Kele vôm ô ne lañe de

Kele sous-menu

Kele tep

Bengaa be Yéhôva

Bulu

Ye’ele bone bôé

 ÑYE’ELANE 5

Samuel a nga ke ôsu a bo ve mame me mbe mvo’é

Samuel a nga ke ôsu a bo ve mame me mbe mvo’é

Éyoñe Samuel a mbe mone mongô, a mbe a too nda Zambe, vôme bôte be mbe be za’a kañe Yéhôva. Ye wo yem jôm é nga bo na Samuel a zu tabe nda Zambe? Bi tame taté jeñe na bi yeme nyia wé, Hanna.

Hanna a nga tabe abui mimbu teke kui na a biaé mon, a to ke na a mbe a yi bon. Nde a nga ye’elane Yéhôva na a volô nye. A nga ka’ale fe Yéhôva na, nge a biaé mona fam, é bo na a ke nyiñ e nda Zambe a bo’o Yéhôva ésaé. Nde Yéhôva a nga ve nye mona fam, aval a nga sili nye meye’elan. Nde a nga yôlé nye na Samuel. Éyoñe Samuel a nga bi mimbu milal nge minyin, Hanna ve ke nye nda Zambe na a ke bo Zambe ésaé.

Éli nye a mbe beta prêtre ya nda Zambe. Bo be fame bé bebaé be mbe fe be saé wôé. Te vuane na, nda Zambe é mbe vôme ba kañe Yéhôva. Nde ñhe, bôte bese be mbe be too wôé, be mbe be yiane bo mame me ne mvo’é. Ve bone be Éli be mbe be bo’o angôndô ya abé mam. Samuel a mbe fe a lôô mame mete. Ye Samuel a nga vu bone be Éli? — Teké’é, Samuel a nga ke ôsu a bo ve mame me mbe mvo’é, aval ésa ba nyia be nga ye’ele nye.

Mfa’a wôé, jé Éli a nga yiane bo bone bé bebaé?— A nga yiane foñôsô be. A nji yiane jô’é na be ke ôsu a saé e nda Zambe. Ve Éli a nga tabe ne mieññ, nde Yéhôva a nga wô’ô nye ôlun a bone bé bese. Ane a nga tyi’i na é fôñôsô be.

Samuel a nga kat Éli foé Yéhôva

Alu éziñ, Samuel a kele ôyo, a nga wô’ô tyiñ é loone nye: ‘Samuel!’ Ane a nga ke mbile be Éli. Ve Éli a nga jô nye na: ‘Me nji loone wo.’ Jamete é nga beta bobane biyoñ bibaé. Éyoñe lale, ane Éli a nga jô Samuel na, nge a beta wô’ô tyiñe te, a yiane yalane na: ‘A Yéhôva, kobô’ô; ma vô’ôlô wo.’ Samuel a nga bo ve nalé. Nde Yéhôva a nga jô nye na: ‘Kele kat Éli na ma zu foñôsô nda bôte jé amu mam abé be boya.’ Ye wo  buni na é mbe tyi’ibi na Samuel a ke kat Éli foé éte?— Teke fo’o. Ve akusa bo a mbe a ko woñ, Samuel a nga bo jôme Yéhôva a nga kate nye. Jôme Yéhôva a nga jô é nga tôéban. Éli a bone bé be nga mane wu.

Samuel a ne mbamba éve’ela asu dangan. Ja’a na a nga too a bôte be mbe be bo’o mame me ne abé, Samuel a nga ke ôsu a bo ve mame me mbe mvo’é. Wo ki, wé bo aya? Ye wé ke ôsu a bo mbamba be mam ane Samuel? Nge wo bo nalé, yeme na, wé ve éso ba nyua nleme mvaé, wé ve fe Yéhôva nleme mvaé.

LAÑE BIFUSE BI

  • 1 Samuel 2:22-26; 3:1-21