeñe na be yeme nge môte ase a ne mvô’é a avale mvolane a yi. Éyoñe te ba kate wofise Bengaa be Yéhôva ya si éte abime Bengaa ya te bi njuk, a mvolan bebien be tatéya ve bobenyañe bap.

Nge mekônda mese ngule ya volô, wofise wo jôé Bengaa bese wo ye ve biôm bia jemban. Nne bekristene ya melu mvus be mbe be volô’ane nalé éyoñe ya zaé. (1 Becorinthien 16:1-4) Wofise Bengaa be Yéhôva ya si éte wo télé bôte be ne bo na mvolan ô kui be bôte ba te bi njuk. Bengaa ya mesi mevok be ne belane biôm biap a éyoñe jap na be volô.—Minkana 17:17.

Bia belane mimvolane ba lôme wofise Bengaa be Yéhôva asu bôte be bili minjuk. (Mam minlôman 11:27-30; 2 Becorinthien 8:13-15) Moné ase bôte b’alôme a ke fo’o ve mimvolan. Bia ya’ane ke bôte b’avolô bia. Bia ndamane ke moné ba lôme bia.—2 Becorinthien 8:20.