Kele vôm ô ne lañe de

Kele sous-menu

Bengaa be Yéhôva

Bulu

Ye Bengaa be Yéhôva be bili metiñ me ne volô môt a jeñ aluk?

Ye Bengaa be Yéhôva be bili metiñ me ne volô môt a jeñ aluk?

Bengaa be Yéhôva ba yeme na, miñye’elan a metiñe ya Kalate Zambe mi ne volô be na, be nyoñe mintyi’ane mia ve Yéhôva Zambe nleme mvaé, a mintyi’ane mite mi ne fe mfi asu dap bebien. (Ésaïe 48:17, 18) Sa ke bia bi nga té miñye’elan a metiñe mete, ve bia tôñe mie ényiñe jangan. Bi tame zu yen avale miñye’elane mite mia fombô bôte ba jeñe na ba yemban asu aluk. *

  • Alu’u da yiane tabe nnôm éto. (Matthieu 19:6) Amu Bengaa be Yéhôva ba yeme na, e yemban asu aluk a ne jame da ya mame ma yiane boban ôsusua na bôte bebaé be lu’an, be nji bo de fianga.

  • Bôte bebaé be ne jeñe na ba yemban asu aluk, vengevenge ve nge be mbili ôkala ya lu’an. Ba yiane bo aval bôt “é nto ékua mfa’a ya mimbu” miap; nalé a tinane na, be dañeya nkômbane ya ke binoñ.1 Becorinthien 7:36.

  • Bôte bebaé be ne jeñe na ba yemban asu aluk, vengevenge ve be ne fili ya lu’an. Bôte béziñe be nga tyam aluk e mise m’éjôé, ve nalé a nji tinane na, e mise me Zambe, be ne fili ya lu’u môte mfe; jam é ne bo na môt a tyameya aluk a beta lu’u môte mfe, é ne ve mbia nkeane binoñ.Matthieu 19:9.

  • Bobejañ ba jeñ aluk, be ne ntindane na, be tobe môte ba kômbô luk e zañe Bekristen. (1 Becorinthien 7:39) Bengaa be Yéhôva ba yeme na, atiñe te e nji kobô ajô môt a semé miñye’elane Bengaa be Yéhôva, ve da kobô ajô môt a dubaneya ane Ngaa Yéhôva, nyi a liti na a kañese miñye’elane ya Kalate Zambe, a tône fe mie ényiñe jé. (2 Becorinthien 6:14) Aso melu kôa, Yéhôva a yi na bebo bisaé bé be lu’an a bôte ba be be ba kañe nye nsamba. (Metata’a 24:3; Malachie 2:11) Mam abui ma liti melu mangane ma na, atiñe te é ngenan tee ke abo si. *

  • Bongô ba yiane bo bebiaé bap mewôk. (Minkana 1:8; Becolossien 3:20) Asu bongô be ngenane be too a bebiaé bap, nalé a tinane na, ba yiane bo be mewôk éyoñe ba nyoñe mintyi’an a lat a mam m’aluk. Mintyi’ane mite mi ne fombô ôkala mone wop a ne taté na a kobô ajô aluk, mia fombô fe mam a ne ngule ya bo a môte ba nye ba kobô ajô aluk.

  • Ngaa Yéhôva émien, nnye a tyik nge a ye kobô ajô aluk a môt, nnye fe a tobe môt a yi na ba nye be kobô de. Nalé a lu’an a ñye’elane ya Kalate Zambe wu: “Môt ase a ye be’e mbe’e wé.” (Begalate 6:5) Ôsusua na ba nyoñe ntyi’ane ya kobô ajô aluk a môt, abui bobejañe da yene mfi ya taté jeñe melebe ma so be bobejañe be ne bitôtôlô, amu ba yeme na, bobejañe bete ba yi mvaé jap.Minkana 1:5.

  • Abui mam bôte ba yemban asu aluk be wô’ô bo, é ne nya abé mise me Zambe. Éve’an é ne na Kalate Zambe a jô bia na bi sa’ale mbia nkeane binoñ. A nji bo ve na fam ba binga be jô’ôbô, ve mbia nkean binoñ a ne fe éyoñe bôte be nji bo nlu’an ba nambane biôme bi fam a biôme bi minga, nge ke éyoñe ba fia’ane biôme bite, nge ke na, fame ja yaé minga ébôn nge mebé, nge ke éyoñe minga a yaé nsote fam. (1 Becorinthien 6:9-11) Ja’a éyoñe bôte be nji bo nlu’an ba bo mam méziñe me ne tindi be na, be bi ve nkômbane ya ke énoñ, mboon ôte ô ne mvite mise me Zambe. (Begalate 5:19-21) Minlañ mi ne mvit, mi ne fe abé mise me Zambe.Becolossien 3:8.

  • Nlem, nge môte bi ne nlem été, a ne medu’an. (Jérémie 17:9) Nlem ô ne tindi môte na, a bo jam émien a kôme yeme na, é ne abé. Asu na nleme wop ô bo te du’u be, bôte ba jeñe na ba yemban asu aluk, be nji yiane tabe ve bebaé e mevôme be ne ngule ya tyam atiñe Yéhôva. Be ne nyoñe ntyi’ane ya yenan e bôt été, nge ke na, be ne bo na mojañ nge ke sita éziñ, a ke a wulu a be. (Minkana 28:26) Bekristene be ne minkoé ba yeme na, be nji yiane jeñ aluk a zene ya internet; ba yeme fe na, é ne abé na be bi élat a môt be nji tu’a yem.Besam 26:4.

^ É.N. 2 Metume ya mesi méziñe ma kamane bôte ba kômbô lu’an na be taté na ba yeman. Kalate Zambe a nji yemete na bôte ba kômbô lu’an be taté jeñe na be yeman.

^ É.N. 6 Bia lañ nsoé kalate ba loone Marriage & Family Review, na: “Mame mela me ne nya mfi asu na aluk é libi’i (é bo jôm ane mimbu 25 akekui 50 a mvuk): 1) avale minsôñane da mfa’a ya nsisim, 2) ñyebe wua, 3) avale miñye’elane da.—Volume 38, issue 1, afebe 88 (2005).