Kalate Jacques a nga tili 2:1-26
2 A bobenyañe bam, aval avé mi ne buni étôto’o Tate wongane Yésus Krist, mi bo’o ki ôbangam?
2 Amu, nge môt a be’e bilondo bi too gôlôt anyui dé a mbamba éyé a nyiin ésulane jenan, ve môt a too nzôzoé a be’e fe mvite biyé a nyiin,
3 ye mia fombô a mbamba be mise nyu a be’e mbamba biyé a jô nye na, “Wo, za’a tabe vôme nyi, mbamba éto,” a jô nyu a ne nzôzoé na, “Wo, kele’e ôsu a tebe valé,” nge na, “Za’a tabe va, ételé mebo jame si va”?
4 Nge nne mia bo nalé, nga mia semene mingume mi bôt a biasé mi mivok, a nga mi ntoo betyi’i mejô ba nyoñe mbia mintyi’an?
5 Vô’ôlané, a bobenyañe bame ma nye’e. Nga Zambe a nga tobe ba émo ja yen ane minzôzoé na, be bo mimfañe mbunan été a benyoñe ngabe ya Éjôé, nje a nga ka’ale bôte ba nye’e nye?
6 Ve mi mia biasé minzôzoé. Ye sa ke minkukume mmie mia tibili mia a kee mia meba mejô?
7 Ye sa ke mbe ba biasé mbamba éyôlé be nga ve mia?
8 Éyoñe ji, nge mia tôñ éwôlô atiñe njô bôt é ne éfuse ji, “Wo yiane nye’e môte mbok ane wo nye’e womien,” mia bo mvo’é.
9 Ve nge mia ke ôsu a bo ôbangam, mia bo nsem, a atiñe da bo’olô* na mi ne betyame metiñ.
10 Amu nge môt éziñ a tôñe Metiñe me Moïse mese, ve a bo’ok ékobe vôma wua, a maneya tyame metiñe mese.
11 Amu nyu a nga jô na, “Ô nji yiane bo mejian,” nnye fe a nga jô na, “Ô nji yiane wôé.” Éyoñe ji, nge wo bo te bo mejian, ve ô wôék, ô ntoo ñhe ntyame metiñ.
12 Kelané ôsu a kobô a nyiñ aval ane bôte ba ye tyi’ibane mejô a atiñe bôte be ne fili.*
13 Amu nyu a nji bi fulu ya ko bôt éngôngol a ye bi ntyi’ane mejô ô ne teke nkoon éngôngol. Nkoon éngôngole wo dañe ntyi’ane mejô.
14 A bobejañ, mfi ôvé ô ne na môt a bi mbunan, ve teke mimboon? Ye mbunan ôte ô ne fo’o nyii nye nga?
15 Nge bobejañ a besita béziñe be ne teke biyé* a teke abime bidi da yiane môs,
16 ve wua ya be mia a jô be na, “Kelané mvo’é été; taba’ané ayôñ été a ja’ané mvo’é,” ve a teke be ve jôme ba yi asu nyule jap, jam éte é ne mfi ôvé?
17 Ajô te nde, mbunan étam, teke mimboon, ô ne ñwuan.
18 Ve môt éziñ a ye jô na: “Ô bili mbunan, a me bili mimboon. Liti’i ma mbunane wôé teke mimboon, a ma ye liti wo mbunane wom a mimboon.”
19 Nga wo buni na Zambe a ne ve wuwua? Wo bo mvo’é. Ve mbia minsisime fe mia buni nalé a mia nyeñeban.
20 Ve, a zezé môta binam, ye wo dimine na mbunan ô ne teke mimboon ô ne momo?
21 Nga Abraham ésa wongan a nga bi mekabe na a ne zôsô a zene ya mimboone mié, éyoñ a nga bôé Isaac mone wé autel yôp?
22 Wo yene na, mbunane wé ô mbe vevee a mimboone mié, a mbunane wé ô nga bo teke ayeñ a zene ya mimboone mié,
23 a éfus é nga tôébane ja jô na: “Abraham a nga buni Yéhôva,* a jam éte é nga bo na a lañeban ane zôsôa môt,” a a nga loobane na mvôé Yéhôva.*
24 Mia yene na môt a bi mekabe na a ne zôsô a zene ya mimboone mié, sa ke fo’o ve a mbunan étam.
25 Avale te fe, nga Rahab, minga bijabô, a nga bi mekabe na a ne zôsô a zene ya mimboone mié, éyoñ a nga nyoñe beloé si* mvo’é a lôme be zene fe?
26 Nde, fo’o ve avale nyul é ne teke mvebe* é ne ñwuan, avale te fe mbunan ô ne teke mimboon ô ne ñwuan.
Notes
^ Nge ke, “komekane mia.”
^ Nkobô Grec, “atiñe ya fili.”
^ Nge ke, “soé.”
^ Lañe’e Atinane bifia.
^ Lañe’e Atinane bifia.
^ Nkobô Grec, “minlôman.”
^ Nkobô Grec, “nsisim.”
