Mbamba foé Jean a nga tili 11:1-57
11 A nga bo na môt a too jôé na Lazare, a mbe a konôk, a mbe môte ya Béthanie, nlame Marie a monyañe wé Marthe.
2 Nyuna, a mbe Marie a nga sôé Tate mbon a fimine mebo mé a ésile jé, ndôme jé Lazare nje é mbe é konôk.
3 Ane bekale bé be nga lôme nye mbañete be jô’ô na: “A Tate tame yen! Mvôé jôé wo nye’e ja kon.”
4 Ve éyoñe Yésus a nga wô’ô de, a nga jô na: “Asu’ulane ya ôkone wu é nji bo awu, ve é ne asu duma Zambe, ndembene Mona Zambe a ne bi duma a zen éte.”
5 A Yésus a mbe a nyeke’e Marthe ba monyañ a Lazare.
6 Ve éyoñ a nga wô’ô na Lazare a mbe a konôk, a nga ke ôsu a tabe vôm a mbe, melu mefe mebaé.
7 Mvuse ya valé, a nga jô beyé’é na: “Ntame beta keané Judée.”
8 Beyé’é be nga jô nye na: “A Rabbi, bôte ya Judée be ndeme jeñe na ba lume wo mekok, a ô nga beta ke wôé?”
9 Yésus a nga yalane na: “Môs ô bili mewolo 12 sa nalé? Nge môt a wulu amôs, a ye ke kolé jôm éziñ amu a yen éfufube ya si nyu, sa nalé?
10 Ve nge môt a wulu alu a ye kolé ôbak, amu éfufup é nji bo be nye.”
11 Éyoñ a maneya jô mame ma a nga kô’ôlane na: “Lazare mvôé jangan a keya ôyo, ve ma ke wôé na me ke vele nye.”
12 Ane beyé’é be nga jô nye na: “A Tate, nge a ne ôyo, ke a ye bo mvo’é.”
13 Ve Yésus a mbe a jô’ô na Lazare a wuya, ve be mbe be simesa’ane na a mbe a jô’ô fo’o ve na a ke ôyo, na a wo’on.
14 Ane Yésus a nga kate be ne ngeññ na: “Lazare a wuya,
15 a ma va’a mfa’a wônan amu me nji be valé ndembene mi ne buni. Ve nkelané be nye.”
16 Ane Thomas, nyu be mbe be lo’one na Mbias, a nga jô beyé’é bevo’o na: “Bia fe, nkelané na bi ke wu a nye.”
17 Éyoñe Yésus a nga suan, a nga koone Lazare a boya melu menyin e soñ été.
18 Béthanie a mbe bebé kilimita élal* a Jérusalem.
19 A abui bejuif é nga zu ngolé Marthe a Marie amu ndôme jap é nga wu.
20 Éyoñe Marthe a nga wô’ô na Yésus le a zu, a nga ke tôbane nye, ve Marie a nga li’i a too nda été.
21 Ane Marthe a nga jô Yésus na: “A Tate, nge ô nga ye be va, ndôme jam é nji ye wu.
22 Ve to’o éyoñe ji, ma yeme na, jôm ése wo sili Zambe, Zambe a ye ve wo je.”
23 Yésus a nga jô nye na: “Nyo ndôm a ye wômô.”
24 Marthe a nga jô nye na: “Ma yeme na a ye wômô awolo ya ñwômane miñwuane môse wo su’ulan.”
25 Yésus a nga jô nye na: “Me ne ñwômane miñwuan a ényiñ. Nyu a liti na a buni ma, ja’a a wu, a ye beta nyiñ;
26 a môt ase a nyiñ a liti’i na a bili mbunane be ma, a ye ke wu môs éziñ. Ye wo buni nalé?”
27 A nga jô nye na: “Ôwé a Tate, me buniya na ô ne Krist Mona Zambe, nyu be nga jô na a ye so si nyu.”
28 Éyoñ a nga mane jô nalé, a nga ke jô Marie ôfôfoé na: “Ñye’ele a ne va a loone wo.”
29 Éyoñ a nga wô’ô de, a nga ji’a tebe tetele a ke koone nye.
30 Ve e zu koone na Yésus a ngenane teke kui nlam, ve a mbe a ngenane vôme Marthe a nga ke tôbane nye.
31 Éyoñe bejuif be mbe nda été a Marie na ba ngolé nye, be nga yene nye a ji’a tebe tetele a kui atan, be nga tôñe nye be buni’i na a ke soñe na a ke yône wôé.
32 Éyoñe Marie a nga suane vôme Yésus a mbe a yene nye, a nga ku nye mebo, a jô nye na: “A Tate, nge ô nga ye be va, ndôme jam é nji ye wu.”
33 Éyoñe Yésus a nga yene nye a yônôk a bejuif be nga so a nye be yônôk, nlem* ô nga bo nye abé a taé nye angôndô ya abui.
34 Ane a nga jô na: “Nne mia te bôé nye vé?” Be nga jô nye na: “A Tate za’a yen.”
35 Mili’i ve taté na ma kui Yésus mis.
36 Éyoñe bejuif be nga yene de, be nga taté na ba jô na: “Tama yenan, a mbe a wô’ô nye mintaé nya nya abuii!”
37 Ve bôte béziñe ya be be be nga jô na: “Ye môt a nga yoé ndindime mis a nga kate bo na môte nyu a bo teke wu?”
38 Éyoñ a maneya yône nleme wé été, ane Yésus a nga ke soñ. É mbe mbas akok, a akok é mbe é butu été yôp.
39 Yésus a nga jô na: “Tinda’ané akok.” Marthe, kale môt a nga wu a nga jô nye na: “A Tate, éyoñe ji a nga yiane nyum, amu a wuya den a ntoo melu menyin.”
40 Yésus a nga jô nye na: “Nga ma te kate wo na, nge wo buni, wo ye yene duma Zambe?”
41 Ane be nga vaa akok, nde Yésus a nga bete mise yôp a jô na: “A Ésa, ma ve wo akiba, amu wo te vô’ôlô ma.
42 Nya ajôô a ne na, me mbe me yeme’e na, wo jaé zu wo wô’ô ma, ve ma te kobô mfa’a ya na, nsamba bôte wo bômane ma wu, ô buni fo’o na wo ô nga lôme ma.”
43 Éyoñ a maneya jô mame mete, a nga yôtan a jô’ô na: “A Lazare kui atan!”
44 Môt a mbe mbim a nga kui atan, bebandase be too nye ntiñetane mo a mebo, asu dé é too ntiñetan a bebandas. Yésus a nga jô be na: “Ti’ané nye bebandas a mi jô’é nye a ke.”
45 Éyoñ abui bejuif é nga zu yene Marie, é nga yene mame mete, é nga buni nye,
46 ve bôte béziñe ya be be be nga ke yene bepharisien a kate be jame Yésus a te bo.
47 Nde bejôô beprêtre a bepharisien be nga ke tôkan a Sanhédrin* vôme wua a jô na: “Nde bia zu bo aya, amu môte nyi a bo abui mesimba?
48 Nge bi jô’é nye na a kee nalé ôsu, bôte bese ba ye buni nye, a beromain ba ye so a nyoñe vôme wongane nyi* a ayoñe dangan.”
49 Ve môte wua ya be be, Caïphe, nyu a mbe beta prêtre mbu ôte a nga jô be na: “Mi nji fo’o yeme jame da boban,
50 nde fe, ye mi nji yene na, é ne mfi asu denane na, môte wua a wu asu bôte bese a lôte na ayoñ ése é mane jañ?”
51 Ve jam a nga jô é nji be é so’o be émien, ve amu a mbe beta prêtre mbu ôte, a nga bo nkulan ajô na Yésus a ye wu asu ayoñ.
52 Sa ke ve asu ayoñ, ve na, a zu fe tôkane bone be Zambe be nga mane mialane na be bo jôme jia.
53 Nde ataté môs ôte, be nga bo émo’o na be wôé nye.
54 Ajô te Yésus a nji beta wulu e bôt été ézezañe bejuif, ve a nga kôlô valé a ke ngoto é ne fefele nkôte si, tisone ba loone na Éphraïm, a a nga tabe wôé a beyé’é.
55 E zu koone na, Paska bejuif a ntoo bebé, a abui bôt é mbe é so’o minlame na ba bet a ke Jérusalem ôsusua Paska na ba ke tune bebien avale metiñe me mbe me jô’ôk.
56 Be mbe be jeñe’e Yésus, a be mbe be jô’ô nté be mbe be tele fefele Temple na: “Mia simesan aya? Ye a ye ke so abôk?”
57 Ve bejôô beprêtre a bepharisien be nga ve atiñe na nge môt a yeme vôme Yésus a ne, a yiane kate be de asu ya na be ke bi nye.
Notes
^ Nkobô Grec, “bestade 15.” Stade wua a ne meta 185.
^ Nkobô Grec, “nsisim.”
^ Lañe’e Atinane bifia.
^ Nalé a tinane na, Temple.
