1. Jé ja ye bo nge bia subu Zambe bebé?

YÉHÔVA a nye’e bôte ba bo nye ésaé. Nge wo kañe Yéhôva, a ye botane wo, éyoñe di a nnôm éto. Kalate Zambe a jô na: “Suba’ane bebé be Zambe, ndemben a ye subu mia bebé.”​—Jacques 4:8.

2. Aval avé bi ne subu Zambe bebé, a jamete da nambe meye’elane mangan aya?

2 Ô ne subu Zambe bebé éyoñe wo yé’é Mejô mé a bo ane ma jô. Éyoñe wo ye’elan ane nkômbane wé ô né, Yéhôva a ye wôk meye’elane môé a yalane fe me. Nlômane Jean ô nga tili na: “Ndi minlem bi bili e be nye nje nyô: nge bia ja’é nye jôm, aval ane nkômbane wé ô né, a wô’ô bia. Ajô te, amu bia yeme na a wô’ô bia éyoñ bia sili nye jam éziñ, bi too ndi na bi mbili jôm bi nga sili nye.”​—1 Jean 5:14, 15 Kalate Zambe Mfefé Nkôñelan.

3-7. Bi ne bi fek ja so be Zambe aya, a aval avé fek éte é ne volô bia?

3 Aval wo subu Zambe bebé, avale te nde fe a ye ve wo fek ya dañe minjuk wo tôban éyiñe jôé. Kalate Zambe a jô na: “Nge fe’e ja jembane môt éziñe ya be mia, a jaké’é je Zambe.”​—Jacques 1:5.

4 Fek ja so be Zambe é ne volô wo aval avé? Jam ôsu é ne na, ja ye volô wo na ô yeme mame Yéhôva a vini. Wo ye fe yé’é amu jé mame mete me ne abé a jé ô ne bo na ô sa’ale me. Ñyemane te ô ne volô wo na ô bo te tôbane minju’u mi andeñele bôte melu ma. Bi tame nyoñ éve’an: Kalate Zambe a jô na bi bo te bo ébamba. Nge bi tôñ atiñe te, bobe binga ba ye bo te nyoñe mebum be nji kômbô, bi sa’ale fe akon da kôébane mfula’ane binga a befam. Nde fe meluk mangan ma ye libi.

5 Fek ja so be Zambe é ne beta volô wo aya? Fek éte ja volô wo na ô nyiñe nya ényiñ. Ja volô fe na ô bi mbamba mintyi’ane mi mam, ô yeme belane moné wôé a tôñe mame me ne mfi.

6 Fek ja so be Zambe ja volô fe na ô bi mbamba meyeña’a a Zambe. Nda bôte jôé ja ye nyiñe meva’a été. Wo ye bi memvôé ma libi. Bôt abui, to’o ba be nji bo Zambe ésaé, bé semé wo.

7 Fek ja so be Zambe ja volô na ô yene nya ényiñ a so be Zambe. Wo ye dañe minju’u ya ényiñe jôé. Nleme wôé wo ye ke tyebe yôp. Nge nlem ô bôô wo si, nsisim a minsône miôé fe mi aye tabe mvo’é.​—Minkana 14:30; Esaïe 48:17.

8. Nge wo bo Zambe ésaé, jé wo ye bo te ko woñ?

8 Nge wo bo nya Zambe ésaé, wo ye bo te ko mame ma kui bôte woñ. Amu wo yeme na bewu be nji fe nyiñe mesoñ, wo ye bo te ko be woñ. Ô nji fe beta ko woñe ya wu, amu ô bili ndi nleme na Zambe a ye wômôlô wo. Mvi’i a ngbwel, wo ye bo te ko be woñ amu wo yeme na Yéhôva a ne Zambe ya Ngul ése.​—Jean 8:32.

 Bezôsôô be bôte ba ye tabe si

9-11. Za a ye nyiñe e paradis, za ke a ye bo te nyiñ été?

9 Nge ô subu Zambe bebé, wo ye bo te ko ényiñe ja zu woñ. Avale bi maneya yen, Kalate Zambe a nga kuli mam abui bia yene den. Yéhôva a nga jô na mame mete me ne asu étun éyoñ; ana’ana, Ejôé Zambe ja zu kôñelane si na é bo paradis.​—Luc 21:10, 11, 31; 23:43.

10 Fo’o ve bôte ba subu Zambe bebé a bo nkômbane wé, mbe étam ba ye nyiñe paradis. Kalate Zambe a jô na: “Amu ôbe nté ô ngenan, a mbia môt a ye fe tabe: Yaa, w’aye tu’a fombô vôm a nga to, a ye bo momo. Ve bôte be ne minlem évôvoé b’aye nyoñe si.”​—Besam 37:10, 11.

11 Bôte ba bene tôñe metiñe me Zambe bé jañelé ényiñe jap nnôm éto. (2 Bethessalonicien 1:8, 9) Ba ye ke beta nyiñe. Ba be Satan a beéngele bé ba ye jañe nnôm éto. (Nlitan 20:10, 14) Ve, nyu a yé’é nkômbane Yéhôva a bo avale wo yi, nye a ye bu’ubane bibotan e paradis si va.

Mbamba ényiñ a yange bia!

12. Jé Kalate Zambe a jô mfa’a ényiñe ja yange bia?

12 Yéhôva a naane mbamba be mam asu bôte ba nye’e nye. Tame yene mame Kalate Zambe a kobô ajô y’ényiñe ya paradis:

  • Abui bidi ya di: “Abui bidi d’aye bo si nyô mebôbône minkôle yôp.”​—Besam 72:16.

  • Abeñe menda: “B’aye lôñe menda, a tabe me.”​—Esaïe 65:21.

  • Mbamba ésaé: “Bôte bam be ne mintoban b’aye jaé vak a ésaé ya mo map, b’aye bo te bo ésaé éboboé.”​—Esaïe 65:22, 23.

  • Teke akon: “A môt a to été a ye bo te jô na, m’ akon”—Esaïe 33:24.

  • Teke biyem: “Eyoñ éte mis mindindim m’aye kuiban, a melo mindôndok m’aye yombô. Eyoñ éte mbômbô’ô w’aye tyele si aval ane nnôm nkok, a ôyem mvumvuk vi aye yia bia.”​—Esaïe 35:5, 6.

  • Teke mintaé, minjuk, nge awu: “[Zambe] a ye fimi mili’i mese mise map; a awu de aye fe bo; nalé fe ôlun vi aye fe bo, nge ñyôn, nge mintaé: mame ya ôsu me lôteya.”​—Nlitan 21:4.

  • Teke bita: “[Zambe] a mane mewosan akekui susu’a ya si nyô.”​—Besam 46:9.

  • Ényiñe ya nnôm éto: “Bôt be ne zôsô b’aye nyoñe si, a tabe été nnôm éto.”​—Besam 37:29.

13. Za étam a ne ngule ya kôñelane si nyô na é bo paradis, a amu jé nye étam a ne de bo?

13 Môt a binam a se ngule ya bo avale mame di, ve Yéhôva Zambe étam nye a bili ngule ya bo mam a nga tiñeti. Jôm éziñ é se ngule ya kame na a tôé nkômbane wé. Kalate Zambe a jô na: “Amu e mfa’a Zambe teke jôm é ne kate boban.”​—Luc 1:37, Kalate Zambe Mfefé Nkôñelan.

14. Aval avé ô ne wulu zene ja ke bôt ényiñe ya nnôm éto?

14 Yéhôva a belane Bengaa bé asu na môt ase a nyiine “mbé ô ne tyôtyoé” a wulu zene ja ke bôt ényiñe ya nnôm éto. Ngo’é nge ô ne bo môte wua ya été. Nyiine nya ñyebe a nyoñek bibotane bi Yéhôva nnôm éto!​—Matthieu 7:13, 14.